Matthew 24:1-51
24 Áko sohodizin bił hazʼą́ą́dóó Jesus chʼízhníyáago joogááł, nítʼééʼ hódahoołʼaahii, Díí sohodizin bił hazʼą́ągi kin naaznilígíí níníłʼı̨́, dahałníigo haa yíkai.
2 Nidi Jesus éí áhodííniid, Daʼ díísh tʼáá ałtso doo daahʼı̨́į da? Tʼáá aaníí ánihidishní, Kweʼé tsé doo łaʼ tʼáá ałkʼi dah siʼą́ą da dooleeł, nidi tʼáá ałtso naaʼahidoolkał.
Achʼįʼ nahwiiʼnáa dooleełígíí baa hojoolneʼ (Mk. 13:3-13; Lk. 21:7-19)
3 Nítʼééʼ Dził Álivz binániidi jineezdáago, hódahoołʼaahii kódaaníigo tʼáá sáhí haa yíkai, Baa chʼíhwííníʼánígíishąʼ hahgo ádahodoonííł, bee nihił hólneʼ, áádóó náádíídáłígíí, índa nihoolzhíshígíishąʼ haʼátʼíí bee bééhózin doo?
4 Áko Jesus hachʼįʼ haadzíiʼgo áhodííniid, Ádaa ádahołyą́, áko diné doo łaʼ yóóʼadanihidínóoʼah da.
5 Háálá ląʼí, Shí Christ áshtʼı̨́, daaníigo shízhiʼ yee ádadójíigo nidahidookah, áko ląʼí yóóʼadeidínóoʼah.
6 Áádóó anaaʼ dahazlı̨́įʼgo índa anaaʼ dahaleeh haʼníigo baa dahaneʼgo dadoohtsʼaʼ doo; ííshją́ą́ éí tʼáadoo bikʼee nitsidaahkaaí, háálá díidí tsʼídá ádahodoonííł, nidi tʼah doo nihoogháah da doo.
7 Háálá ałʼąą dineʼé ałchʼįʼ nídahidiibáah doo, áádóó łahgo nihokááʼ bee bóhólníihgo bił hazʼáanii índa nááná łaʼ nihokááʼ bee bínááhólníihgo bił nááhástʼáanii yił ałchʼįʼ nídahidiibáah dooleeł, índa łahgóó dahodichin doo, [áádóó achʼįʼ nidahwiiʼnáa doo,] áádóó niʼ nídahidiʼnáah doo.
8 Díidíígíí tʼáá ałtso tiʼhooʼnííh bee dadeeztʼiʼii ádaatʼé.
9 Ákohgo atéʼélʼı̨́ yaa danihidiiʼaah dooleeł, áádóó nidanihidoołtsił, índa shízhiʼ biniinaa ałʼąą dineʼé tʼáá ałtso nihikʼee dadiniih doo.
10 Áko índa ląʼí shitsʼánáhidoojah, índa ninádaʼahidiitʼaah, áádóó ałkʼee dadiʼniih doo.
11 Áko tʼóó ádahodilʼı̨́įgo dahalneʼii tʼóó ahayóí dahodooleełgo ląʼí yóóʼadeidínóoʼah.
12 Áko bąąhági átʼéii kʼeeʼąą deeshzhiizhígíí biniinaa diné ląʼí bibee ayóóʼóʼóʼniʼ dadínóokʼas.
13 Nidi tʼáá háiida tʼáá nihoníyáajįʼ haʼólnínígíí éí yisdádooltééł.
14 Áádóó yáʼąąshii bee bóhólníihgo bił hazʼáanii baa Haneʼ Yáʼátʼéehii nahasdzáán nidahoneesʼą́ą́góó, ałʼąą dineʼé tʼáá ałtso bee hwéédahodoozįįł biniyé bee hoł dahodoonih, áko áadi índa nihodoogááł.
Ayóó átʼéego achʼįʼ nahwiiʼnáa doo (Mk. 13:14-23; Lk. 21:20-24)
15 Éí bąą (díí tʼáá jółtaʼ shı̨́ı̨́ hániʼ bikʼizhʼdiitįįh) doo yildingóó niʼiiłchxǫǫhii, Daniel éí Diyin God yá halneʼii nilı̨́įgo yaa chʼíhoníʼáanii hodiyinígi sizı̨́įgo deidoołtsééł.
16 Áko índa Judíyagi kéédahatʼínígíí dziłjįʼ chodaʼiidoołʼįįł;
17 łaʼda bikin bighą́ąʼdi naagháago,* wóneʼdę́ę́ʼ tʼáadoo leʼé chʼíidoojih biniyé doo yah anídoolwoł da,
18 áádóó łaʼda dáʼákʼehgi naagháago biʼéétsoh tʼááká tʼą́ą́ʼ yaa náolyeed lágo.
19 Áko éí beiníłką́ągo dadzooltsánígíí índa awééʼ dahałtʼoʼígíí doo hashtʼeʼígóó yínííł biishdínóodah!
20 Haigo, éí doodaiiʼ hááʼáyı̨́ı̨́h jı̨́ aleeh góneʼ doo dadínóohchéłígíí bíká sodadołzin.
21 Háálá ákohgo ayóó átʼéego achʼįʼ nahwiiʼnáa doo, nahasdzáán hazlı̨́ı̨́ʼdóó wóshdę́ę́ʼ díí jı̨́įjįʼ achʼįʼ nahwiiʼná ákótʼéii tʼah doo yiiltséeh da nítʼééʼ, áádóó tsʼídá doo ákónááhodooʼníił da.
22 Índa éí yoołkáłígíí doo áłtsʼísí ánályaagóogo, nihokááʼ dineʼé doo łaʼ doodzih da, nidi bitah haasdláaʼii biniinaa éí yoołkáłígíí áłtsʼísí áńdoolnííł.
23 Ákohgo diné łaʼda, Shoo, kǫ́ǫ́ Christ naaghá, éí doodaléiʼ, Níláhjí naaghá, danihiłníigo tʼáadoo deinohdlání.
24 Háálá Christ ádadilʼíinii índa tʼóó ádahodilʼı̨́įgo dahalneʼii dahodooleełgo, álílee kʼehgo bee éédahózinii índa bikʼee tʼóó ił ahayóigo ádahooníiłii ádeiłʼı̨́į doo, áko yídaneelʼą́ą́ ládą́ą́ʼ Diyin God atah yiyiizláʼígíí nidi yóóʼadeidínóoʼah.
25 Jóʼakon, díí tʼah doo ánééhdą́ą́ʼ bee nihił hashneʼ.
26 Éí bąą, Shoo níléí honoojíidi naaghá, danihiłníigo, ákǫ́ǫ́ dadohkááh yíilaʼ, doodaiiʼ, Shoo náʼáneʼídi sidá, danihiłníigo, tʼáadoo deinohdlání.
27 Jó, haʼaʼaahjí jiilgishgo eʼeʼaahjįʼ nidi tséʼnaa bee iʼdidlaʼígi átʼéego, Diné Silı̨́įʼii doogááł.
28 Tʼáá haʼátʼíhída daaztsą́ągo sitı̨́įgi ákweʼé jeeshóóʼ áłah nilı̨́į doo.
Diné Silı̨́įʼii nídoodáłígíí (Mk. 13:24-27; Lk. 21:25-28)
29 Éí achʼįʼ nahwiiʼná bił yoołkáłígíí bighá yooską́ą́dóó bikʼijįʼ, tʼáá áko jı̨́honaaʼéí bił chahodoołhił, áádóó ooljééʼ doo adiníłdíin da doo, índa yádiłhił biyiʼdę́ę́ʼ sǫʼ nidahindéeh doo, áádóó yáʼąąshdi bee dahółdzilii dadoogał,
30 áko índa Diné Silı̨́įʼii bee bééhózinii yádiłhił biyiʼdi yidooltsééł, áadi índa nahasdzáán bikáaʼgi ałʼąą dineʼé tʼáá ałtso dadoocha, índa yádiłhił biyiʼdę́ę́ʼ Diné Silı̨́įʼii kʼos bił yildohgo áádóó bee adziil índa ayóó átʼé atsʼádiʼnílííd yił yigáałgo deizdoołtsééł.
31 Áádóó dilní ayóó íitsʼaʼgo diistsʼą́ąʼgo bidiyingo nidaalʼaʼí iidiyoołʼaał, áko tʼáá dı̨́ı̨́ʼgóó yádiłhił nidaneesʼą́ą́dę́ę́ʼ atah yiyiizláaʼii áłah ádeidoolííł.
Fig sikaadgo néitsóhígíí binahjįʼ naʼnitin (Mk. 13:28-31; Lk. 21:29-33)
32 Fig sikaadii binahjįʼ haneʼ bee akʼidiʼdootı̨́įłii nihił béédahoozįįh: jó, éí bitsʼáozʼaʼ ditʼódí yileeh áádóó índa bitʼąąʼ néitsohgo kʼadę́ę chʼínáshı̨́įgo nihił béédahózin łeh.
33 Nihí ałdóʼ díidíígíí bidahoolníiłgo danółʼı̨́įgo, Diné Silı̨́įʼii kʼad tʼáá áyídídę́ę́ʼ nihichʼéédą́ąʼjįʼ nidi bił ahoolzhiizh lá danohsingo nihił béédahózin doo.
34 Tʼáá aaníígóó ánihidishní, Díí oochíłígíí doo bił yóóʼahodoogáał da, díidí tʼáá ałtso ádaadzaago índa.
35 Yádiłhił índa nahasdzáán bił yóóʼahodoogááł, nidi shizaad tʼéiyá doo bił yóóʼahodoogáał da.
Ákwii yoołkáłígíí índa oolkiłígíí diné łaʼda doo hoł bééhózin da (Mk. 13:32-37; Lk. 17:26-30,34-36)
36 Nidi ákwii yoołkáłígíí índa oolkiłígíí diné łaʼda doo hoł bééhózin da, yáʼąąshdi diyingo nidaalʼaʼí nidi dooda, aYeʼ nidi dooda, nidi shiTaaʼ tʼéiyá bił bééhózin.
37 Áko Diné Silı̨́įʼii yígháahgo, Nóah bíyoołkááł yę́ędą́ą́ʼ áhootʼéhígi áhootʼée doo.
38 Háálá éí yoołkááł yę́ędą́ą́ʼ tʼah doo tó yiląąhgóó Nóah tsinaaʼeeł yiih yíyáajįʼ diné daʼayą́ áádóó daʼadlą́ áádóó nidaʼayeh índa ahaa dahaʼnííł nítʼééʼ,
39 áko tó dooląąłígíí doo bił béédahózingóó tó yíląąd áádóó ábiʼniiłdįįdgo índa bił béédahoozin, áko Diné Silı̨́įʼii yígháahgo tsʼídá ákóhootʼée doo.
40 Ákohgo dáʼákʼehgi diné naaki naaʼaash doo; łaʼ nídidooltééł, łaʼígíí éí tʼáá ákǫ́ǫ doo.
41 Asdzání naaki akʼáa doo; łaʼ nídidooltééł, łaʼígíí éí tʼáá ákǫ́ǫ doo.
42 Éí bąą hadaʼísídółʼı̨́ı̨́ʼ, háálá nihiBóhólníihii nídoodááł bijínígíí doo nihił béédahózin da.
43 Nidi díí nihił béédahózin, kin bee bóhólníihii tsʼídá ákohgo aniʼįįhii doogáłígíí bił bééhózingo, haʼasíid doo, áko bighan doo bitsʼą́ą́ʼ wótsid átʼéégóó íidoolííł.
44 Éí bąą nihí ałdóʼ hashtʼeʼ ádaʼdíínółzin, háálá Diné Silı̨́įʼii oolkiłígi doo nidayínóhłíi da yę́ę góneʼ doogááł.
Naalʼaʼí baʼahódlíii, doodaiiʼ naalʼaʼí doo baʼahódlíii (Lk. 12:41-48)
45 Ákoshąʼ háí baʼahódlíigo índa hóyą́ągo naalʼaʼí nilı̨́, éí binanitʼaʼí bighan hazʼą́ągi nidaakaígíí tʼáá ałtso tʼáá áajįʼ anáhwiilzhíishgo yanáʼáltsoʼ doo biniyé nibiníłtı̨́?
46 Naalʼaʼí jílíinii ákójítʼı̨́įgo hananitʼaʼí níyáago éí hakʼihojidlí.
47 Tʼáá aaníígóó ánihidishní, Hananitʼaʼí bee hólóonii tʼáá ałtso bee hóhólníihgo nihodoołtééł.
48 Nidi naalʼaʼí doo yáʼáshóonii tʼáá bijéí biyiʼídi, Shinanitʼaʼí laʼ doo hah nádáah da, didooniił,
49 áádóó yił nidaalʼaʼígíí yitaaʼałhaałgo, índa daʼadláanii yił daʼayą́ągo áádóó daʼadlą́ągo yaa nídidoodááł.
50 Éí naalʼaʼí nilíinii binanitʼaʼí yoołkáałii doo nayólíí góneʼ índa hoolzhish doo bił bééhózin góneʼ nídoodáałgo,
51 atíbidoolííł,* índa diné tʼóó ádahodilʼíinii yitah hodoołtʼeeł; áadi diné daachxa áádóó biwooʼ ahídeidiłkʼash doo.
Footnotes
^ Hooghan bikáaʼgi hóteel nítʼééʼ áádóó tłʼóóʼdóó bikáaʼjįʼ háʼáldah nítʼééʼ. Áadi diné hádaalyı̨́ı̨́h.
^ Éí doodago kótʼé, nibidiyoołgish.
