Luke 19:1-48
19 Jérikodi Jesus níyáago kintahgóó hadiiyá.
2 Nítʼééʼ diné łaʼ Zakíyas joolyéé léiʼ, éí aląąjįʼ tax nahalyéhígíí yiniyé sidáii jílı̨́, áádóó ajitʼı̨́ı̨́ lá.
3 Diné chilí jílı̨́įgo Jesus éí diné bił nooyéłígíí biniinaa Jesus yideestsééł chʼééh jinízin.
4 Áko alą́ąjįʼ dashdiilwodgo, tsin síkamor sikaadii bąąh hadzisʼnaʼ, háálá Jesus ákǫ́ǫ́ chʼídoogááł.
5 Áko Jesus ákwii yigáałgo dego honééłʼı̨́įʼgo áhodííniid, Zakíyas, tsxı̨́įłgo hadaninááh, háálá díí jı̨́ nighandi sédáa dooleeł.
6 Áko tsxı̨́įłgo hadajííyá, áádóó baazhníyáago bąą hoł hóózhǫǫd.
7 Diné tʼáá ałtso éidíígíí dayiiłtsą́ągo doo bił adaaníígóó Jesus yaa nídaastʼįįdgo ádadííniid, Diné bąąhági ááníiłii baʼałkʼee hwiidoołkáałgo bił yah ajííyá.
8 Nítʼééʼ Zakíyas yiizįʼgo Bóhólníihii áyidííniid, Jóʼakon, Bóhólníihii, shinaalyeʼé ałnííʼdóó badahojoobáʼíígíí bitaa deeshnih, áádóó diné łaʼ tʼáá ádzaagóó tʼáadoo leʼé bee bidaʼdéloʼii, éí dı̨́įdi ahą́ą́h nániiláago baa náhideeshʼnił.
9 Nítʼééʼ Jesus áhodííniid, Díí jı̨́ bee yisdáʼiildéehii díí hooghanígi hazlı̨́ı̨́ʼ, jó, éí ałdóʼ Éíbraham bitsʼą́ą́dóó oochíiłii łaʼ jílı̨́.
10 Háálá Diné Silı̨́įʼii éí yóóʼadahaaskaígíí haidínóotaałgo áádóó yisdánéidiyooʼniłgo yiniyé níyá.
Béeso máína yolyéhígíí neeznáá binahjįʼ haneʼ bee akʼidiʼdootı̨́įłii (Mt. 25:14-30)
11 Díidíígíí deidiiztsʼą́ąʼgo, Jerúsalemjįʼ tʼáá áyídídę́ę́ʼ joogáłígíí índa Diyin God bee bóhólníihgo bił hazʼáanii tʼáá áko yidooltsééł danízinígíí biniinaa, haneʼ bee akʼidiʼdootı̨́įłii bee bił ahozhʼniilneʼ.
12 Áko ázhdííniid, Diné ayóó átʼéii łaʼ nízaadi kéyah léiʼgóó deesháałgo áadi bee óhólníihgo bił hazʼáanii ádá shóideeshtʼeeł, áádóó índa nídeeshdááł niizı̨́ı̨́ʼ.
13 Áko tʼah doo dah diighááhgóó bá nidaalʼaʼí neeználtʼéego hágo yidííniidgo, béeso ląʼí bą́ą́h ílíinii máína* yolyéhígíí neeznáá yitaizniiʼ, áko áyidííniid, Nánísdzáajįʼ díí bee naanish ádadoohłííł.
14 Nidi hadineʼé dahojoołá, áko diné łaʼ biniyé niiʼnilgo hakééʼ dayííłʼaadgo ádaaní, Díí diné nihá hooʼáał dooleełígíí doo daniidzin da.
15 Áko nítʼééʼ bee óhólníihgo bił hazʼáanii baa deetʼą́ągo nádzáago nidaʼdziisniiʼgóó bíńdaniideeʼígíí bił bééhodoozįįł biniyé, Shá nidaalʼaʼí béeso bitaa síniiʼígíí hágo dabidohní, dííniid.
16 Áko áłtséhígíí bichʼįʼ niníyáago ábíłní, Bóhólníihii, nibéeso éí neeznáá bínániideeʼ.
17 Áko áyidííniid, Yáʼátʼéehgo naalʼaʼí nílíinii, yáʼátʼéhígi íinidzaa! Tʼįįhdígo bee naʼahoosdlíʼígíí yáʼátʼéehgo ninaanish silı̨́ı̨́ʼ, éí bąą neeznáago kin hadaasʼá bee nóhólníih doo.
18 Áádóó naaki góneʼígíí ałdóʼ níyáago ání, Bóhólníihii, nibéeso éí ashdlaʼ bínániideeʼ.
19 Áko áhodííniid, Ni ałdóʼ ashdlaʼgo kin hadaasʼá bee nóhólníih doo.
20 Łaʼígíí ałdóʼ náánádzáago ánáádooʼniid, Bóhólníihii, kǫ́ǫ́ nibéeso siʼą́, bee ádítʼoodí bił yishjashgo séłʼą́ą́ nítʼééʼ;
21 ninásdzidgo bąą, háálá diné hashkéii nílı̨́, áádóó tʼáá jííkʼe shaʼdoolyééł tʼéí nínízin índa tʼáadoo kʼidííníláii nánígish.
22 Nítʼééʼ áháłní, Tʼáá ni nizaadígíí bee naa nídéeshtʼįįł, bąąhági ááníiłgo naalʼaʼí nílíinii! Jó, diné hashkéii nishłı̨́, tʼáá jííkʼe shaʼdoolyééł tʼéí nisin, índa tʼáadoo kʼidííláii náshgishgo nił bééhózin lá.
23 Ákoshąʼ haʼátʼéego shibéeso doo béeso bá hooghan góneʼ nííníʼą́ą da, áko nánísdzáago ínáóltąʼí bił shaa náninídeeʼ doo nítʼééʼ?
24 Áko ákǫ́ǫ́ naazínígíí áyidííniid, Béeso baʼítʼánígíí bitsʼą́ą́ʼ nídoohʼaahgo neeznáá máína neijaahígíí baa nohʼaah.
25 (Nítʼééʼ ádahodííniid, Bóhólníihii, éíyeeʼ máína neeznáá bee hólǫ́!)
26 Ánihidishní, Tʼááłáʼí jinítínígo haʼátʼíhída hwee hólónígíí, biláahgo łaʼ haa náádoolyééł, nidi haʼátʼíhída hwee ádinígíí, éí tʼįįhdígo hwee hólónígíí nidi haghadoolyééł.
27 Nidi díí dashijoołáhígíí, bá hweeshʼáał dooleełgo doo deinízin daígíí, kweʼé nidahohʼéeshgo shinááł nidaałtseed.
Jesus akʼeh deesdlı̨́įʼii kʼehgo Jerúsalem góneʼ ííyá (Mt. 21:1-11; Mk. 11:1-11; Jn. 12:12-19)
28 Ákótʼéego Jesus haadzíiʼgo, Jerúsalem góde alą́ąjįʼ dah diiyá.
29 Dził Álivz hoolyéegi, Béthfajii áádóó Béthanii bichʼįʼ tʼáá áyídídę́ę́ʼ joogáałgo, hódahoołʼaahii naakigo dashdiiłʼaʼ,
30 kójíníigo, Nihílááh, náyónaanídi nihidááhjí kin sinilíjįʼ dohʼaash, ákwii tʼáá nooʼáázhgóó télii yázhí tʼah doo adiyeehígíí dahaastłʼǫ́ǫgo bikʼídoohʼash, éí kʼeʼdoohʼałgo nídoohłóós.
31 Łaʼda nanihídééłkidgo, Haʼátʼíishąʼ biniyé kʼeʼohʼad? nihiłníigo, Jó, Bóhólníihii choidoołʼįįł, bididoohniił.
32 Áko biʼdoolʼaadígíí ííʼáazhgo tʼáá ábizhdííniidígi átʼéego yikʼíníʼáázh.
33 Nítʼééʼ télii yázhí kʼeʼjiʼadgo bee bídahólníhígíí ádahałní, Haʼátʼíí biniyé télii yázhí kʼeʼohʼad?
34 Áko ájíní, Jó, Bóhólníihii choidoołʼįįł.
35 Áko Jesus baazhnílóozgo, habeeldléí éí télii yázhí bikáaʼjįʼ adadziiznilgo Jesus yikʼi dah neezdá.
36 Áádóó booyéełgo dabibeeldléí atiingóó yá dayíłkaad.
37 Áko Dził Álivz adah góyaa kʼadę́ę dashdiigháahgo, tʼóó ahayóí bikééʼ nidaakaígíí éí ádahooníiłii ayóó ádaatʼéii tʼáá ałtso dayiiłtsánígíí bąą bił dahózhǫ́ǫgo dadilwoshgo Diyin God yaa dahaniihgo yaa nídiikai,
38 áko ádaaní,
Aláahgo Naatʼáanii, Bóhólníihii bízhiʼ bee biʼdójíigo yigáłígíí bikʼihojidlíi doo!
Yáʼąąshdi hózhǫ́ǫ doo, índa aghánáhóóʼáadi niʼdeezlíid doo!
39 Áko diné yílʼáhígíí bitahdę́ę́ʼ Férisii danilíinii łaʼ ádahodííniid, Naʼnitiní, nikééʼ nidaakaígíí tʼáadoo ádadohníní, bidiní.
40 Áko haadzíiʼgo ání, Ánihidishní, Azhą́ díí dadiiłheel nidi, tsé nidi hadadidoolwosh.
Jesus éí Jerúsalem yaa yícha
41 Kin haalʼáhígíí tʼáá áyídídę́ę́ʼ yichʼįʼ yigáałgo yiyiiłtsą́ągo yaa yícha,
42 kóníigo, Dooládóʼ tsʼídá tʼáá díí jı̨́ bee achʼįʼ hózhóonii nił bééhózin leʼ laanaa nóshʼníi da! Nidi kʼad éí nitsʼąą nídeesʼı̨́ı̨́ʼ.
43 Háálá bichʼįʼ hoolzhish, éí nidaʼanaʼí łeezh ninídeidootsih índa ninídootʼihgo doo chʼóoyaʼ átʼéégóó ándoolííł,
44 áádóó niyiʼdi kéédahatʼínígíí tʼáá bił niʼjįʼ andiʼyoolghą́ą́ł, índa tsé tʼááłáʼí nidi doo ałkʼi dah siʼą́ą́góó ádeidoolíłígíí éí bił neidoołkááł, háálá Diyin God naa níyáhígíí tʼáadoo baa ákoninizı̨́įʼ da.
Kin biiʼ sohodizin nidayiiłchxǫǫhii chʼíneelkaad (Mt. 21:12-17; Mk. 11:15-19; Jn. 2:13-22)
45 Áádóó kin biiʼ sohodizin bił hazʼą́ą́ góneʼ yah ajííyáago nidaʼiiłniihígíí chʼízhneełkaadgo baa nízdiidzá,
46 kójíníigo, Jó, bee akʼeʼashchı̨́, Shikin éí kin biiʼ sohodizin átʼé. Nidi aghadaʼiiʼníiłii beʼaʼáán ádaahłaa lá.
47 Áádóó tʼáá ákwíí jı̨́ kin biiʼ sohodizin bił hazʼą́ą́ góneʼ Jesus nazhʼnitin nítʼééʼ. Nidi aláahgo náádaʼiiłniihii áádóó bee hazʼáanii yíndaʼniłtinii índa diné alááh dahideezínígíí dahodiyiilyééł chʼééh daniizı̨́ı̨́ʼ,
48 nidi ákódadooníiłgi doo bá ashja daʼaléeh da, háálá diné tʼáá ałtso tʼáá íiyisí dahwíistsʼą́ą́ʼ.
Footnotes
^ Béeso máína yolyéhígíí kʼasdą́ą́ʼ naadiin béeso bíighahgo óolyé. Tʼáá éí ałdóʼ pound yolyé.
