Luke 24:1-53
24 Nidi damı̨́įgo aleeh góneʼ naaniiníłką́ągo, łikání halchinii spáis wolyéii hashtʼedajiilaa yę́ę dajíjáahgo tséníʼootséeldi náájíkai, [áádóó łaʼígíí ałdóʼ].
2 Nítʼééʼ tséníʼootséelgi tsé dáádeelmázígíí nahjįʼ eelmááz lá,
3 nidi yah ajookaigo Bóhólníihii Jesus bitsʼíís chʼééh hádazhdééʼı̨́ı̨́ʼ.
4 Díí tʼahdii chʼééh baa nitsídadzikeesgo, jóʼakon, diné nidiltʼéego biʼééʼ tʼáá íiyisí bitsʼádiʼnílíidgo hwíighahgi yiizįʼ,
5 áko bikʼee tʼóó hoł dahóóyéeʼgo niʼjįʼ yaa ádadziidzaa, nítʼééʼ diné áhodííniid, Haʼátʼíishąʼ biniyé daneeznáanii bitahgi hináanii hádasídóoʼı̨́ı̨́ʼ?
6 Jesus doo kweʼé da, nidi daaztsą́ą́dę́ę́ʼ náádiidzá. Gáliliidi tʼah naagháhą́ądą́ą́ʼ yee nihił hoolneʼígíí béédaałniih,
7 shą́ą́ʼ, Diné Silı̨́įʼii diné bąąhági ádaaníiłii bílákʼeejįʼ ninádidootʼáałgo tsin ałnáoszid bikáaʼjįʼ bił iʼdoolkał, áádóó tágí jı̨́ aleeh góneʼ náádidoodááł, níi niʼ.
8 Ákohgo índa bizaad béédajoolniiʼ,
9 áádóó tséníʼootsééldóó tʼą́ą́ʼ níjíkaigo łaʼtsʼáadah yiltʼéhígíí áádóó łaʼígíí tʼáá ałtso bee bił dahojoolneʼ.
10 Jó, Mary Mágdaliin áádóó Joána áádóó Mary, James bimá, índa sáanii náádaałaʼ, díí áhoodzaaígíí daalʼaadii bee bił dahojoolneʼ,
11 nidi díí haneʼígíí tʼóó áháʼníigo yąąh tsídadeezkééz, áko doo dayoosdląąd da.
12 [Nidi Peter nízhdiiʼnaʼgo tséníʼootséélgóó jílwod, áko yaa ádziidzaago ákóneʼ jidééʼı̨́ı̨́ʼ, nítʼééʼ naʼatʼą́hí łigaii ditsʼidígíí tʼáá bízhání sinilgo jiiłtsą́, áko áhóótʼįįdígíí bikʼee tʼóó hoł ahayóigo haghangóó dah nízdiidzá.]*
Eméíyasgóó íldeeʼ (Mk. 16:12,13)
13 Tʼáá éí bijı̨́ nizhdiltʼéego Eméíyas hoolyéego kin sinilígóó jooʼash, éí Jerúsalemdóó tsostsʼidi daatsʼí tsin sitą́ ánízah,
14 jooʼashgo díí ádahóótʼįįdígíí tʼáá ałtso bee ahił hojilneʼ.
15 Ákohgo tʼahdii ahił hojilneʼgo áádóó baa níjítʼı̨́įgo, nítʼééʼ Jesus tʼáá bí hwíighahgi yiizįʼ, áádóó bił nihijíkai.
16 Nidi azhą́ jiníłʼı̨́į nidi, doo bééhodzísin da áhoʼdiilyaa.
17 Áko Jesus áhodííniid, Haʼátʼíishąʼ bee ahił hołneʼgo wohʼash, áádóó yínííł nohłı̨́?
18 Áko łaʼ, Klíyapas joolyéhígíí, hachʼįʼ haadzíiʼgo áháłní, Daʼ tʼáásh ni tʼéiyá Jerúsalemgi łahdę́ę́ʼ naagháii nílı̨́, áko díí yoołkáłígíí biyiʼ ákweʼé ádahóótʼįįdígíísh doo nił bééhózin da?
19 Áko áhodííniid, Haash dahóótʼįįd? Áádóó ábizhdííniid, Jó, Názarethdóó Jesus ábiʼdoolʼįįdígíí éí Diyin God yá halneʼii nilı̨́įgo Diyin God índa diné tʼáá ałtso binááł ayóó ádaatʼéii áyoolíiłgo áádóó bizaad ayóó átʼéego naʼiiłnáago baa nitsáhákees nítʼééʼ.
20 Aláahgo náádaʼiiłniihii índa nihinanitʼaʼí danilíinii hodiʼyoolyéełjįʼ ninádahodeezʼą́, áádóó tsin ałnáoszid bikáaʼjįʼ hoł adaʼaskaal.
21 Nidi nihí Ízrel dineʼé chʼéiidooʼniłgo bee nihił chodahooʼı̨́ı̨́ nítʼééʼ. Nidi doo tʼáá éí tʼéiyá ádahóótʼįįd da, jó, kʼad tááʼ yiskánídą́ą́ʼ díí ádahóótʼįįd.
22 Áádóó tʼah nááyówehígo asdzání łaʼ tʼáá nihí bił neiikaígíí tʼáá íiyisí abínídą́ą́ʼ tséníʼootséélgóó naaskai léiʼ, tʼóó nihił adahóółyóí,
23 háálá hatsʼíís chʼééh hádeidééʼı̨́įʼgo, tʼóó kódaaníigo nákai, Diyingo naalʼaʼí nihił ádzaago, Éí jiiná, níigo nihił hoolneʼ, dadííniid.
24 Áko tʼáá nihił naakaígíí łaʼ tséníʼootséélgóó jiníʼáázh, nítʼééʼ asdzání ádaadííniidii tʼáá aaníí ákótʼéé lá, nidi bí éí doo jiiłtsą́ą da.
25 Nítʼééʼ Jesus áhodííniid, Diné doo hóyáanii, áádóó Diyin God yá dahalneʼii yee hadahaasdzíiʼii tʼáá ałtso bijéí yee tąądee yoodląąhii nohłíinii!
26 Daʼ doósh tʼáá ákónéehee Christ díí áłtsé yikʼee tiʼhwiidoonih da, áádóó índa yee ayóó átʼéii yiih doogáał da?
27 Áádóó Mózes índa Diyin God yá dahalneʼii binaaltsoos tʼáá ałtso tʼáá dadeeztʼiʼdóó, éí tʼáá hó áhodiʼdoolníiłgi Diyin God bizaad bee akʼedaʼashchínígíí tʼáá ałtso hazhóʼó yee hoł hoolneʼ.
28 Áko kin sinilgo jideeskaíjįʼ áyídí hadziih. Nítʼééʼ tʼáá náás joogáał doogo áhozhdeeshchı̨́,
29 nidi náhojooskango áhojiní, Nihaʼałkʼee niidoołkááł, háálá hííłchʼįʼ áádóó kʼadę́ę eʼeʼaah. Áko baʼałkʼee hwiidoołkááł biniyé bił yah ajííyá.
30 Áko bił adazhʼniiyą́ąʼgo, bááh nízhdiiʼą́ągo bikʼi sozdoolzin, áádóó nijiiztiʼgo baazhnínil.
31 Nítʼééʼ tʼáá ájíłah baa ákozniizı̨́įʼgo bééhodzoosįįd, nidi tʼáá áko hoł chʼaa násdlı̨́ı̨́ʼ.
32 Áko áhizhdiʼní, Atiindę́ę́ʼ bił yiikahgo nihichʼįʼ yáłtiʼgo áádóó Diyin God bizaad bee akʼedaʼashchínígíí nihił ííshją́ą́ ííléehgo, nihiyiʼdi dooládóʼósh nihijéí dookʼą́ą́ł nahalin da nítʼééʼ?
33 Áko tʼáá ákwii oolkiłgo dashdiiʼáazhgo Jerúsalemgóó tʼą́ą́ʼ níjítʼáázh, nítʼééʼ łaʼtsʼáadahígíí índa łaʼ yił naakaígíí tʼááłáhígi áłah nilı̨́įgo bikʼízhníʼáázh,
34 áko ádahałní, Bóhólníihii tʼáá aaníí náádiidzáá lá, áádóó Sáíman yichʼįʼ yitʼíní íʼdiilyaa lá!
35 Áko atiingóó áhóótʼįįdígíí, índa bááh niyiitíihgo bééhodzoosįįdígíí ałdóʼ bee bił hojoolneʼ.
Jesus éí łaʼtsʼáadahígíí yichʼįʼ yitʼíní íʼdiilyaa (Mt. 28:16-20; Mk. 16:14-18; Jn. 20:19-23; Acts 1:6-8)
36 Áko díí tʼahdii baa yájíłtiʼgo, nítʼééʼ Jesus tʼáá bí haníiʼgi yiizįʼ [áádóó áháłní, Nihichʼįʼ hózhǫ́ǫ leʼ].
37 Nidi haʼátʼíí shı̨́ı̨́ bichʼı̨́įdii átʼı̨́ danízingo hakʼee tsídadoolyizgo bił yééʼ dahazlı̨́ı̨́ʼ.
38 Áádóó ábizhdííniid, Haʼátʼíishąʼ bikʼee nihił daayééʼ? Áádóó haʼátʼéegoshąʼ danihijéí biyiʼdi nihił naaki dahazlı̨́ı̨́ʼ?
39 Shílaʼ áádóó shikeeʼ danółʼı̨́, áko tʼáá shí áshtʼı̨́; shídadołnih, áko nihił béédahodoozįįł, háálá níłchʼi éí bitsįʼ índa bitsʼin doo hólǫ́ǫ da, nidi shí éí dashinółʼı̨́įgo shitsʼíís hólǫ́.
40 [Áádóó kózhdííniidgo hálaʼ índa hakeeʼ há deinééłʼı̨́ı̨́ʼ.]*
41 Áko doo jóodlą́ą́ʼ átʼéii yaa bił dahózhǫ́ǫgo tʼahdii yikʼee tʼóó bił adahayóigo ábizhdííniid, Daʼ kweʼéésh tʼáadoo leʼé doodı̨́įłii łaʼ nihee hólǫ́?
42 Łóóʼ bitsįʼ sitʼéego [áádóó tsésʼná bitłʼizh yił] hadaʼastsood,
43 áko nízhdiinilgo binááł jííyą́ą́ʼ.
44 Áko ábizhdííniid, Díí saadígíí éí tʼah nihił naashkai yę́ędą́ą́ʼ bee nihichʼįʼ haasdzííʼ, éí bee hazʼáanii Mózes baa deetʼáanii áádóó Diyin God yá dahalneʼii índa sin biyiʼ shí shaa dahalneʼgo yee akʼedaʼashchínígíí bidahodoolníłígíí átʼé.
45 Áko Diyin God bizaad bee akʼedaʼashchíinii yáʼátʼéehgo bikʼidazhdiʼdootı̨́įłgo hoł ííshją́ą́ áyiilaa,
46 áádóó ábizhdííniid, Jó, bee akʼeʼashchı̨́, éí Christ tiʼhwiidoonih áádóó tágí jı̨́ aleeh góneʼ daaztsą́ą́dę́ę́ʼ náádidoodááł,
47 áko házhiʼ bee naʼnitingo łahgo átʼéego tsínáhodiikeesgo bąąhági átʼéii bitsʼáʼiildééh índa á yóóʼahiditʼaahii ałʼąą dineʼé tʼáá ałtso bee bił dahaneʼ dooleełgo Jerúsalemdóó hadootʼih.
48 Díí ádahóótʼįįdígíí nihí ooʼíinii danohłı̨́.
49 Áádóó jóʼakon, shiTaaʼ yee nihoníʼáanii nihichʼįʼ bidadeeshʼaał, nidi aghánáhóóʼáádę́ę́ʼ bee adziilii bee hanihiʼdiilyaajįʼ Jerúsalem kin haalʼáhígi bibaʼ nahísóotą́ą doo.
Jesus yáʼąąshgóó dah nídiidzá (Mk. 16:19,20; Acts 1:9-11)
50 Áko Béthanii bichʼįʼgo chʼíhoníʼeezh, nítʼééʼ yadidiilniiʼgo há sodoolzin.
51 Áko hakʼijisdliʼgo dego hatsʼą́ą́ʼ dah bidiʼdiiltı̨́, [áádóó yáʼąąsh biyiʼ góde anáhóóleʼ].
52 Áko [bichʼįʼ nidahodzisáago] ayóó átʼéego hoł dahózhǫ́ǫgo Jerúsalemgóó níjíkai,
53 áádóó kin biiʼ sohodizin bił hazʼą́ą́ góneʼ tʼáá áłahjįʼ Diyin God baa dahojiniihgo nidzíiztą́.
Footnotes
^ Saad łaʼ áádóó saad naazhjaaʼ łaʼ kótʼéego daasdzohígíí [ ] bitaʼgi dabikáʼígíí éí Diyin God bizaad tʼáá ałkʼidą́ą́ʼ bee akʼedaʼashchínígíí doo tʼáá ałtso dabikáaʼ da, nidi łaʼ tʼéiyá dabikááʼ.
^ Saad łaʼ áádóó saad naazhjaaʼ łaʼ kótʼéego daasdzohígíí [ ] bitaʼgi dabikáʼígíí éí Diyin God bizaad tʼáá ałkʼidą́ą́ʼ bee akʼedaʼashchínígíí doo tʼáá ałtso dabikáaʼ da, nidi łaʼ tʼéiyá dabikááʼ.
