Jeremiah 36:1-32
36 Josáíyah biyeʼ Jiihóíyakim éí Júdah dineʼé aláahgo yinantʼáago dı̨́ı̨́ʼ náhááh góneʼ Bóhólníihii kótʼéego Jeremáíyah yichʼįʼ hanáánáádzíiʼgo ání,
2 Josáíyah bíyoołkááł yę́ędą́ą́ʼ, tʼáá éí bijı̨́ı̨́ góneʼ nihichʼįʼ yéíłtiʼ yę́ędą́ą́ʼ áádóó díí jı̨́įjįʼ Ízrel dineʼé áádóó Júdah dineʼé índa ałʼąą dineʼé tʼáá ałtso bikʼijįʼ nishłı̨́įgo naaltsoos yisdisii nídiitįįhgo saad bee haasdzíiʼii tʼáá átʼé bikááʼ ánílééh.
3 Júdah dineʼé doo yáʼáshónígi áhodeeshłíłígíí tʼáá átʼé éí deidiiztsʼą́ąʼgo doo yáʼáshónígi átʼéego deíkáhígíí yitsʼánáhidookahgo daʼátʼé. Áko doo ákwii ádáátʼįįdii áádóó ádił nidaʼiisíiʼii bá yóóʼadideeshʼááł.
4 Ákohgo Jeremáíyah éí Niiráíyah biyeʼ Bérak hágo yidííniid, áádóó Bóhólníihii éí Jeremáíyah yee yichʼįʼ hahaasdzíiʼii tʼáá átʼé Jeremáíyah yáłtiʼgo Bérak éí naaltsoos yisdisii yikááʼ áyiilaa.
5 Áádóó Jeremáíyah éí Bérak yichʼįʼ haadzíiʼgo kóní, Shidáʼdeelkaal, áko Bóhólníihii bikin biiʼ sohodizingi doo yah ajóyaʼígi átʼée da,
6 áko doo adą́ jíní góneʼ ákǫ́ǫ́ díínááł, áádóó Bóhólníihii bizaad bee nichʼįʼ yáshtiʼgo naaltsoos yisdisii bikááʼ íinilaa yę́ę kin biiʼ sohodizin góneʼ diné áłah silı̨́ʼígíí áádóó Júdah dineʼé bikin hadaasʼáádę́ę́ʼ nidahaaskaígíí tʼáá ałtso ałdóʼ daníistsʼą́ąʼgo bichʼįʼ yídííłtah.
7 Tʼááłáʼí jinítínígo doo yáʼáshónígi átʼéego dajíkáahii bitsʼáhizhdookahgo nídaʼjookąąhgo Bóhólníihii há yididootsʼı̨́įłgo daʼátʼé, háálá Bóhólníihii tʼáá íiyisí báhóóchįįdgo tʼóó báhádzidígi átʼéego yee atíʼéłʼíinii díí dineʼé yee yá haadzíiʼgo átʼé.
8 Áko Niiráíyah biyeʼ Bérak éí Diyin God yá halneʼii Jeremáíyah hachʼįʼ haadzíiʼii bikʼehgo ádziidzaa. Bóhólníihii bikin biiʼ sohodizin góneʼ naaltsoos yisdisii Bóhólníihii bizaad bikááʼ bikʼeʼashchíinii yíyííłtaʼ.
9 Josáíyah biyeʼ Jiihóíyakim éí Júdah dineʼé aláahgo yinantʼáago ashdlaʼ náhááh góneʼ áádóó náhástʼéí nídízííd binih Jerúsalemgi kéédahatʼíinii tʼáá ałtso áádóó Judíya kéyahdóó Jerúsalemjįʼ diné nidahaaskaígíí tʼáá ałtso, Bóhólníihii binááł doo daʼiidą́ą́góó tʼóó dahodíníilzingo łaʼa jı̨́ adooleeł, dadííniid.
10 Ákohgo Bóhólníihii bikin biiʼ sohodizin góneʼ éí adeídi hazʼánígi Bóhólníihii bikin biiʼ sohodizin bidáádílkał ániidíii bíighahgi Shéífan naaltsoos ííłʼíní nilíinii biyeʼ Gemaráíyah bighan góneʼ Bérak éí Jeremáíyah bizaad naaltsoos yisdisii bikáʼígíí tʼáá átʼé diné tʼáá ałtso bichʼįʼ jííłtaʼ.
11 Shéífan biyeʼ Gemaráíyah biyeʼ Maikáíyah éí Bóhólníihii bizaad naaltsoos yisdisii bikáaʼgi bee bikʼeʼashchínígíí tʼáá átʼé yidiiztsʼą́ąʼgo
12 aláahgo naatʼáanii bighan góyaa ííyá. Áadi naaltsoos ííłʼíní bighan góneʼ yah ííyáago naatʼáanii danilíinii tʼáá ałtso ákóneʼ naháaztą́. Naaltsoos ííłʼíní Iilíshama áádóó Shiiméíyah biyeʼ Diiléíyah áádóó Ákbor biyeʼ Elnéíthan áádóó Shéífan biyeʼ Gemaráíyah índa Hananáíyah biyeʼ Zedekáíyah áádóó naatʼáanii danilíinii tʼáá ałtso ákóneʼ naháaztą́.
13 Ákohgo Bérak éí naaltsoos yisdisii bikáaʼgi bikʼeʼashchínígíí tʼáá átʼé diné dabíistsʼą́ąʼgo yichʼįʼ yiyííłtaʼgo Maikéíyah éí saad yidiiztsʼą́ąʼii diné tʼáá ałtso yee yił hoolneʼ.
14 Ákohgo naatʼáanii danilíinii tʼáá ałtso éí Kúshai biyeʼ Shelemáíyah biyeʼ Nethanáíyah biyeʼ Jiihúdai éí Bérak yichʼįʼ adeisʼaʼgo ádeidííniid, Naaltsoos yisdisii bikáaʼgi bee bikʼeʼashchı̨́įgo diné daníistsʼą́ąʼgo tʼáá átʼé bichʼįʼ yíníłtaʼígíí éí yítı̨́įłgo nihaa díínááł, bididííniił. Áko Niiráíyah biyeʼ Bérak éí naaltsoos yisdisii yootı̨́įłgo haa níyá.
15 Áko Bérak ádeidííniid, Nídaahgo yíníłtaʼ. Áádóó Bérak naaltsoos hachʼįʼ yiyííłtaʼ.
16 Ákódzaadóó bikʼijįʼ saadígíí tʼáá ałtso deidiiztsʼą́ąʼgo nídaasdzíidgo daʼahinéélʼı̨́ı̨́ʼ, áádóó Bérak ádeidííniid, Díí saadígíí tʼáá átʼé aláahgo naatʼáanii nilíinii bee bił dahodiilnih.
17 Áádóó Bérak nideídééłkidgo ádaaní, Díishąʼ haa yitʼéego saad tʼáá átʼé bee akʼeʼshíníłchı̨́? Yááłtihgoósh bikʼeʼshíníłchı̨́?
18 Áádóó Bérak hachʼįʼ haadzíiʼgo áháłní, Díí saad éí tʼáá ałtso ałkééʼ yee yááłtihgo tó bee akʼeʼelchíhí bee naaltsoos yisdisii bikáaʼgi akʼeʼshéłchı̨́.
19 Ákohgo naatʼáanii danilíinii éí Bérak ádeidííniid, Ni áádóó Jeremáíyah nihílááh nídóhtʼįįh, áádóó diné łaʼ tʼááká nídoohtʼı̨́įʼgi bił bééhoozı̨́ı̨́ʼ yíilaʼ.
20 Áádóó naaltsoos ííłʼíní nilíinii Iilíshama bighan góneʼ naaltsoos yisdisii nizhnítą́ągo aláahgo naatʼáanii kótʼéego dabiłníinii yił ahínéikah góneʼ yah ajííʼáázh, áádóó aláahgo naatʼáanii éí saad tʼáá átʼé bee bił hojoolneʼ.
21 Ákohgo Jiihúdai éí naaltsoos yisdisii néididootı̨́ı̨́ł biniyé aláahgo naatʼáanii bííłʼaad, áádóó naaltsoos ííłʼíní Iilíshama bighandę́ę́ʼ naaltsoos yisdisii néidiitą́. Áko Jiihúdai éí aláahgo naatʼáanii áádóó naatʼáanii danilíinii bíighahgóó naazı̨́įgo naaltsoos yisdisii bichʼįʼ jííłtaʼ.
22 Íídą́ą́ʼ náhástʼéí nídízííd binih aláahgo naatʼáanii keehai hooghan góneʼ honibąąhdóó sidáago
23 Jiihúdai éí naaltsoos yisdisii bikáʼígíí yaago hadadiitʼiʼígíí táaʼda, dı̨́įʼda náyóltahgo aláahgo naatʼáanii éí biih náwoʼí yee kʼíyiigéeshgo tsídzayiiłkaad, áko tʼáá ákótʼı̨́įgo naaltsoos yisdisii ałtso iidííłkʼą́ą́ʼ.
24 Ákondi aláahgo naatʼáanii índa bá nidaalʼaʼii díí saad deidiiztsʼą́ąʼgo tʼáadoo łaʼ bikʼee bił dahóóyéeʼ da, índa tʼáadoo biʼééʼ ádąąh nidayooldláad da.
25 Azhą́ Elnéíthan áádóó Diiléíyah índa Gemaráíyah éí aláahgo naatʼáanii, Naaltsoos yisdisii tsʼídá doo adidííłkʼą́ął da, deiłníigo nídayooskan nidi, tʼáadoo hodiiztsʼą́ąʼ da.
26 Áádóó aláahgo naatʼáanii éí tʼáá bí biyeʼ Jíírahmíyel áádóó Ázriyel biyeʼ Seráíyah índa Ábdiyel biyeʼ Shelemáíyah yichʼįʼ haadzíiʼgo naaltsoos ííłʼíní Bérak áádóó Diyin God yá halneʼii Jeremáíyah, Nídoohʼéésh, yidííniid, nidi éí Bóhólníihii nábideesʼı̨́ı̨́ʼ.
27 Ákohgo naaltsoos ííłʼíní Bérak éí Jeremáíyah hachʼįʼ yááłtihgo naaltsoos yisdisii saad bikááʼ ádajiilaa yę́ę éí aláahgo naatʼáanii iidííłkʼą́ą́ʼdóó bikʼijįʼ Bóhólníihii éí Jeremáíyah yichʼįʼ hanáánáádzíiʼgo kóní,
28 Naaltsoos yisdisii łaʼ nínáádiitįįhgo átsédą́ą́ʼ naaltsoos yisdisii saad bee bikʼeʼashchíinii éí Júdah dineʼé aláahgo binanitʼaʼí Jiihóíyakim iidííłkʼą́ʼígíí tʼáá éí saad naaltsoos bikáaʼgi bee bikʼeʼnááʼdííłchííł.
29 Júdah dineʼé aláahgo binanitʼaʼí Jiihóíyakim éí kóbididííniił, Bóhólníihii kóní, Díí naaltsoos yisdisii dííníłidgo kódíní, Haʼátʼíí lá biniyé díí naaltsoos yisdisii kótʼéego bikááʼ bikʼeʼshíníłchı̨́įgo kódííníniid, Bábilan dineʼé aláahgo binanitʼaʼí doonéełgo díí kéyah tʼáá náhwiistʼą́ą́ nítʼééʼ yidoołchxǫǫł, áádóó bikáaʼgi diné kéédahatʼíinii índa naaldlooshii nahjįʼ kwíidoolííł?
30 Éí bąą Bóhólníihii éí Júdah dineʼé aláahgo binanitʼaʼí Jiihóíyakim kótʼéego yaa haadzíiʼgo kóní, Bitsʼą́ą́dóó oochíiłii łaʼ David bibikááʼdóó nahatʼáii tsʼídá doo łaʼ yikááʼdóó dah dínóodaał da, áádóó Jiihóíyakim bitsʼíís daaztsáanii éí jı̨́įgo náhoniigahjįʼ áádóó tłʼéeʼgo shonéigahjįʼ chʼíhidoolghą́ą́ł.
31 Áko hó áádóó hatsʼą́ą́dóó oochíiłii índa há nidaalʼaʼí éí tʼáá bił doo ákwii ádajíítʼįįdígíí biniinaa atíhodeeshłííł, índa hó áádóó Jerúsalemgi kéédahatʼíinii índa Júdah dineʼé doo yáʼáshóonii bee bá haasdzíiʼii tʼáá ałtso bikʼijįʼ yeideeshxééł, nidi tʼáadoo dahodiiztsʼą́ąʼ da.
32 Ákohgo Jeremáíyah éí naaltsoos yisdisii łaʼ nínéidiitą́ągo Niiráíyah biyeʼ, éí naaltsoos ííłʼíní nilíinii Bérak yaa néinítą́, áádóó Jiihóíyakim éí naaltsoos yisdisii saad tʼáá átʼé bikáaʼgo iidííłkʼą́ʼígíí éí saadígíí Jeremáíyah yee yá náánááłtihgo naaltsoos hálákʼee náánástánígíí bikááʼ ánáájiidlaa, áádóó saad tʼáá ákódaatʼéii ląʼí bíidzoh.
