Psalm 81:1-16
Diyin God yáʼátʼéehgo óʼoolíiłii áádóó Ízrel dineʼé yóóʼadahaaskaii
81 Diyin God nihidziil nilíinii yéego bichʼįʼ dahohtaał, Jéíkab biDiyin God bichʼįʼ nihił nidahoozhǫǫhgo nídidohdlaʼ!
2 Chánahgo dahohtaał, ásaaʼ yigádígíí dadoołtsʼaʼ. Tsin tłʼóół naakitsʼáadah bąąh daneelzheeʼgo bee nidaʼaʼnéii índa tsin tłʼóół neeznáá bąąh daneelzheeʼgo bee nidaʼaʼnéii bóóltąʼgo doołtsʼı̨́ı̨́h.
3 Dah néitı̨́įhgo áádóó hááníbąsgo hodílzingo áłah náʼádleeh bijı̨́ı̨́ góneʼ deenástsʼaaʼ bideeʼ bee íʼdílzoołí nídadoołtsʼı̨́ı̨́h.
4 Háálá éí Ízrel dineʼé bá bee nihootʼáanii átʼé, áádóó Jéíkab biDiyin God bibikʼeh hoogáałii átʼé.
5 Ííjip kéyah yikʼi chʼíníyá yę́ędą́ą́ʼ Jóseph dineʼé bitahgi bee bééhániihii átʼéego hółdzilgo yee nihoníʼą́. Áadi náánáłaʼ saad doo bééhasin da léiʼ disétsʼą́ą́ʼ.
6 Hawos bee hééł dah jooyéłígíí nahjįʼ há kóshłaa; tsʼaaʼ jooʼáłígíí hálákʼee háíʼą́.
7 Nichʼįʼ nahwiiʼnáago náʼiisíníkango yisdánííłtı̨́. Nahontʼindę́ę́ʼ iiʼniʼ hólǫ́ǫgi nichʼįʼ ééhosísįįd. Méribah tó háánaʼígi nanihínétą́ąʼgo bee nihééhosísįįd. Síilah.
8 Shidineʼé nohłíinii, daʼíísółtsʼą́ą́ʼ, áko nanihinishtin doo! Ízrel dineʼé nohłíinii, dashíísółtsʼą́ą́ʼ laanaa nisin!
9 Diyin dabidiʼníinii nihitahgi doo nááhódlǫ́ǫ da doo; nááná háádę́ęʼda diyin dabidiʼníinii doo bichʼįʼ nidahohłáa da doo.
10 Shíyeeʼ Bóhólníihii nihiDiyin God Ííjip kéyahdę́ę́ʼ chʼínihiníʼeezhígíí nishłı̨́. Yéego dadoohchʼééh áádóó nihizééʼ hadadideeshbı̨́ı̨́ł.
11 Nidi shidineʼé éí shizaad doo dayíistsʼą́ąʼ da. Ízrel dineʼé tʼáadoo shikʼeh dahóółʼįįd da.
12 Éí bąą bijéí yidádanoolníinii tʼóó baa hodiníʼą́, áko tʼáá bí binahatʼaʼ yikʼehgo deíkááh nítʼééʼ.
13 Dooládóʼ shidineʼé danilíinii dashíistsʼą́ąʼ doo nítʼééʼ; shikʼehgo ádahootʼéii yikʼehgo Ízrel dineʼé yikah doo nítʼééʼ!
14 Áko hweʼanaʼí danilíinii tsxı̨́įłgo tʼóó há bikʼi nisíyáa doo nítʼééʼ, áádóó hakʼijįʼ danilíinii shílaʼ bee tʼą́ą́ʼ kónáshdlaa doo nítʼééʼ.
15 Bóhólníihii dajijoołxáii tʼóó ádahozhdilʼı̨́įgo Bóhólníihii biyaa niʼízhdeejaaʼ doo nítʼééʼ áádóó atídaalʼı̨́įgo ahoolʼáa doo nítʼééʼ.
16 Tłʼoh naadą́ą́ʼ agháago yáʼátʼéehii hwiyiyíísą́ąʼ doo nítʼééʼ. Jó, tsé bąąhdę́ę́ʼ tsésʼná bitłʼizh bee hwiih nohłı̨́įgo ánihiishłaa doo nítʼééʼ.
