Jeremiah 5:1-31
5 Jerúsalem kin haalʼáagi daʼnítiingóó háádiilwoʼgo nanighal, áádóó haʼísííd. Tʼáá bíniʼ nahazʼą́ą́góó nanítʼáago ákǫ́ǫ́ daatsʼí diné łaʼ doo binaʼadloʼgóó hináanii índa tʼáá aaníinii háidéezʼı̨́įʼii łaʼ naagháago bikʼídíínááł, áko doo ákǫ́ǫ́ ájíítʼįįdii há yóóʼadideeshʼááł.
2 Azhą́, Bóhólníihii hiná, daaníi nidi, tʼóó ádaaníigo ádaaní. Tsʼídá doo tʼáá aaníí ádee hadaasdzííʼgóó ádaaní.
3 Tʼáá aaníinii éí há díníʼı̨́ı̨́ʼ, Bóhólníihii nílíinii. Naa abídziyíníłhaal nidi, tʼáadoo yaa ákodaniizı̨́įʼ da. Atídeinilaa nidi, hashtʼeʼdabidiʼdoolníłígíí doo deinízin da. Biniiʼ tsé nitłʼizígíí bilááh átʼéego dayííłtłʼis. Łahgo átʼéego tsíńdadookos yę́ę nidi, doo deinízin da.
4 Éí bąą ádííniid, Tʼáá aaníí, díí diné doo nidaneestą́ąʼ da, índa doo ádahalyą́ą da, háálá Bóhólníihii bikʼehgo áhootʼéii índa biDiyin God bibikʼehgo hoogáałii doo bił béédahózin da.
5 Diné agháhideezíinii baa deesháałgo bichʼįʼ hadeesdzih, háálá éí Bóhólníihii bikʼehgo áhootʼéii índa biDiyin God bibikʼehgo hoogáałii bił béédahózin nítʼééʼ. Nidi díí ałdóʼ tʼáá ahąąh azéédéetání kʼídeiztiʼ, áádóó bee bidaʼastłʼóonii dayiizhnizh.
6 Éí bąą náshdóítsoh bitsiijįʼ ditłʼooígíí hodíłchʼildę́ę́ʼ naagháii nahodoołtsił. Halgaidę́ę́ʼ mąʼiitsoh łaʼ áhodoołdįįł. Náshdóítsoh łikizhígíí éí łaʼ hakin haalʼáhígíí yikʼi déezʼı̨́įʼ doo. Tʼááłáʼí jinítínígo chʼéédajikahígíí nidahoʼdiildlaad doo, háálá tʼóó ahayóidi bee hazʼáanii kʼídajiiztiʼ áádóó tʼóó tséʼédinda tʼą́ą́ʼ anáhizhndééh.
7 Haʼátʼíísh biniinaa ná kʼééʼdeeshchxǫǫł? Áko naʼáłchíní yóóʼadashideezʼą́, áádóó diyin dabidiʼníinii yee ádee hadadeesdzííʼ. Hwiih daazlı̨́įʼjįʼ baʼiistsóód nítʼéeʼgo daʼdíílá, áádóó dah naazhjaaʼgo ałjiłnii bighan naaznilgóó tádadookai.
8 Tʼáá ákwíí bíní tʼááłáʼí nítínígo łı̨́ı̨́ʼ bá ninájíłjoł áádóó łı̨́ı̨́ʼ bá nináʼjíjihígi ádaatʼéé nítʼééʼ. Áko tʼáá ákwíí bíní tʼááłáʼí nítínígo łı̨́ı̨́ʼ ání nahalingo yił kéédahatʼíinii beʼasdzą́ą́ yichʼįʼ ádaaníí nítʼééʼ.
9 Díí kódajíítʼįįdígíí biniinaa tsʼídá atídahodeeshłííł. Dineʼé kótʼéii shiiʼ sizíinii tʼáá aaníí kʼééhodidoodlííł, ní Bóhólníihii.
10 Chʼil naʼatłʼoʼii yílʼáhí góde hasohnéehgo atídaohłééh, nidi doo ałtso atídadoohłíił da. Bitsʼáozʼaʼ bitsʼą́ą́ʼ nahjįʼ kódaołeʼ, háálá éí doo Bóhólníihii bí da.
11 Jó, Ízrel dineʼé índa Júdah dineʼé tʼáá íiyisí doo bazhdíʼnóodlíʼígi ádashííłʼįįd, ní Bóhólníihii.
12 Bóhólníihii tʼáá ádzaagóó yaa nidahasneʼgo ádadííniid, Tʼáadoo ánihidoolíłí da, doo yáʼátʼéehii doo nihikʼi hwiidooleeł da, áádóó diltłish doo deidiiltséeł da índa doo dahodidoochįįł da.
13 Náás áhodooníiłii yaa dahalneʼii dajílíinii tʼáadoo biniyéhígóó dahojilneʼ, índa Diyin God bizaad hwiiʼ ádaadin, áko éí tʼáá hó ákónídahodidoolnííł.
14 Éí bąą tʼáá ałtsoní bee Bóhólníihii Diyin God nilíinii kóní, Díí saad bee yáníłtiʼígíí biniinaa díí dineʼé chizhgi átʼéego áhodeeshłííł, áko shizaad nizééʼ góneʼ dideeshtłiłgo ahodidoołkʼą́ą́ł, jóʼakon.
15 Shoo, Ízrel dineʼé nohłíinii, doo shónízáádę́ę́ʼ náánáłaʼ dineʼé nihikʼijįʼ bidideeshchił, ní Bóhólníihii. Éí tʼáá ałkʼidą́ą́ʼ dineʼé nilı̨́įgo náás yikah; éí bizaad doo dadoohtsʼaʼ da índa yádaałtiʼgo doo bikʼidaʼdoohtįįh da.
16 Dabikʼaayééł éí jishchááʼ ąą áhootʼéhígíí nidahalin. Tʼáá ałtso naʼabaahjí ayóó átʼéego dayiichįįh.
17 Dáʼákʼehgóó nínáníłtʼı̨́įhii deidooyı̨́ı̨́ł; niyeʼké índa nitsiʼké deidooldił. Nidibé deílʼáii índa nibéégashii deílʼáii deidooldił. Nichʼil naʼatłʼoʼii deílʼáii índa fig deílʼáii yaa nahodidookah. Nikin hadaasʼáago binídaʼaztʼiʼgo baa dadzíínílíii diltłish yee ádeidoołdįįł.
18 Azhą́ ákótʼée nidi, éí yoołkáałdi doo ałtso ánihideeshdįįł da, ní Bóhólníihii.
19 Áko nidineʼé, Haʼátʼíí lá biniyé Bóhólníihii nihiDiyin God díí tʼáá ałtso yee kónihííłʼįįd lá, daniłníigo kóbidiníi dooleeł, Nihikéyahdi yóóʼadashidooʼą́ągo diyin dabidiʼníinii bichʼįʼ nidahohłáá nítʼééʼ; tʼáá ákótʼéego náánáłahdi doo nihikéyahdi diné doo béédahonohsinii bá nidaołʼaʼ doo.
20 Jéíkab dineʼé díí bee bił hólneʼ, áádóó Júdah kéyahgi baa nahólneʼ kódíníigo,
21 Binááʼ dahólǫ́ǫ nidi, doo daʼooʼíinii, bijaaʼ dahólǫ́ǫ nidi, doo dadiitsʼaʼii, doo akʼidaʼdiitįįhgóó doo ádahalyáanii dineʼé díí dadoohtsʼı̨́ı̨́h.
22 Doósh dashidíínóhsin da índa shidááhdóó doósh nidanihiiłnáa da? ní Bóhólníihii. Jó, bee nihoníʼą́ągo hoolʼáágóó tó doo bilááhgóó dínóolʼąął da biniyé tónteel biniitʼaa dahidíyı̨́į dooleełii séí ákwii yílkʼidgo áshłaa. Azhą́ tónteel bíígháán náádadiidáahgo deílkʼooł nidi, doo bilááhgóó adahaalkʼooł da. Azhą́ ádá náhálchįįh nidi, doo bilááhgóó iinéeh da.
23 Nidi díí dineʼé tʼáá áłahjįʼ dabijéí yee doo nabídaʼdidzilgóó shichʼįʼ naasteeʼ. Łahjigo dah dahidiikaigo shitsʼáhaaskai.
24 Aakʼeego nihee náhodiłtı̨́įhgo índa dąągo nihee náhodiłtı̨́įhgo baa náhwiilzhíishgo nihee nahałtingo ánáyoodlíiłii áádóó daʼagizhgo díkwíidida damı̨́įgo adooleełgo yee nihoníʼą́ągo nihá yaa áhályáanii Bóhólníihii nihiDiyin God haaʼíyeeʼ bichʼįʼ nidahwiidláa dooleeł, dabijéí biyiʼdę́ę́ʼ doo daaníi da.
25 Doo ákwii ádaotʼįįdígíí díí nihitsʼádeideezʼą́, áádóó ádił nidaʼayoosíhígíí éí yáʼádaatʼéehii nihitsʼą́ąjįʼ áyósin.
26 Háálá shidineʼé bitahgóó diné doo yáʼádaashóonii hólǫ́; diné łoh niíʼaah nahalingo yaa héeshjéeʼ łeh. Łoh nideiʼáahgo éí yee diné yił dahidideeł.
27 Tsídii bighan góneʼ tsídii hadeezbinígi átʼéego dabighangóó naʼadloʼ hadadeezbin. Éí bąą diné baa yáhásinii daazlı̨́ı̨́ʼ, índa daʼastʼįįd.
28 Nidaneelkʼaiigo bikʼi nidazdiłtooł. Diné doo yáʼádaashóonii biláahgo ádił nidaʼiisííh. Áłchíní bizhéʼé ádaadinii doo yaa náʼádahodíltʼı̨́ı̨́góó tʼáá bí tʼéiyá daʼítʼįįh. Hojoobaʼ nahasʼáanii bee bá nahazʼánígíí doo yaa náʼádahodíltʼı̨́į da.
29 Díí kódajíítʼįįdígíí biniinaa tsʼídá atídahodeeshłííł. Dineʼé kótʼéii shiiʼ sizíinii tʼáá aaníí kʼééhodidoodlííł, ní Bóhólníihii.
30 Kéyahgi tʼóó bikʼee ayóogo tʼóó baaʼihii baa naʼasdeeʼ.
31 Náás áhodooníiłii yaa halneʼí tʼáá ádzaagóó dahoolneʼ. Náádaʼiiłniihii tʼáá bí ádeinízinígíí bikʼehgo nidantʼáá nítʼééʼ. Shidineʼé kótʼéhígíí ayóóʼádayóʼní. Nidi nihoníyáadishąʼ haa dadohnííł?
