Jeremiah 37:1-21
37 Bábilan dineʼé aláahgo binanitʼaʼí Nébukadnézzar éí Jiihóíyakim biyeʼ Konáíyah éí Júdah dineʼé aláahgo binanitʼaʼí áyiilaii bitsáskʼehgi Josáíyah biyeʼ Zedekáíyah nantʼáá nítʼééʼ.
2 Nidi bí áádóó bá nidaalʼaʼí índa bikéyah bikááʼgóó diné kéédahatʼíinii Diyin God yá halneʼii Jeremáíyah éí Bóhólníihii bizaad yee yá yáłtiʼgo tʼáadoo deidiiztsʼą́ąʼ da.
3 Ákondi aláahgo naatʼáanii Zedekáíyah éí Shelemáíyah biyeʼ Jiihókal áádóó Méíyasíyah biyeʼ, nááʼiiłniihii nilíinii Zefanáíyah éí Diyin God yá halneʼii Jeremáíyah yichʼįʼ ayííłʼaʼgo kóní, NihiDiyin God Bóhólníihii bichʼįʼ nihá sodílzin.
4 Áko Jeremáíyah éí tʼah doo yah abiʼdiltʼeʼgóó diné yitaaghá.
5 Íídą́ą́ʼ Kaldíya dineʼé bisiláo Jerúsalem kin haalʼá yináshzhiizh yę́ędą́ą́ʼ Féro bisiláo Ííjip kéyahdę́ę́ʼ chʼínínánígíí yaa dahodiiztsʼą́ąʼgo Jerúsalem yitsʼáníná.
6 Ákohgo Bóhólníihii éí Diyin God yá halneʼii Jeremáíyah yichʼįʼ hanáánáádzíiʼgo kóní,
7 Ízrel dineʼé biDiyin God Bóhólníihii kóní, Júdah dineʼé aláahgo binanitʼaʼí nashídíłkidgo shichʼįʼ nííłʼaadígíí kóbididííniił, Féro bisiláo nihíká adoojah biniyé nihaa nínáhígíí Ííjip kéyahgóó dah nídidooʼnééł, jóʼakon.
8 Áádóó Kaldíya dineʼé nídooʼnéełgo díí kin haalʼáhígíí deidoołnéełgo yidahodidoonił áádóó ałtso adeididoołkʼą́ą́ł.
9 Bóhólníihii kóní, Kaldíya dineʼé doo kojįʼ náádadooʼnéeł da, dadohníigo tʼáadoo ádindaʼohdloʼí. Áádę́ę́ʼ yeeʼ náádooʼnééł.
10 Azhą́ Kaldíya dineʼé bisiláo tʼáá yílʼáá nítʼééʼ nihił daʼahigą́ągo bikʼeh dadoohdlı̨́įʼ nidi, índa diné tʼááłáʼí nítínígo tídaalyaaígíí níbaal yiiʼ naazhjéeʼ nidi, nídidoojahgo kin haalʼáhígíí yidahodidooniłgo adeididoołkʼą́ą́ł, jóʼakon.
11 Ákohgo aadę́ę́ʼ Féro bisiláo yinéełgo Kaldíya dineʼé bisiláo nídaasdzíidgo Jerúsalem yitsʼánínáago
12 Jeremáíyah éí Bénjamin bikéyahdi diné bitahdóó baa deetʼánígíí shóidoołtʼeeł yiniyé ákǫ́ǫ́ dah diiyá.
13 Áádóó Bénjamin bidáńʼdítı̨́hídi jiníyáago Hananáíyah biyeʼ Shelemáíyah biyeʼ Airáíjah éí siláo binanitʼaʼí nilı̨́įgo ákwii dáádéesdáá lá, áko éí Diyin God yá halneʼii Jeremáíyah yisiłgo ííłní, Kaldíya dineʼé bichʼįʼ yóóʼanilyeedgo ánítʼı̨́ı̨́ lá!
14 Áádóó Jeremáíyah ádííniid, Eii doo ákótʼée da. Kaldíya dineʼé doo bichʼįʼ yóóʼiishyeed da. Nidi Airáíjah doo tʼáá kʼad hodiiztsʼą́ąʼ da, nidi hasiłgo naatʼáanii danilíinii yidááhdóó nihonílóóz.
15 Áko naatʼáanii danilíinii éí Jeremáíyah yichʼįʼ bádahazhchįįd, áádóó nídahoneesxaalgo naaltsoos ííłʼíní Jánathan bighan góneʼ awáalyaa áhoolyaa góneʼ yah adahastʼeʼ.
Zedekáíyah éí Jeremáíyah yíʼdííkeed
16 Jeremáíyah éí náʼayaaí góyaa yah ahoʼdooltʼeʼgo ákwii ląʼí hwiiską́ągo
17 aláahgo naatʼáanii Zedekáíyah háká iʼííłʼaʼ áádóó baazhníyáago bił yah ajííyá. Aláahgo naatʼáanii tʼáá nahontʼinee bighan góneʼ nahódééłkidgo áhodííniid, Bóhólníihiiísh bitsʼą́ą́dę́ę́ʼ łaʼ haneʼ nááhódlǫ́? Jeremáíyah ání, Łaʼ hólǫ́, áko ání, Ni Bábilan dineʼé aláahgo binanitʼaʼí baa nidiʼdootʼááł.
18 Áádóó ałdóʼ Jeremáíyah éí aláahgo naatʼáanii Zedekáíyah áyidííniid, Haash niishłaago índa ná nidaalʼaʼí áádóó díí dineʼé haash yishłaago biniinaa yah ashííníłtʼeʼ?
19 Bábilan dineʼé aláahgo binanitʼaʼí doo naatįįh doobah da, índa díí kéyah doo yaatįįh doobah da, daniłníigo nił dahalneʼii éíshąʼ háájí adahaaskai?
20 Aláahgo shinanitʼaʼí nílíinii, baa nánooshkąąh, shidiitsʼı̨́ı̨́h. Tʼóó shaa hojoobáʼígo nánooshkąąhígíí tʼáadoo bitsʼąą nanítʼáhí; naaltsoos ííłʼíní Jánathan bighandi doo dadeestsaałígíí biniyé ákǫ́ǫ́ doo anáshidííłʼaał da.
21 Áko aláahgo naatʼáanii Zedekáíyah haadzíiʼgo Jeremáíyah éí awáalyaa bichʼéédą́ąʼgi hadáʼdeelkaal áádóó ákwii kin haalʼáagi bááh ásdįįdjįʼ bááh álʼı̨́įgo atiindóó tʼáá ákwíí jı̨́ bááh tʼááłáʼí haa nátʼááh nítʼééʼ. Áko Jeremáíyah tʼáá ákwii awáalyaa bichʼéédą́ąʼgi dzizdá.
