Jeremiah 20:1-18
20 Áko Ímer biyeʼ Pásher nááʼiiłniihii nilíinii éí Bóhólníihii bikin biiʼ sohodizin siʼą́ągi alą́ąjįʼ naatʼáanii ałdóʼ nilı̨́. Éí Jeremáíyah díí Diyin God yá yaa hoolneʼgo yiyííniiʼ.
2 Ákohgo Pásher éí Diyin God yá halneʼii Jeremáíyah yił dzideesxaalgo Bóhólníihii bikin biiʼ sohodizin siʼánígíí bíighahgóó dáńʼdítı̨́įhgo dego yaaʼáhígíí Bénjamin bee wójíhígíí ákwii hálaʼ áádóó hakeeʼ tʼáá ałchʼijí tsin hąąh sinilgo áhoolaa.
3 Biiskání Pásher éí Jeremáíyah tsin hąąh sinil nítʼéʼídóó haa néidiiʼnilgo hwéidííchid, áko Jeremáíyah ábíłní, Bóhólníihii éí doo Pásher yee nózhíi da, nidi Méígor-mísabib* yinílyée doo, niłní.
4 Háálá Bóhólníihii kóní, Jó, ádééníldzidgo ándeeshłííł, áádóó nikʼisóó danilíinii tʼáá ałtso néédaaldzid doo. Áádóó hweʼanaʼí danilíinii diltłish yee nidahodoołtsiłgo tʼáá ni yidííłtsééł. Áádóó Júdah dineʼé tsʼídá tʼáá ałtso Bábilan dineʼé aláahgo binanitʼaʼí baa hodideeshʼááł, áádóó Bábilan kéyah góneʼ hoł adínóodah; áadi diltłish yee nidahodoołtsił.
5 Áádóó díí kin haalʼáádóó hanaalyeʼé tʼáá átʼé áádóó hanaanish ádajiilaii tʼáá átʼé índa daʼílíinii hwee dahólóonii tʼáá átʼé áádóó Júdah dineʼé aláahgo bindanitʼaʼí dajílíinii hanaalyeʼé tʼáá átʼé hodaʼanaʼí baa dideeshʼááł; éí hanaalyeʼé tʼáá átʼé haghadeidiyooʼniłgo Bábilangóó adeidiyooyééł.
6 Áádóó ni, Pásher, índa nighan góneʼ nił kééhatʼíinii tʼáá ałtso nihidiʼdoolnéełgo Bábilangóó doohkah, áko áadi dadíítsaałgo ni lá áádóó nikʼisóó tʼáá ałtso woochʼííd bee bił dahwíínílneʼii tʼáá bił yóóʼándiʼdoolnííł.
Jeremáíyah éí Bóhólníihii yichʼįʼ saad hółǫ́
7 Bóhólníihii nílíinii, shinisíníloʼ, áko tʼáá íiyisí shiʼdeesdloʼ. Shilááh ánóodziil, áádóó shikʼeh dínídlı̨́ı̨́ʼ. Tʼáá ákwíí jı̨́ shá nahatʼiʼ; diné tʼááłáʼí nítínígo shá nidahałtʼiʼ.
8 Háálá yáshtiʼ baa nídiisdzáádóó nidishghaash; nidishghaashgo doo tsʼííd ánihiʼdidoolníił da áádóó ałtso ánihiʼdidooldįįł, dishní, háálá Bóhólníihii bizaad biniinaa shá bíighah shá nidahałtʼiʼgo shaa nídiikai, áádóó shąąh nidayiiłhaał.
9 Ákohgo doo haa nááhodeeshnih da, índa házhiʼ binahjįʼ doo nááhodeeshnih da, dííniidgo hazaad éí shijéí biiʼdi hólǫ́ǫgo shitsʼin biiʼdi kǫʼ nahalingo bidáʼdeelkaal, áádóó chʼééh bił tʼą́ą́ʼ sétı̨́įgo bąąh niníyá. Áko Diyin God bizaad doo bee yáshtiʼ da dooleeł nisingo chʼééh ááłʼįįd.
10 Diné tʼóó ahayóí ałjeeh nídanilniihgo ahił dahalneʼ. Tʼáá ałtsodę́ęʼgo shił dahółyéeʼgo yádaałtiʼ. Shikʼisóó bił ahéédahasinii tʼáá ałtso ádił adeesihígíí yiniyé shaa nidahaakaigo tʼáá doodahígo shá hadahadziihgo ádaaní, Haaʼíyeeʼ tʼáá doodahígo bá hadadiidzih; bindaʼdiidlohgo daʼátʼé. Ákódzaago hakʼeh dadidiidleełgo kʼéédahodidiilnííł.
11 Nidi Bóhólníihii ayóó ábóodziilii bikʼeʼíyéʼígi átʼéego shił hólǫ́. Éí bąą atídashijiłʼíinii ádił dazdoosih, áádóó doo shikʼeh dazhdidoodleeł da. Tʼáadoo adih ádadziidzaaígíí biniinaa tʼóó baa yádaznízin doo. Hoolʼáágóó ádił tsétah daʼdziztłʼónígíí éí tsʼídá doo baa hodiyooʼnah da.
12 Nidi tʼáá ałtsoní bee Bóhólníihii nílíinii, tʼáá ákogi ádaatʼéii bééhózingo ádanileʼii, áádóó diné bíniʼ áádóó bijéí yee yaa nitsídaakeesii yíníʼíinii, bíniʼdii kʼéébidídléehgo yideestsééł, háálá diné bił ałchʼįʼ nidaasdzilígíí bááʼdééłtsooz.
13 Bóhólníihii bichʼįʼ dahohtaał, Bóhólníihii baa dahohniih, háálá diné biiʼ sizíinii bahojoobáʼíii diné doo yáʼádaashóonii bitsʼą́ą́dóó yisdéíníłtı̨́.
14 Shiʼdizhchı̨́ bijı̨́ı̨́dą́ą́ʼ éí hóyéeʼgo bá haʼódziih. Shimá shishchı̨́ yę́ędą́ą́ʼ éí bijínígíí tʼáadoo bikʼihojidlíhí.
15 Shizhéʼé yił hoolneʼgo, Ashkii ná yizhchı̨́, yiłníigo yił hóóshǫǫd yę́ę éí diné hóyéeʼgo bá haʼódziih.
16 Áádóó Bóhólníihii éí doo bąąh bíniʼgóó tʼáadoo łahgo átʼéego yąąh tsíndeezkéézgóó kin hadaasʼáágóó atíyiilaa yę́ęgi átʼéego éí diné ákóbiʼdólneʼ.* Áko hániʼdii abínígo diwosh hááʼáhígíí áádóó ałnéʼéʼáahgo anaaʼ bikʼee diwosh hááʼá,
17 háálá tʼóó shiʼdizhchı̨́ yę́ędą́ą́ʼ tʼáadoo shiisxı̨́į da, éí doodaiiʼ shimá biishchʼid biiʼdi dasétsą́ągo shimá biiʼ shijishcháaʼ doo nítʼééʼ, áko hoolʼáágóó shee bibid nitsaa doo nítʼééʼ.
18 Áko haʼátʼíí lá biniyé shiʼdizhchı̨́įgo naanish áádóó yínííł bénáshááh índa yáhásin biiʼgóó shíyoołkááł?
Footnotes
^ Méígor-mísabib jiníigo éí Hííbrew kʼehjí, Tʼáá ałtsodę́ęʼgo bikʼeʼíyéeʼii, jiníigo óolyé.
^ Sádam áádóó Gomárah kin haalʼáii ááhyiłní. Gen. 19:24,25.
