Jeremiah 7:1-34
7 Bóhólníihii éí Jeremáíyah yichʼįʼ hanáánáádzíiʼgo kóní,
2 Bóhólníihii bikin biiʼ sohodizin bidáńʼdítı̨́įhgi yiizįįhgo díí saad baa hólneʼ, Júdah dineʼé nohłíinii, nidahodoołaał biniyé díí dáńʼdaʼditı̨́ı̨́hdę́ę́ʼ yah anídaahkahígíí tʼáá ánółtso Bóhólníihii áníinii deísółtsʼą́ą́ʼ.
3 Ízrel dineʼé biDiyin God tʼáá ałtsoní bee Bóhólníihii kóní, Dahinohnánígíí índa baa nidaohkaígíí hashtʼéédaahdlééh, áko índa kweʼé kééhotʼı̨́į dooleełgo bee nihadiʼdeeshʼááł.
4 Bóhólníihii bikin biiʼ sohodizin, Bóhólníihii bikin biiʼ sohodizin, díí lą́ą Bóhólníihii bikin biiʼ sohodizin átʼé ni, daaníigo woochʼííd saad tʼáadoo baa dadzíínóhłíhí.
5 Dahinohnánígíí índa baa nidaahkaígíí tʼáá aaníí hashtʼéédaahdléehgo, áádóó diné índa yił kééhatʼíinii bitaʼgi tʼáá aaníí doo haada yitʼéii bá ádaʼołʼı̨́įgo
6 áádóó doo Ízrel dineʼé nilíinii áádóó áłchíní bizhéʼé ádaadinii áádóó asdzání bąąh ádahasdįįdii doo bide ádahwíínóhsingóó áádóó kweʼé diné doo ádihodiiltʼiʼii doo nidaołtseedgo bidił dadoonahgóogo índa diyin dabidiʼníinii danihidoołchǫǫłii doo bichʼįʼ dah nídoohjah ládą́ą́ʼ,
7 áadi índa danihizhéʼé yę́ę éí kéyah hoolʼáádę́ę́ʼ ahóyéelʼáágóó baa diníʼánígi kééhohtʼı̨́į dooleełgo nihaa dideeshʼááł.
8 Tʼáadoo nídoodleełii woochʼííd saad baa dadzíínóhłí, jóʼakon.
9 Aniʼı̨́ı̨́ʼ áádóó diné naatseed índa adilyéésh baa naahkai doo, índa tʼóó áhodiʼı̨́įgo ádee haʼdiidziih áádóó Béíyal bichʼįʼ łikání halchinii nááhániihiísh ádaałʼı̨́į doo, índa diyin dabidiʼníinii doo béédahonohsiniísh bikʼeh wohkah doo,
10 áko díí kin éí shízhiʼ bee wójíigo siʼánígíí biiʼ yah ookaigo, Yisdánihiʼdooʼnil, dadohníigoósh shidááhdóó nisoozı̨́į doo? Ákondi díí doo daaldinii tʼáá ałtso baa deínóhkááh.
11 Díí kin éí shízhiʼ bee wójíigo siʼánígíí diné aghadaʼiiʼníiłiísh baʼáán silı̨́įʼgo baa nitsídaahkees? Shoo, tʼáá shí nidi yiiłtsą́, ní Bóhólníihii.
12 Nidi tsʼídá átséedi Sháíloh kin haalʼáadi* shá hazʼą́ągo shízhiʼ bee hoʼdójíigo áshłaa yę́ęgóó dínááh, áko áadi shidineʼé doo yáʼáshónígi ádaatʼínígíí biniinaa atéshłaaígíí níníłʼı̨́.
13 Áko kʼad díí tʼáá ałtso baa nisíníyá, ní Bóhólníihii, áádóó tʼah abíínídą́ą́ʼ náádiishʼnahgo nichʼįʼ yéíłtiʼ, nidi tʼáadoo disínítsʼą́ąʼ da, índa nichʼįʼ haasdzíiʼ nidi, tʼáadoo shichʼįʼ ééhosínísįįd da;
14 éí bąą Sháílohdi atídahooshłaa yę́ęgi átʼéego díí kin shízhiʼ bee wójíigo siʼánígíí baa dadzíínóhłíigo índa nihí áádóó danihizhéʼé yę́ę kweʼé hazʼą́ baa diníʼánígíí tʼáá bił atínihideeshłííł.
15 Danihikʼisóó danilíinii Íífreiyim dineʼé tʼáá ałtso yóóʼanííłkaad yę́ęgi átʼéego nihí ałdóʼ yóóʼanihidínéeshkałgo doo náádanihiideestséeł da.
Diyin God éí edaʼalyaii yichʼįʼ nidahałáhígíí yichʼįʼ báhóóchįįd
16 Éí bąą díí dineʼé tʼáadoo bá sodílziní. Tʼáadoo náʼiinikąąhgo bá sodílziní. Tʼáadoo nidi bá naʼakʼíyáníłtiʼí, háálá doo nidideestsʼı̨́įł da.
17 Júdah kéyahgi kin hadaasʼáágóó índa Jerúsalem kin haalʼáagi daʼnítiingóó yaa nidaakaígíísh doo yíníʼı̨́į da?
18 Áłchíní éí chizh nínádayiidlah áádóó azhéʼé danilíinii déédeidiłjahgo asdzání éí táádaʼooʼnihgo wótʼáahdi asdzą́ą́ naatʼááh bidiʼníinii* yá bááh nímazí áńdayiilʼįįh, índa shádahodoołchįįł biniyé diyin dabidiʼníinii yichʼįʼ yanáadziʼgo nááhániihii yáádayiiziʼgo náádayiiłniih.
19 Daʼ shádahałchįįhísh? ní Bóhólníihii. Tʼáá bí yee atíńdaʼdilnéehgo ádił nídahałąąhgo baa yáńdahasįįh.
20 Éí bąą Bóhólníihii Diyin God kóní, Shoo, díí hazʼánígíí índa diné kéédahatʼíinii áádóó naaldlooshii índa tsin deílʼáhígíí áádóó dáʼákʼehgóó nidantʼąʼii bichʼįʼ hashké dínéesdzįįłgo tʼóó báhádzidgo shibee atíʼélʼíinii bikʼi yeideeshnił, áko hodidooltłiłgo doo dínóoltsis da.
Júdah nidaalteehígíí bąą atíbidiʼdoolnííł
21 Ízrel dineʼé biDiyin God, tʼáá ałtsoní bee Bóhólníihii kóní, Didlidgo náádahołniihígíí índa náádahołniihígíí bóóltąʼgo daołghał.*
22 Danihizhéʼé yę́ę Ííjip kéyahdę́ę́ʼ chʼíníʼeezh yę́ędą́ą́ʼ éí didlidgo náádahaniihii, doodaiiʼ náádahaniihii tʼáadoo bee bichʼįʼ yéíłtiʼ da índa tʼáadoo bee bichʼįʼ hahásdzíiʼ da,
23 nidi díí bee bichʼįʼ haasdzííʼ: ádíshníinii bikʼeh dahonołʼı̨́, áko nihiDiyin God nishłı̨́į doo áádóó nihí éí shidineʼé danohłı̨́į doo. Áko nihá yáʼátʼéeh dooleeł biniyé bee nihichʼįʼ hahasdziihígíí éí tʼáá ałtso bikʼeh dahinohná.
24 Nidi tʼáadoo shikʼeh dahóółʼįįd da índa tʼáadoo dashidiiztsʼą́ąʼ da, nidi tʼáá bí ádaaníinii índa bijéí biyiʼdę́ę́ʼ doo yáʼátʼéehii bił ádaatʼíinii yikʼehgo deíkai, áko tʼáadoo náás deeskai da, nidi tʼą́ą́ʼ anáákai.
25 Danihizhéʼé yę́ę Ííjip kéyahdę́ę́ʼ chʼínáʼná yę́ędą́ą́ʼ áádóó díí jı̨́įjįʼ shá nidaalʼaʼí, shá dahalneʼii tʼah abínídą́ą́ʼ náádiishʼnahgo tʼáá ákwíí jı̨́ nihichʼįʼ ałnáádaashʼaahgo shá nidaasʼaʼ.
26 Nidi tʼáadoo dashidiiztsʼą́ąʼ da áádóó daʼdidootsʼı̨́ı̨́ł biniyé tʼáadoo shichʼįʼ dah dadíníitʼą́ą da índa doo nibídaʼdidzilgóó dabizhéʼé yę́ę yiláahgo tʼóó tséʼédinda ádáátʼįįd.
27 Éí bąą díí saad tʼáá ałtso bee bichʼįʼ hahidíídzih, nidi doo dandidootsʼı̨́įł da, áádóó ałdóʼ yéego bíká ádíníi nidi, doo nichʼįʼ éédahodoosįįł da.
28 Áko ádabididííniił, Díí dineʼé biDiyin God áníinii doo yikʼeh dahółʼı̨́į da índa kʼéhézdon ninábidiʼdooʼniłígíí doo deinízin da. Tʼáá aaníinii ásdįįd, áádóó doo yee yádaałtiʼgóó ádabiʼdiilyaa.
29 Jerúsalem nílíinii, nitsiiʼ kʼínígéeshgo yóóʼaniłkaad. Honoojítahgi wódahgo nahazʼánígóó yínííł naniná, háálá Bóhólníihii tʼóó báhádzidgo yee atíʼéłʼíinii oochíiłii atííléhígíí doo yiniizı̨́ı̨́ʼgóó yóóʼiidííʼą́.
30 Háálá Júdah dineʼé shinááł doo yáʼátʼéhígi ádáátʼįįd, ní Bóhólníihii. Kin éí shízhiʼ bee wójíii biyiʼ góneʼ bee tʼóó baaʼih dooleełii yiniyé doo daaldinii ákóneʼ nideiznil.
31 Áádóó dabiyeʼké índa dabitsiʼké deidiłid dooleeł biniyé Hínam biyeʼ bikéyah yíldzis góyaa Tófet hoolyéegi ninádahałaah doo biniyé wódah nahazʼą́ągo ádayiilaa. Éí kódadoohnííł, doo dishníigo bee bichʼįʼ haasdzíiʼ da, doo nidi shijéí yiih hóóleʼ da.
32 Éí bąą bichʼįʼ yoołkááł: Tófet doo nááhoolyée da doo, Hínam biyeʼ bikéyah yíldzis doo haʼníi da doo, nidi yíldzisgi naʼatseed hoolyée doo, áko Tófetgi yóóʼádaʼalneʼ doo, háálá łahgóó doo nááhástʼą́ą da, ní Bóhólníihii.
33 Áádóó tsídii índa naaldlooshii díí dineʼé bitsʼíís deiyą́ą doo, índa doo łaʼ tsíbididoołyisgo yóóʼabidínóołkał da.
34 Ákohgo Júdah kéyahgi kin hadaasʼáádóó índa Jerúsalem kin haalʼáagi kintaa daʼaztiindóó ił náhooshǫǫł iinééʼ, ił hózhǫ́ǫ́jí iinééʼ, iiyehii biinééʼ índa báʼiigehii biinééʼ doo dadiitsʼaʼgóó ádeeshłííł, háálá éí kéyahgi doo naagháhí da hodooleeł.
Footnotes
^ Íídą́ą́ʼ tsitsʼaaʼ bee ahaʼdeetʼáanii ákwii siʼą́.
^ Wótʼáahdi asdzą́ą́ naatʼááh bidiʼníinii éí sáanii ádaʼdíʼnooltsąąłgo yíká análwoʼii nilı̨́.
^ Mózes bibee hazʼáanii bikʼehgo didlidgo náádahaniihii doo yidą́ą da. Lev. 1:1-9; 7:1-7.
