Psalm 49:1-20
Tʼáá bí deitʼíinii yaa dadzólíii éí doo áháyąʼ átʼé
49 Dadineʼé danohłíinii, tʼáá ninánoołʼą́ąjįʼ tʼáá ánółtso díí dadoohtsʼı̨́ı̨́h. Nihokááʼ dineʼé nohłíinii, tʼáá ánółtso daʼíísółtsʼą́ą́ʼ,
2 aʼohgo áádóó aláahgo ádanohtʼéii, daʼohtʼíinii índa nihadahojoobáʼígíí tʼáá ánółtso daʼíísółtsʼą́ą́ʼ.
3 Hódzą́ bee yáshtiʼ doo. Áádóó shijéí biyiʼdi bikʼiʼdiitáanii éí nabikʼítséskees doo.
4 Hódzą́ągo yátiʼ yínístsʼą́ąʼ doo; tsin tłʼóół bąąh daneelzheeʼgo bee nidaʼaʼnéii bee naʼaʼnéego saad doo bééhózinii hazhóʼó bee nihił hodeeshnih.
5 Shichʼįʼ nidahwiiłnáanii doo ákwii ádaatʼíinii shinínálzhishgo doo yáʼáshǫ́ǫ́góó yoołkáałgo, haʼátʼíísh biniyé shił yééʼ náhádleeh doo?
6 Éí tʼáá bí deitʼíinii yaa dadzólí índa tsʼídíkohgo ashtʼı̨́ daaníigo yee ádaa dahaʼniih.
7 Tʼáá háiida doo łaʼ hakʼis bikʼé ninázhʼdoodléeł da, índa hakʼis bą́ą́h ílı̨́ bíighahgo Diyin God doo baa jónííł átʼée da,
8 háálá biiʼ naazíinii ayóo ílı̨́. Áko hoolʼáágóó tsʼídá doo ałtso bikʼé nizhʼdooléeł da.
9 Áko hináago ahoolʼáa doo, índa doo yóóʼábidiʼdoolníił da, chʼééh jinízin.
10 Háálá dahóyáanii daninéego áádóó doo áhályáanii índa naaldlooshii nahalingo doo nitsíkeesii ałdóʼ áádįįłgo binaalyeʼé yitsʼą́ą́ʼ ahikáahgo náánáłaʼ bííʼ nidahaleehgo baa ákoznízin.
11 Tʼáá biyiʼídi ádeinízin, Hoolʼáágóó shighan siʼą́ą doo, áádóó kééhashtʼı̨́įgi náás oochííłgóó daabííʼ dooleeł; shikédaayah tʼáá shízhiʼ yee dayózhíi doo, danízin.
12 Diné atʼı̨́įgo baa yáhásinii doo hoolʼáágóó hináa da; naaldlooshii áádįįłii nahalingo hó ałdóʼ dazdootsaał.
13 Díí diné doo ádahalyáanii áádóó yee hadahaasdzíiʼii éí baʼáłchíní náás ahoolchíiłii bił tʼáá daʼákoígíí ákódaanííł. Síilah.
14 Dibé yah anoolkaad nahalingo jishcháaʼdi jizhjéeʼ doo; dibé yaa áhályáanii nahalingo anoonééł haa áhályą́ą doo; abíínígo tʼáá ákogi ádaatʼéii hondantʼáa doo, áádóó dahatsʼíís danizhónígíí jishchááʼ góneʼ dadidoołdził, áko doo kénáádahojitʼı̨́į da doo.
15 Nidi jishchááʼ bibee adziilii bitsʼąą Diyin God éí shiiʼ sizíinii néidiyoołnih, háálá nááshididoodlééł. Síilah.
16 Diné łaʼda atʼı̨́ ábiʼdiilʼįįhgo bighan góneʼ naalyeʼé haleehgo tʼáadoo bikʼee nił yéʼí.
17 Háálá daaztsą́ągo tʼáadoo dah yididooléłí da. Hanaalyeʼé doo tʼáá hakééʼ dooleeł da.
18 Azhą́ hináago, Shiiʼ sizíinii bił hózhǫ́, nízin nidi, áádóó azhą́ náás ooléełgo bee baa haʼniih nidi,
19 dahazhéʼé yę́ę adahaazlı̨́ı̨́ʼgóó jidooleeł. Áko adinídíín tsʼídá doo deizhdoołtséeł da.
20 Diné atʼı̨́įgo baa yáhásinii doo akʼiʼdiitįįhgóó, éí naaldlooshii áádįįłii nahalingo dazdootsaał.
