Matthew 28:1-20
28 Áko hááʼáyı̨́ı̨́h jı̨́ azlı̨́ı̨́ʼdóó biiskání damı̨́įgo aleeh góneʼ naaniiníłką́ągo, Mary Mágdaliin áádóó Mary łaʼígíí tséníʼootséelgo Jesus yóóʼályaadi jidínóołʼįįł biniyé ákǫ́ǫ́ jiníʼáázh.
2 Nítʼééʼ jóʼakon, ayóó átʼéego niʼ nahaasʼnááʼ, háálá Bóhólníihii bidiyingo naalʼaʼí yáʼąąshdę́ę́ʼ hadááyá, áádóó tsé nahjįʼ ayííłmáazgo yikʼi dah neezdá.
3 Atsiniltłʼish iʼdiłdlaʼígi ánoolnin, áádóó biʼééʼ éí yas nahalingo łigai.
4 Áko jishchááʼ baa ádahojilyáanii nídadzisdzíidgo hatah dahoditłid, áádóó diné daneeznáanii nidahojílin dadzizlı̨́ı̨́ʼ.
5 Nidi diyingo naalʼaʼí éí asdzání áyidííniid, Tʼáadoo náłdzidí, háálá tsin ałnáoszid bikáaʼjįʼ Jesus bił oʼoolkaalígíí hanohtáago shił bééhózin.
6 Éí doo kweʼé da, háálá tʼáá ádííniidígi átʼéego daaztsą́ą́dę́ę́ʼ náádiidzá. Hágo, Bóhólníihii sitı̨́ı̨́ nítʼééʼ yę́ęjįʼ dóhʼı̨́ı̨́ʼ.
7 Áko tsxı̨́įłgo nihílááh, Jesus daaztsą́ą́dę́ę́ʼ náádiidzáá lá, dohníigo bídahoołʼaahii bił hołneʼ, jóʼakon, Gáliliigóó nihibaʼ jideeyá; áadi dahwiidoołtsééł. Jó akoneeʼ, nihił hweeshneʼ.
8 Áko nídzíldzid nidi, tʼáá íiyisí hoł hózhǫ́ǫgo tséníʼootsééldóó tsxı̨́įłgo dashdiiʼáázh, áko bídahoołʼaahii haneʼ baa nízhdooʼááł biniyé dah ahizhdíníilchą́ą́ʼ.
9 Nítʼééʼ jóʼakon, Jesus hadááh níyáago, Nihił hózhǫ́ǫ leʼ! hałní. Áko baazhníʼáazhgo bikeeʼ dziiłtsoodgo bichʼįʼ nitsizhdinígoʼ.
10 Áko Jesus áháłní, Tʼáadoo náłdzidí, nihílááh, shikʼisóó Gáliliigóó dookah, áadi dashiidoołtséełgo bee bił hołneʼ.
Jishchááʼ yaa ádahalyáanii áhóótʼįįdígíí yaa dahalneʼ
11 Áádóó jooʼash nítʼééʼ, jóʼakon, aa ádahalyáanii łaʼ kin haalʼáagi yíkaigo, ádahóótʼįįdígíí tʼáá ałtso aláahgo náádaʼiiłniihii yee yił dahoolneʼ.
12 Áko diné yá aląąjįʼ naazíinii yił áłah silı̨́įʼgo yaa nídaastʼįįd, áko siláo éí béeso ląʼí yaa deiznilgo,
13 ádaaní, Daʼiilwoshgo hódahoołʼaahii tłʼéeʼgo yíkai lá, áko dahoneezʼı̨́įʼgo yóóʼadahastı̨́ı̨́ lá, dadohníigo diné bił dahodoołnih.
14 Áko díidíígíí naatʼáanii yidiiztsʼą́ąʼgo bił tʼáá áko doo biniyé bijadahidiigééł, áko tʼáadoo bá nanohdeehígóó ádanihidiilnííł.
15 Áko siláo béeso nídeidiinilgo, tʼáá ádabiʼdooʼniidígi ádaadzaa, áádóó kótʼéego haneʼígíí éí bijı̨́ı̨́dóó díí jı̨́įjįʼ Jew dineʼé bitahgóó nidadidlaad.
Jesus éí bídahoołʼaahii łaʼtsʼáadahígíí naanish yeidiyiizʼą́ (Mk. 16:14-18; Lk. 24:36-49; Jn. 20:19-23; Acts 1:6-8)
16 Ákohgo ídahoołʼaahii łaʼtsʼáadah jiltʼéhígíí Gáliliidi dził siʼánígóó Jesus há nihoníʼáníjįʼ jíkai.
17 Áko Jesus dajiiłtsą́ągo bichʼįʼ nitsidazhdinígoʼ, nidi łaʼ tʼáá hoł naaki daazlı̨́ı̨́ʼ.
18 Áko Jesus haa níyáago kóníigo hachʼįʼ haadzííʼ, Yáʼąąshdi áádóó nahasdzáán bikáaʼgi bee ídahólníihii tʼáá ałtso shaa deetʼą́.
19 Éí bąą nihílááh, ałʼąą dineʼé tʼáá ałtso ídahoołʼaahii danilı̨́įgo ádaahłeʼ, aTaaʼ áádóó aYeʼ índa Níłchʼi Diyinii bízhiʼ bee tó bee daahsı̨́ı̨́h,
20 áádóó bee nihichʼįʼ hahásdzíiʼii tʼáá ałtso yikʼeh dahółʼı̨́į dooleełgi bee nidanohtin, áádóó jóʼakon, łahgo náhodeesdzáajįʼ tʼáá áłahjįʼ nihił honishłǫ́.
