Jeremiah 48:1-47
48 Ízrel dineʼé biDiyin God tʼáá ałtsoní bee Bóhólníihii éí Móʼab dineʼé yikʼijįʼ haadzíiʼgo kóní, Nííbo kin haalʼáii doo hojoobaʼ ájíníi da! Niʼdoolchxǫʼ Kíriyathéíyim tʼóó baa yáhásinígi ábiʼdiilyaago bidisʼnááh; Mísgab kin haalʼá éí tʼóó baa yáhásinígi ábiʼdiilyaago dahodeeshzhago áhoolyaa.
2 Móʼab dineʼé doo baa nááháʼniih da doo, Héshban kin haalʼáagi doo yáʼáshóonii yee yindahazgiz; sołtįʼ, dineʼé doo náádajídlı̨́ı̨́góó ádahodiilnííł. Nihí ałdóʼ, diné tsihaohkaii nohłíinii, ánihidiʼdooldįįł; diltłish nanihidínóołchééł.
3 Ayóó átʼéego atídoolníiłgo hodoolchǫǫłgo Horanéíyimdę́ę́ʼ chaał hahóóʼáago hodiitsʼaʼ.
4 Móʼab dineʼé atílyaa; haʼáłchíní yázhí daacha áádóó nitséédaaltłiʼgo diistsʼą́ą́ʼ.
5 Lóhith kin haalʼáágóó niinah yikahgo doo ádahodiilzééhgóó daachago deíkáah doo; Horanéíyim hoolyéé góyaa abiʼdisdįįdii tʼáá íiyisí yaa daachaaígíí éí anaʼí deidiiztsʼą́ą́ʼ.
6 Dah dadinóohchééh; yisdáʼádóhʼníiłgo honoojíidi kʼaiʼ łichííʼ ííʼáhígíí nidahonohłin leʼ.
7 Baa nidasoohkaígíí índa nihiyódí baa dadzíínóhłíhígíí bąą nihí ałdóʼ nihidiʼdoolnééł; Kíímash diyin bidiʼníinii éí bichʼįʼ náádaʼiiłniihii áádóó binanitʼaʼí danilíinii tʼáá bił doolnééł.
8 Niʼiiłchxǫǫhii éí kin hadaasʼáii tʼáá átʼé yaatįįh doogáałgo kin hadaasʼáii doo łaʼ yisdádooʼnił da; Bóhólníihii tʼáá haadzííʼ yę́ęgi átʼéego honítsʼaaʼ yę́ęgóó hodoołchǫǫł áádóó honíteel yę́ęgóó dahodeeshzhago ádahodoolííł.
9 Móʼab bitʼaʼ áhóhłééh, áko yóóʼadootʼa, háálá kin hadaasʼáii naaʼadahaaskaadgo ákwii tʼáadoo kééhatʼíní da doo.
10 Honaʼadloʼgo Bóhólníihii binaanish baa nijigháii éí hóyéeʼgo há haʼoodzííʼ; hadiltłish bee hweʼanaʼí bidił tʼáadoo jideesasgóó tʼáadoo nidi dziisxíinii éí Bóhólníihii hóyéeʼgo há haadzííʼ.
11 Móʼab éí tʼáá tsíłkéí nilı̨́ı̨́dą́ą́ʼ tʼóó ałkʼi dahisłáago hoolzhiizh; tʼáá hashtʼedíítʼeʼ nítʼééʼ tʼáadoo nahaasghan da, índa tʼáadoo yisnááhgóó naayáa da; éí bąą tʼahdii tʼáá ákóhálniih, tʼahdii tʼáá ákóhálchin.
12 Bóhólníihii kóní, Éí bąą tóshjeeh nídeidiyeinilígíí bichʼįʼ deeshʼaałígíí bichʼįʼ yoołkááł, jóʼakon; éí naaʼadahodoołmasgo hatóshjeeh ałtso yadeidiyooniłgo nideidoołtsił.
13 Ízrel dineʼé éí Béthel kin haalʼá yaa dzólíii yaa yániizı̨́ʼígi átʼéego Móʼab dineʼé éí Kíímash diyin bidiʼníinii yaa yádínóozįįł.
14 Haash yitʼéego, Diné dahayóii anaaʼ yiniyé hashtʼedadiidzaii daniidlı̨́, dadohní?
15 Móʼab kéyahgi hóóchxǫʼgo bikin hadaasʼáádóó nahjįʼ hahaaskai; hatsíłkéí bitah haasdláaʼii nidadootsił góyaa adahaaskai, ní tʼáá ałtsoní bee Bóhólníihii Aláahgo Naatʼáanii nilíinii.
16 Móʼab dineʼé ałtso atídoolníłígíí kʼadę́ę baa hoolzhíísh; hachʼįʼ nahodiyoʼnałígíí tsı̨́įłgo bichʼįʼ hoolzhish.
17 Binaagóó kéédahohtʼínígíí baa yínííł danohłı̨́. Tʼáá ánółtso hwéédahonohsinígíí, Dooládóʼ gish bidziil yę́ę índa tsihał ayóó ánoolnin yę́ę kʼéʼéltǫʼ da! dadohní.
18 Achʼéʼé nílíinii Dáíbangi kééhótʼíinii, naa haʼniih yę́ędóó hadanináahgo dibááʼ nílı̨́įgo sínídá; Móʼab kéyahgi hóółchǫʼígíí níyáago nikʼiilwodgo bee dandziil yę́ęgóó atídayiilaa.
19 Aróʼer kin shijaaʼdi kééhótʼíinii, atiin bąąhdóó sínízı̨́įgo haʼísíidgo diné noochéełii índa asdzání yisdágháahii, Haa hóótʼįįd, diníigo nidabídíłkid.
20 Móʼab dahóółchxǫʼgo tʼóó baa yáhásinígi ábiʼdiilyaa; dílwoshgo nicha. Móʼab hóóchxǫʼ, diníigo tooh Árnandi baa hólneʼ.
21 Bee atéʼélʼíinii éí halgaidi Hólan kin haalʼáadi, Jahéízah índa Méfeiyath kin shijaaʼídi,
22 Dáíban kin haalʼáadi, Nííbodi índa Beth-díblathéíyim kin shijaaʼídi,
23 áádóó díí kin hadaasʼáii: Kíriyathéíyimdi, Beth-géímaldi, Beth-míyondi,
24 Kííriyathdi, Bázradi índa Móʼab kéyahdi nízaadi kin hadaasʼáii áádóó tʼáá áyídígóó kin hadaasʼáii éí tʼáá ałtso bikʼi dahwiizleʼ.
25 Bóhólníihii ání, Móʼab dineʼé yee bidziilii kʼélneʼ índa bigaan kʼéʼéltǫʼ.
26 Bóhólníihii bikʼijįʼ jílı̨́įgo ayóó átʼéii ízhʼdiilyaaígíí bąą Móʼab biʼiiyíłdlą́ągo bił honiiłdóóh; Móʼab ałdóʼ bikwiígíí yiiʼ tádíʼnéeh doo áádóó diné hándahałtʼiʼ doo.
27 Ízrel dineʼé tsʼídá tʼóó bá nahółtʼiʼ nítʼééʼ. Ízrel dineʼéésh daʼniʼįįhii bitahgi biʼdiiltsą́? Tʼóó bá nahółtʼiʼgo hodeeshzhiizh yę́ędą́ą́ʼ áádóó wóshdę́ę́ʼ dah naʼílzhiishgo hoolzhiizh.
28 Móʼab kéyahgi kéédahohtʼíinii kin hadaasʼáádóó hah wohkáahgo tsénííʼgóó kéédahohtʼı̨́ áádóó hasbídí aʼáándáaʼgi bitʼoh áyiiłʼįįhígi átʼéego ídaʼdołnééh.
29 Móʼab beʼashohódliʼ, tʼáá íiyisí ádaa haʼniihgo, bee ádaa hodzódliʼgo, ádootʼı̨́įgo índa, Shí lą́ą, nízingo deiiʼniiʼ ni.
30 Bóhólníihii kóní, Hashké nídzingo bił náhochxihígíí shił bééhózin, nidi biyoochʼíidgo yee ádaa dzódlíii yee doo łaʼ yidoolíił da.
31 Éí bąą Móʼab dineʼé baa yínííł nishłı̨́įgo tʼáá aaníí Móʼab dineʼé tʼáá ałtso yéego baa yishcha doo; Ker-hííres kin haalʼáádóó diné baa yínííł nishłı̨́įgo dishʼníi doo.
32 Síbmah kin shijaaʼdóó chʼil naʼatłʼoʼii nílíinii, Jéízer kin haalʼá bilááh átʼéego naa atínídinishdleeh doo; nitsʼáozʼaʼ tónteel wónaanígóó adahineesą́ągo Jéízer bitónteel bibąąhjįʼ nidi nidahineesą́; shı̨́įgo nineestʼąʼígíí índa chʼil naʼatłʼoʼii bitooʼ bąąh hahasʼniiʼígíí éí niʼiiłchxǫǫhii yaatįįh híná.
33 Móʼab kéyahgi dádaʼakʼehgóó tʼóó ahayóí nidaʼntʼąʼ yę́ędóó bee ił hózhóonii índa baa hózhóonii dah diilyá; chʼil naʼatłʼoʼii habíʼiilʼésígi wáin ádingo áshłaa, áko doo habíʼiilʼées da doo índa doo ił hózhónígíí bee hodiwosh doo.
34 Héshban kin haalʼáádóó Iiliyéíleh kin shijaaʼjįʼ tʼáá Jéíhaz kin haalʼáajįʼ Nímrim hazʼánígi tó danílíinii nídááltseígíí biniinaa Zóʼer kin haalʼáádóó Hóranéíyim hazʼáníjįʼ áádóó Égla-shelíshiya hazʼáníjįʼ ayóó átʼéego cha hahóółʼáa doo.
35 Áádóó Bóhólníihii ání, Ninádahałaah doo biniyé wódah nahazʼą́ągo ádaalyaagóó náádaʼjiiłniihii índa tsin bijeeh dilidgo łikání halchinii hadiyin dabidiʼníinii bichʼįʼ dazhdiłidii éí Móʼab kéyahgi ádajídingo ádeeshłííł.
36 Éí bąą tsin bee ídaʼdilzoołí dadiitsʼaʼ nahalingo Móʼab dineʼé bąą shijéí yicha; tsin bee ídaʼdilzoołí dadiitsʼaʼ nahalingo Ker-hííres dineʼé bąą shijéí yicha, háálá jitʼíinii nishójiyoostʼeʼii ásdįįd.
37 Jó, atsiitsʼiin tʼáá ałtso dadiwolgo ádadoolnííł, dághá tʼáá ałtso dahidoogish, yílá tʼáá ałtso dadoogish, áádóó anííʼ gónaa tłʼoh yishbizh bikʼi daastiʼ doo.
38 Móʼab kéyahgi kin dabighą́ą́ʼgóó* tʼáá átʼé índa kintaa daʼaztiingóó diné yínííł danilı̨́įgo daacha doo, háálá łeetsʼaaʼ doo jiniizı̨́ı̨́ʼgóó nidziiztiʼígi átʼéego Móʼab nehétiʼ, ní Bóhólníihii.
39 Dooládóʼ Móʼab nehestǫʼ da; dooládóʼ ákʼidadiitʼaah da; dooládóʼ yániizı̨́įʼgo tʼą́ąjigo názbaal da, áko Móʼab tʼóó bá nahatʼiʼ doo índa hanaagóó kéédahatʼíinii hakʼee bił adahayói doo.
40 Jó, Bóhólníihii kóní, Łaʼ éí atsá nahalingo naatʼaʼ doo áádóó Móʼab yikʼijįʼ nilı̨́įgo bitʼaʼ yidoołbał, jóʼakon.
41 Kííriyath kin haalʼá éí biʼdisnááh áádóó bohoníłdzilgo nahazʼą́ yę́ęgóó daasná índa éí bijı̨́įdi Móʼab dineʼé dahayóii dabijéí éí asdzání awééʼ bídiiʼnaʼgo bijéí átʼéhígi átʼéego bił daayéeʼ doo.
42 Bóhólníihii bikʼijįʼ dajílı̨́įgo Móʼab dineʼé ayóó ádajítʼéego ídazhʼdiilyaaígíí biniinaa doo dineʼé dajílı̨́į da dooleeł biniyé áhodiʼdooldįįł.
43 Móʼab kéyahgi kééhótʼíinii, yééʼ áádóó aʼáán índa łoh nihikʼi dahwiidooleeł, ní Bóhólníihii.
44 Yééʼ bitsʼą́ąjįʼ dashdíníichą́ąʼii éí aʼáán góyaa azhdoogoh, áádóó aʼáándę́ę́ʼ háájooʼnaʼii éí łoh biiʼ dahizhdidoogááł, háálá Móʼab dineʼé atíhodeeshłíłígíí baa hoolzhiizhgo ádeeshłííł, ní Bóhólníihii.
45 Dah dadíníichą́ąʼii éí Héshban kin haalʼá bichahaʼoh biyaagi doo bitah dahwiináágóó naazı̨́, háálá Héshbandóó kǫʼ hadíínóód áádóó Sáíhan kin haalʼáádóó kǫʼ hadíínóodgo Móʼab booshkʼiizh ałtso yąąh yidííłid áádóó dabitsiiʼ ałtso yiyíízeez.
46 Móʼab nílíinii, doo hojoobaʼ ájíníi da. Kíímash diyin bidiʼníinii yichʼįʼ nidahałáii ałtso ásdįįd, háálá niyeʼké índa nitsiʼké dabiʼdisná.
47 Nidi akéeʼdi yoołkáałdi Móʼab yisnááh danilíinii nahjįʼ kódeeshłíiłgo daabííʼ yę́ę bííʼ nídadoodleełgo ádeeshłííł, ní Bóhólníihii. Kónízahjįʼ Móʼab dineʼé baa hwiidínóotʼįįł.
Footnotes
^ Kin bikááʼ tʼáá kʼéhézdon naʼazhoozhgo ákwii háádajilyįh nítʼééʼ.
