Job 34:1-37
34 Nááʼáłdóʼ Iiláíhu ánáádooʼniidgo ání,
2 Nihí hastóí hóyáanii danohłíinii, shizaad dayínółtsʼą́ą́ʼ;nihí nihił éédahoozinii ádíshnínígíí deísółtsʼą́ą́ʼ.
3 Hazééʼ bee ajilįhígi átʼéego ajółtsʼą́ą́ʼ bee saad hoł nibééhwiizįįh.
4 Haaʼíyeeʼ tʼáá ákwii áhátʼı̨́ nidadidiitʼááł,índa nihitahgóó yáʼátʼéehii hólónígíí nihił béédahózin doo.
5 Jó, Job ájíní, Tʼáá ákogi áníshtʼé,nidi Diyin God éí bee shá hazʼáanii nahjįʼ niidiníʼą́.
6 Tʼáá ákogi áníshtʼéhígíí doo ákótʼée da, dishníigoósh shiyoochʼíid doo?Azhą́ bee hazʼáanii doo neheshtíih da nidi, tséstíín diníshdlı̨́ı̨́ʼ.
7 Háí diné shı̨́įshąʼ Job nahojílin?Éí tó jidlánígi átʼéego nahatʼiʼ jidlą́,
8 áádóó diné doo ákwii ádaaníiłii bił nijildeeh,índa diné doo yáʼádaashóonii bił jooldah.
9 Jó, Job ájíní, Tʼáá hó Diyin God bee ádił hojílzhóonii tsʼídá tʼáadoo haa doodiłí da.
10 Éí bąą diné akʼidadiʼyootįįhii dashíísółtsʼą́ą́ʼ;Diyin God yeeʼ doo yáʼáshóonii tsʼídá doo ííléeh da,índa Aláahgo Ayóóʼábóodziilii éí doo ákwii éʼétʼéii tsʼídá doo ííléeh da.
11 Jó, diné ájooníłígíí bikʼehgo hachʼįʼ nináʼdoodlééł,áádóó ájítʼéii bikʼehgo áhoʼdoolʼįįdígíí nibééhwiizįįh.
12 Tʼáá aaníí Diyin God nilíinii tsʼídá doo yáʼáshóonii doo íidoolíił da,índa Aláahgo Ayóóʼábóodziilii éí tʼáá ákogi átʼéii tsʼídá doo łahgo ánáyoodlíił da.
13 Háísh nahasdzáán bee bóhólníihgo ábiilaa?Doodaiiʼ háísh nahasdzáán yaa áhályą́ągo ábiilaa?
14 Diyin God éí kótʼéego diné yaa tsídeezkéezgoáádóó tʼáá bí biníłchʼi índa biyol áchʼįʼ kónáyiidlaago
15 nídídzih nináneelʼą́ąjįʼ tʼáá łahjįʼ dínóonéełgodiné jílíinii łeezh nízhdoodleeł nítʼééʼ.
16 Bee akʼiʼdiitįįhii kʼad nee hólǫ́ǫgo ádíshnínígíí kǫ́ǫdí lą́ą yísíníłtsʼą́ą́ʼ;shizaad hazhóʼó yísíníłtsʼą́ą́ʼ.
17 Daʼ tʼáá ákogi átʼéii jijoołáiísh hóhólníihgo hojooʼáał doo?Aláahgo tʼáá ákogi átʼéii nilíiniísh tʼáá bá nihodííʼááł?
18 Éí aláahgo naatʼáanii nilíinii ííłní, Tʼáadoo bą́ą́h nílíní da,índa naatʼáanii danilíinii ííłní, Doo yáʼádanohshǫ́ǫ da.
19 Éí naatʼáanii dajílíinii doo aláahgo daʼjílı̨́įgo haa nitsíkees da,índa diné bahojoobáʼíii biláahgo diné ajitʼíinii doo bił jílı̨́įgo haa nitsíkees da,háálá tʼáá ádzíłtso Diyin God honaashnishii dajílı̨́.
20 Tʼáadoo hodinaʼí dazhniné.Tłʼéʼííłnihgo diné bitah dahoditłidgo abídeiłkááh.Tʼáadoo biʼdeelchídígóó diné ayóó átʼéii danilíinii ádaadįįł.
21 Diné ádajítʼéii haisííd,índa dajíkááhgóó tʼáá ałtso yiníłʼı̨́.
22 Chahałheeł índa anoonééł bichahaʼoh biiʼ diné doo ákwii ádajooníiłiitʼáá hó nídazhdidootʼı̨́įłgi tʼáá há ádin.
23 Łaʼda Diyin God bidááhdóó haa náhódóotʼįįłígííéí Diyin God doo hachʼįʼ ííshjání áyósin da.
24 Diyin God éí diné ayóó ádaatʼéii tʼáadoo baa hwiinítʼíní niyiiłchxǫǫh,áádóó náánáłaʼ yitsáskʼehjįʼ ayiinííł.
25 Éí bąą honaanish danilíinii bił bééhózingo biniinaatʼáá łaʼ óotłʼééʼ hakʼeh hididleehgo áhoołdįįł.
26 Diné dabinááł diné doo yáʼáshóonii ádajitʼéego atííłʼı̨́,
27 háálá bitsʼá dziiskai,índa bihonítʼiʼii doo baa nitsídadzikees da,
28 áádóó honiinaa diné badahojoobáʼíii Diyin God yichʼįʼ nídaʼookąąhgobichʼįʼ nidahwiiʼnánígíí bisodizin yá yidiiztsʼą́ą́ʼ.
29 Dineʼé tʼáá kéédahatʼı̨́ı̨́ nítʼééʼ,doodaiiʼ diné tʼáá łah diltʼéhígo yichʼįʼ áhodéeszéeʼgo háísh bikʼijįʼ hadoodzih?Biniiʼjįʼ néideesʼı̨́įʼgo háísh bidááhdóó nidoogááł?
30 Áko diné tʼáá kééhatʼı̨́ı̨́ nítʼééʼ doo yiyaʼiidooloh da biniyédiné doo Diyin God kʼehgo ádaatʼéii doo naatʼáanii ábiʼdilnéeh da.
31 Tʼáá aaníí Diyin God kóbizhdííniidgoéí tʼáá áko, Atíshiʼdiilyaa; doo ádił nááʼdeesih da.
32 Doo baa ákonisinígíí bínashiníłtin.Doo ákwii áátʼįįdgóogo éí doo ánáádeeshʼníił da.
33 Éí doo ninizı̨́ı̨́ʼgóogo nínízinígíísh bikʼé nichʼįʼ niʼdoolééł?Shí éí doo ná nidideeshʼáał da; tsʼídá yeeʼ tʼáá ni nididííʼááł;éí bąą nił bééhózinígíí baa hodíílnih.
34 Diné akʼidiʼyiitįįh bee dahólóoniiínda diné dahóyáanii dashidiiztsʼą́ąʼii ádashididooniił.
35 Job tʼáadoo bił bééhózinii yaa yáłtiʼáádóó bizaad hódzą́ bąąh ádin.
36 Diné doo yáʼáshóonii yáłtiʼígíí nahalingo saad nináyiiʼníłígíí bąąJob tʼáá nabíhodiʼnitaahgo daotsaʼ laanaa nisin.
37 Naalteehígíí yee ádił asiihígíí yíyiinííł;nihitahdóó ahíkadgo Diyin God yikʼijįʼ nilı̨́įgo hayánídíníltih.
