Jeremiah 2:1-37
2 Nááʼáłdóʼ Bóhólníihii shichʼįʼ haadzíiʼgo ání,
2 Nílááh, Jerúsalem kin haalʼáagi kéédahatʼíinii bijaayiʼjįʼ dah díníitʼaahgo kódíníigo bichʼįʼ handziih, Bóhólníihii kóní, Ániid nanináádą́ą́ʼ naʼahódlíí nítʼééʼ yę́ę áádóó báʼdoogehiigi átʼéego ayóóʼáshííníʼnínígíí índa honoojíidi tʼáadoo kʼidoolyáagi shikééʼ tádííníyáhígíí éí bénáshniih.
3 Ízrel dineʼé Bóhólníihii bidiyı̨́ı̨́ʼ nilı̨́ı̨́ nítʼééʼ; Bóhólníihii áłtsé yineestʼáanii nilı̨́ı̨́ nítʼééʼ; anadandzinii bitʼááh nájahgo tʼáá ałtso ádidahodiiltʼiʼgo doo yáʼátʼéehii bikʼi hwiidooleeł, ní Bóhólníihii.
4 Jéíkab dineʼé ahoolchíiłii, éí Ízrel dineʼé dah deínóhnéehii danohłíinii tʼáá ánółtso Bóhólníihii ánínígíí dadoohtsʼı̨́ı̨́h.
5 Bóhólníihii kóní, Haʼátʼíí doo ákwii éʼétʼéii shı̨́įshąʼ danihizhéʼé shąąh dayiiłtsą́ągo doo deeghánígóó shitsʼáhaaskaigo tʼáadoo danilíníii yikééʼ tádadookai índa tʼáadoo nilíníii daazlı̨́ı̨́ʼ?
6 Índa Bóhólníihii éí Ííjip kéyahdę́ę́ʼ chʼínihiníʼeezhgo honoojíígóó nihooʼishgo kéyah bikáaʼgi tʼáadoo siláhígóó índa kéyah binídahasdzą́ągo áádóó doo nahałtingóó índa kéyah biiʼ aniné bichahaʼohgóó índa diné tʼah doo łaʼ ákǫ́ǫ́ chʼéghááhgóó áádóó diné doo kéédahatʼı̨́ı̨́góó nihiníʼeezhii éí háájí lá silı̨́ı̨́ʼ? Tʼáadoo nidi dashidííniid da.
7 Áko aneestʼąʼ índa yáʼádaatʼéehii daohsą́ą dooleeł biniyé kéyah bikááʼ ádaʼazįįdii biih nihííʼeezh, nidi yah oonáago shikéyah daołchxǫʼ, áádóó shííʼ nilíinii doo yildinii ádaohłaa.
8 Náádaʼiiłniihii, Háájísh Bóhólníihii? tʼáadoo dadííniid da, áádóó bee hazʼáanii yínídaʼniłtinii doo shéédahósin da, áádóó naatʼáanii danilíinii éí shichʼįʼ doo ákǫ́ǫ́ ádáátʼįįd da. Áádóó náás áhodooníiłii yaa dahalneʼii éí eʼelyaii Béíyal yinahjįʼ dahoolneʼ áádóó doo yáʼátʼééh nánídlíinii yikééʼ tádadookai.
9 Éí bąą tʼahdii tʼáá nihił ałghaʼdishtʼáah doo, índa nihaʼáłchíní áádóó bináádaʼáłchíní bił ałghaʼdishtʼáah doo, ní Bóhólníihii.
10 Jó, nihílááh Kítim kéyah táyiʼdę́ę́ʼ hááʼáajįʼ tséʼnaa ninohkáahgo áadi diné kéédahatʼínígíí hazhóʼó danółʼı̨́ índa Kíídar kéyahgóó náádóhkááh, áadi diné kéédahatʼínígíí hazhóʼó baa nitsídaohkeesgo hadaohsííd; ákǫ́ǫ́ daatsʼí diné tʼáá ákódaatʼı̨́įgo bił nahazʼą́.
11 Łahgo dineʼé kééhatʼı̨́įgo bidiyin dabidiʼníinii, azhą́ doo diyin da nidi, náánáłaʼásh bidiyin ánéídoodlííł? Nidi shidineʼé bee baa haʼniihii nahjįʼ kódayiilaago náánáłaʼ doo yáʼátʼééh nánídlíinii éída ádá nídeidiilá.
12 Yótʼááh hinooláii, díí bikʼee tʼóó nihił adahayói leʼ, índa tʼáá íiyisí bikʼeʼíyéeʼii bikʼee tsídadołyéesgo nihitah nidahwiiłnáa leʼ, ní Bóhólníihii.
13 Shidineʼé naakijįʼ doo yáʼáshǫ́ǫ́góó ádáátʼįįd: tó bee iináanii háálíinii nishłíinii yóóʼadashideezʼą́, áádóó tó bá azʼáanii éí tó bá azʼáanii sitsʼilii tó doo biiʼ hólǫ́ǫ leʼ átʼéii ádá ádayiilaa.
14 Ízrel dineʼéésh naalteʼ nilı̨́? Naalteʼ nilı̨́įgoósh yizhchı̨́? Ákoshąʼ haʼátʼíí biniyé bąąh oogą́ąʼii silı̨́ı̨́ʼ?
15 Náshdóíyáázh bitsiijįʼ daditłʼooígíí hachʼįʼ yéego ádadííniid, áádóó hachʼįʼ biyiʼ nahodiʼniʼ áádóó hakéyah doo bikááʼ siláhígóó ádayiilaa. Hakin hadaasʼá yę́ęgóó doo nidaagháhí da áádóó adeideeskʼą́ą́ʼ.
16 Áádóó ałdóʼ Mémfis* kin haalʼáádóó dineʼé índa Tahápaniiz kin haalʼáádóó dineʼé bee ayóó ánítʼéii yę́ę dayííłchxǫʼ.
17 Nílááh, honoojíídę́ę́ʼ Bóhólníihii nihiDiyin God nihooʼishgo yóóʼadasidooʼánígíí bąą tʼáá nihí ádił yaa ninádaʼsołtʼeʼ.
18 Ákoshąʼ kʼad Náil tooh nílínídóó tó daohdlą́ą dooleełísh biniyé Ííjip kéyahgóó disoohkai? Áádóó Yofréítiiz tooh nílínídóó tóhígíí daohdlą́ą dooleełísh biniyé Asíriya kéyahgóó disoohkai?
19 Doo yáʼáníshónígíí tʼáá éí hashtʼénidoodlííł, áádóó tʼą́ą́ʼ anéínílwodígíí nididooteh. Éí bąą Bóhólníihii niDiyin God yóóʼadííníʼánígíí bikʼee tʼáá íiyisí ináháshchʼíiʼii índa doo yáʼátʼéehii átʼéé lágo baa nitsídííkosgo nił bééhodoozįįł, áádóó shidíínísin dooleełígíí nidi niiʼ ádin, ní tʼáá ałtsoní bee Bóhólníihii Diyin God.
20 Áko tʼáá ałkʼidą́ą́ʼ niʼazéédéetání kʼínítiʼ índa bee neʼastłʼónígíí kʼínínizh, nidi Diyin God doo bá naashʼaʼ da doo, diníigo hoolzhiizh. Jó, dawókʼą́ą́góó tʼáá ałtso índa tsin dootłʼizh naazkaadii tʼáá átʼé dabiyaagóó ałjiłnii nahonílingo nahílghal nítʼééʼ.
21 Ákondi chʼil naʼatłʼoʼii yáʼátʼéehii bílástsiiʼ hadaałtʼéii nílı̨́įgo kʼindííláa niʼ. Ákoshąʼ haa yitʼéego chʼil naʼatłʼoʼii doo yáʼáshóonii tʼáá áhoodzaagóó sikaadii sínílı̨́ı̨́ʼ?
22 Azhą́ bee iilgáhí índa táláwosh tʼóó ahayóí choiníłʼı̨́įgo bee táʼádígis lá nidi, doo ákwii íínítʼįįdii bee dah yinikiizh yę́ę tʼahdii shidááhgóó hólǫ́, ní Bóhólníihii Diyin God.
23 Ákoshąʼ haa yitʼéego, Doo yíchǫʼ da; Béíyal edaʼalyaii binaʼnitin tʼáadoo bikʼeh níyáa da, diní? Honítsʼaaʼgóó díníʼı̨́įʼgo baa nisíníyáhígíí nił bééhoozįįh. Ghą́ą́ʼaskʼidii biʼáadii éí ghą́ą́ʼaskʼidii bikąʼii haintáii tsı̨́įłgo naanáálwołígi átʼéego naanáálwoł;
24 télii ałchinii honoojíidi íneesdinii éí télii bikąʼ dooleełii haintáago níłchʼi yił ahidziihígíí nahonílin; chʼínáʼnáago háí doo ákótʼı̨́ı̨́góó íidoolííł? Hadabintáii éí doo chʼééh hadabidínóotaał da; bikąʼii bidiigháahgo índa hashtʼeditʼeeh.
25 Tʼáá nikeeʼ hólǫ́ǫgo íínísin áádóó tʼáadoo dibááʼ nílíní. Nidi ádíní, Chohooʼı̨́ ádin; déʼéyóní nilíinii ayóóʼádeíníshʼní; bikééʼ naanááshwoł doo.
26 Aniʼįįhii bénálkahgo ádaa yániidzįįhígi átʼéego Ízrel dineʼé éí aláahgo binanitʼaʼí, binanitʼaʼí danilíinii, binááʼiiłniihii danilíinii índa Diyin God yá dahalneʼii danilíinii yił ákótʼéego ádaa yádadínóodzįįł.
27 Éí tsin, Nihizhéʼé nílı̨́, índa tsé, Nihishíníłchı̨́, deiłní. Jó, shitsʼą́ąjįʼ nídaazyiz, shichʼįʼgo éí dooda, nidi bichʼįʼ dahodiisnáaʼgo índa díldzíiłgo yisdánihínííł, daaníi doo.
28 Nihidiyin dabidiʼníinii ádá ádaohłaaígíísh éí háájí? Nihichʼįʼ hodiiznáaʼgo éí hániʼdii dadildzííł; yídaneelʼą́ą́ ládą́ą́ʼ yisdádanihidoonił. Júdah dineʼé nohłíinii, nihikin hadaasʼáhígíí bikʼehgo tʼáá ákónéeltʼeʼgo nihidiyin dabidiʼníinii dahólǫ́.
29 Éí bąą haʼátʼíí biniyé shił ałghaʼdítʼáah doo? Tʼáá ánółtso shichʼįʼ doo ákǫ́ǫ́ ádaotʼįįd da, ní Bóhólníihii.
30 Nihaʼáłchíní tʼáadoo biniyéhígóó bitaa síłtsxas; tʼáadoo hashtʼéédabiidlaa da. Náshdóítsoh bitsiijįʼ ditłʼooígíí atíʼoolííł nahalingo tʼáá nihí nihidiltłish bee Diyin God yá dahalneʼii nidasoołtseed.
31 Áko nihí oochíiłii nohłíinii, Bóhólníihii áníinii tsʼídá hazhóʼó deísółtsʼą́ą́ʼ. Ízrel dineʼéésh honoojí índa kéyah chahałheełii bá nishłı̨́ı̨́ nítʼééʼ? Ákoshąʼ haʼátʼíí biniyé shidineʼé, Tʼáá nihí nihídahólnííh; doo nichʼįʼ náádadiikah da, dashiłní?
32 Chʼikę́ę́hésh biyódí yee hadítʼéii tʼáá yeidiyoonah índa báʼiigehiísh biʼééʼ tʼáá yeidiyoonah? Nidi shidineʼé éí yoołkáłígíí doo wóltaʼ ánéelą́ą́ʼ bíighahgóó shaa dayooznah.
33 Dooládóʼ ajił biniyé hashtʼeʼadílnéeh da. Azhą́ asdzání doo yáʼádaashóonii nidi, ááníłígíí bíndabiníníłtą́ą́ʼ.
34 Áádóó ałdóʼ diné badahojoobáʼíii doo ádidahodiiltʼiʼii dabidił niʼééʼ daabąąh. Tʼáadoo daʼneezʼı̨́įʼ da nidi nidasoołtseed.
35 Áko kódaotʼįįd lá nidi doo ádidahodiiltʼiʼ da, dadohní, Tʼáá aaníí, doo shichʼįʼ báháchįʼ da silı̨́ı̨́ʼ, diní. Shoo, doo ádił asésiih da, dinínígíí bąą naa nídéeshtʼįįł.
36 Dooládóʼ łaʼałyóígóó ałtsʼą́ą́ʼ ninánílwoʼgo ánítʼéii łahgo ánáádlíił da! Asíriya dineʼé baa yáninizı̨́ʼígi átʼéego Ííjip dineʼé ałdóʼ baa yádíníizįįł.
37 Baa dzíínílíhígíí éí Bóhólníihii doo biniizı̨́ʼígíí biniinaa bitsʼą́ąjįʼ nitsiiʼ bikʼi díínílniiʼgo dah didíínááł, áko éí tʼáá áłah doo níká ahiʼdíʼnóolchéeł da.
Footnotes
^ Ííjip kéyahdi kin haalʼáii Mémfis éí Naf ałdóʼ hoolyé.
