Psalm 116:1-19
116 Bóhólníihii ayóóʼóóshʼní, háálá bichʼįʼ yáshtiʼígíí áádóó yíníshkeedígíí shá yidiiztsʼą́ą́ʼ.
2 Shichʼįʼ dah díníitʼą́ągo shíistsʼą́ą́ʼ; éí bąą niʼníłdįįd bijı̨́įjįʼ náoshkąąhgo bichʼįʼ sodiszin doo.
3 Anoonééł bitłʼóól shináhineeshzheeʼ; hoolʼáágóó tiʼhooʼníihdi bikʼeʼíyéeʼii shidiniiltsood nítʼééʼ; achʼįʼ nahwiiʼná índa yínííł bikʼee tiʼhwiiséniiʼ.
4 Áko índa Bóhólníihii bízhiʼ bee yíníshíigo náoshkąąhgo bichʼįʼ sodiszin; Bóhólníihii nílíinii, nánooshkąąh; shiiʼ sizíinii yisdáníłteeh!
5 Bóhólníihii éí joobaʼ áádóó tʼáá ákogi átʼé; tʼáá aaníí, nihiDiyin God aa aʼááh nízinii nilı̨́.
6 Bóhólníihii éí doo dahóyáanii yaa áhályą́; tʼáá báada aʼohgo áníshtʼé sélı̨́įʼgo yisdáshííłtı̨́.
7 Shiiʼ sizíinii nílíinii, háánílyı̨́įh dooleełgóó nánídleeh, háálá Bóhólníihii éí tʼóó ahayóígóó yáʼátʼéehii ná yaa naayá.
8 Jó, anoonééł bitsʼą́ąjįʼ shiiʼ sizíinii yisdéíníłtı̨́, doo yishchagóó áshiinilaa, áádóó shaa áhólyą́ągo doo dishgeehgóó áshíínísin nítʼééʼ.
9 Bóhólníihii binááł dahináanii bitahdi yisháał doo.
10 Tʼáá íiyisí shichʼįʼ nahwiiʼná, dishníi nidi baa jííníshłí.
11 Tsı̨́įłgo haasdzíiʼgo ádííniid, Nihokááʼ dineʼé tʼáá ałtso dabiyoochʼíidii danilı̨́.
12 Bóhólníihii tʼáá ałtsoní shaa yiiznilii haʼátʼíishąʼ bee bichʼįʼ kʼéédideeshʼnííł?
13 Bee yisdáʼiildééhjí bee adlání ádá shóideeshtʼeełgo shił hózhǫ́ǫgo Bóhólníihii bízhiʼ bee yíníshíigo bichʼįʼ sodideeszįįł.
14 Bóhólníihii bidineʼé tʼáá ałtso binááł Bóhólníihii bichʼįʼ ádee hadeesdzíiʼii kʼad biʼdeeshłííł.
15 Bóhólníihii binááł bidiyı̨́ı̨́ʼ daninéego agháago ílı̨́įgo yaa nitsíkees.
16 Bóhólníihii nílíinii, tʼáá aaníí ná naalʼaʼí nishłı̨́; ná naalʼaʼí biyáázh nishłı̨́įgo ná naalʼaʼí nishłı̨́. Bee dah dashiʼdiistłʼóonii shá kʼedaʼsíníʼah.
17 Ahééh hasingo nááhániihii nichʼįʼ nááhideeshnih áádóó Bóhólníihii bízhiʼ yíníshíigo sodideeszįįł.
18 Bóhólníihii bidineʼé tʼáá ałtso binááł Bóhólníihii bichʼįʼ ádee hadeesdzíiʼii kʼad biʼdeeshłííł.
19 Jerúsalem nílíinii, nitahgi Bóhólníihii bikin biiʼ sohodizin binaagi nahazʼánígi biʼdeeshłííł. Bóhólníihii baa dahohniih!
