Job 2:1-13
2 Áádóó náánáłah diyingo nidaalʼaʼí danilíinii Bóhólníihii yichʼįʼ ádéédahodoolzįįł biniyé náánákai bijı̨́ı̨́ góneʼ Séítan ałdóʼ Bóhólníihii yidááhdóó ádééhodoolzįįł yiniyé náánádzá.
2 Áko Bóhólníihii éí Séítan áyidííniid, Háádę́ęʼshąʼ yínááł? Áádóó Séítan éí Bóhólníihii ánéidooʼniidgo ání, Nahasdzáán bikááʼgóó táhodishłeeh áádóó nahasdzáán bikááʼgóó háádiishdááh.
3 Áko Bóhólníihii éí Séítan áyidííniid, Shinaalʼaʼí Job wolyéiísh baa ákoninizı̨́ı̨́ʼ? Nahasdzáán bikááʼgóó tʼáadoo łaʼ ákójítʼéhí da; éí diné tʼáadoo bee bikʼíhótʼahíii nilı̨́ áádóó tʼáá ákogi ááníiłii nilı̨́ índa Diyin God yidósin áádóó bąąhági átʼéii yá doolnihii nilı̨́. Azhą́ tʼáadoo biniinaanígóó atídeeshłííł biniyé áajįʼ dashíníyił nidi, tʼahdii dziilí bee doo binaʼadloʼgóó baʼahódlíigo hiná.
4 Áádóó Séítan éí Bóhólníihii áyidííniidgo ání, Akágí biniyégo akágí biniyé dooleeł; tʼáá aaníí diné hinánígíí hináa doo biniyé bee hólónígíí tʼáá ałtso ádíchʼą́ą́h ninéididooʼááł.
5 Nidi kʼad, kʼídinílchíidgo bitsʼin áádóó bitsįʼ bidinílchíidgo tídílééh, áko tʼáá niniiʼjįʼ níídóodzih.
6 Áádóó Bóhólníihii éí Séítan áyidííniid, Jó, nílááháneeʼ tídílééh, tʼáá hazhóʼó beʼiinaʼ tʼéí doo haada díílíił da.
7 Áko Bóhólníihii bitsʼą́ąjįʼ Séítan dah hodiileʼgo Job bikétłʼááhdóó bitsiitʼáajįʼ chʼozh yiidííłnaʼ.
8 Áádóó Job éí hashtłʼish łeetsʼaaʼ neheestǫʼígíí yee ádígaas doo biniyé néidiiʼą́ągo łeeschʼiihtahdi neezdá.
9 Áko beʼasdzą́ą́ ábidííniid, Tʼahdiísh doo shinaʼadloʼgóó yisháał dooleeł nínízin? Doo haniih Diyin God yínídziihgo dantsxaah da.
10 Áádóó Job áhodííniid, Asdzání doo ádahalyánígíí nahalingo laʼ yáníłtiʼ. Haʼátʼíí lá diní? Daʼ tʼáásh aaníí Diyin God éí yáʼádaatʼéehii nihaa yiinííł índa doo yáʼádaatʼéehii ałdóʼ doo nihikʼijįʼ kwííłʼı̨́į da dooleeł? Díí tʼáá ałtso kódahóótʼįįd lá nidi, Job tʼáadoo ádił asiihgo haadzíiʼ da.
11 Ákohgo Job bikʼisóó táltʼéego éí doo yáʼáshóonii tʼáá átʼé Job bikʼi hooleʼígíí dayííniiʼgo tʼááłáʼí nítínígo kéédahatʼı̨́ı̨́dę́ę́ʼ haa yíkai: Élifaz wolyéii Tííman kin haalʼáádę́ę́ʼ áádóó Shúwah dineʼé Bíldad wolyéii índa Zófar wolyéii Néíyama hoolyéédę́ę́ʼ éí díí ahadaʼdeestʼą́ągo, Hakʼédí daniidlı̨́į doo áádóó hadah hoʼayiilniih doo, daaníigo biniyé haa yíkai.
12 Áko tʼah nízaadę́ę́ʼ hachʼįʼ yikahgo, doo hwéédahósingóó yéego hadaazhchago biʼééʼ ákʼindayooldláád, áádóó łeezh dibahí dego adayiighaasgo bitsiiʼkáaʼjįʼ anáhindééh.
13 Tʼóó hoł nidzíiztą́ągo tʼáadoo hachʼįʼ hadadzidziihí tsostsʼid jı̨́ áádóó tsostsʼid tłʼééʼ azlı̨́ı̨́ʼ, háálá tsʼídá ayóó átʼéego tʼóó hąąh yínínígi átʼéego tiʼhojiyoonííh.
