Isaiah 63:1-19
63 Íídam kéyahdę́ę́ʼ Bázra kin shijaaʼdóó biʼééʼ yiilchiiʼgo naagháhígíí háísh átʼı̨́? Éí biʼééʼ tʼáá íiyisí nizhónígo, ayóó átʼéego bidziil yee tádígháhígíí háísh átʼı̨́? Shí tʼáá ákogi átʼéego yáshtiʼgo áádóó shidziilgo yisdáʼdeeshniłígíí éí áshtʼı̨́.
2 Haʼátʼíísh biniinaa chʼil naʼatłʼoʼii hayéʼéłʼéesii nahalingo niʼééʼ łichíiʼgo naniná?
3 Dadineʼé bitahdóó diné doo łaʼ shił naaʼaashgóó tʼáá sáhí chʼil naʼatłʼoʼii habíʼííłʼeez, háálá sháháchįʼgo bikʼi nideeshaał áádóó tʼóó báhádzidgo sháháchįʼgo łeeh bíʼdeesʼis; dabidił shiʼééʼ bikʼídadooltah índa shiʼééʼ tʼáá átʼé bee łichíiʼgo ádeeshłííł.
4 Áko kʼéédideeshnííł baa hodoolzhishígíí shijéí biyiʼdi baa nitséskees áádóó bikʼé nináʼníshdláhígíí baa hoolzhiizh.
5 Áádóó dééʼı̨́įʼgo doo łaʼ áká oolyeedí da índa haʼátʼéego lá de kóʼósin dooleełígíí ádin lá nisin; éí bąą yisdáʼíínilgo tʼáá shí shigaan shíká eelwod áádóó tʼóó báhádzidgo sháhóóchįįdígíí de áshósin nítʼééʼ.
6 Áádóó sháháchįʼgo dadineʼé bikʼi nideeshaał índa tʼóó báhádzidgo sháháchįʼígíí nídeineesdlą́ąʼgo ádeeshłííł áádóó dabidił yee dabidziilii niʼjįʼ yaanil.
Bóhólníihii éí Ízrel dineʼé yaa joozbaʼ
7 Bóhólníihii aa aʼááh nízinii áádóó Bóhólníihii nihaidiníʼánígíí tʼáá ałtso bikʼehgo éí bee baa haʼniihígíí áádóó yee joozbaʼii índa ayóó átʼéego yee joobaʼii éí bikʼehgo Ízrel dineʼé ayóó átʼéego bá yáʼátʼééh biniyé yá áátʼįįdígíí baa chʼíhodeeshʼááł.
8 Háálá bí ádííniid, Tʼáá aaníí, shidineʼé éí áłchíní doo dabiyoochʼíid da dooleełígíí ádaatʼı̨́, áko Yisdábíínilii silı̨́ı̨́ʼ.
9 Tʼáá ałtso yikʼee tiʼdahoozniiʼígíí bikʼee tiʼhodzoozniiʼ áádóó tʼáá hó hojílónígi hadiyingo naalʼaʼí yisdábíínil; hweʼayóóʼóʼóʼniʼ áádóó baa aʼááh jinízingo bee bikʼé nináʼjídlá; ałkʼidą́ą́ʼ hoolzhishii bikʼehgo bił haʼjólníigo náás jiníjaaʼ.
10 Nidi hachʼįʼ nidaasteeʼ áádóó haNíłchʼi Diyinii yíniʼ nídayiiłʼaah nítʼééʼ; éí bąą biʼanaʼí dzizlı̨́įʼgo bichʼįʼ nidzizbaaʼ.
11 Ákohgo bidineʼé éí ałkʼidą́ą́ʼ Mózes bíiníłkáanii yéédaalniiʼgo kódaaní, Dibé yaa áhályáanii áádóó tónteel biyiʼgóó bidibé chʼíiníʼeezhii háadi naaghá? Hatahgi Níłchʼi Diyinii hólǫ́ǫgo áyiilaii háájí silı̨́ı̨́ʼ?
12 Hoolʼáágóó bízhiʼ bee chʼíbiditʼáah doo biniyé bidziil ayóó átʼéii Mózes bílaʼ nishʼnáájí bikʼehgo halą́ąjįʼ tónteel aháyííłkʼolgo yiiʼgóó chʼíhoníʼeezh?
13 Honoojítahdi łı̨́ı̨́ʼ doo digeehígi átʼéego háísh éí tónteel aháálkʼolí góneʼ tʼáadoo dazhdigeehí chʼíhoníʼeezh?
14 Halgaigóó béégashii hadah yikahígi átʼéego Bóhólníihii biNíłchʼi háádajilyı̨́įhgo áhoolaa, áko nízhiʼ ayóó ánóolningo chʼídeiditʼáah doo biniyé nidineʼé chʼíiníʼeezh.
Aa aʼááh hasin áádóó áká iʼdoolwoł bíká sohodizin
15 Yáʼąąshdę́ę́ʼ hodiyingo índa niʼoh hodidilyéehgo nił hazʼą́ą́dę́ę́ʼ hadah díníʼı̨́ı̨́ʼ; níhoneedlı̨́ áádóó ayóó átʼéego ááníłígíí ayóóʼáshííʼníʼníinii áádóó shaa aʼááh nínízinii háájí silı̨́ı̨́ʼ? Éísh tʼą́ą́ʼ kwíínísin?
16 Azhą́ Éíbraham doo nihééhósin da áádóó Ízrel wolyéii doo nihaa ákonízin da nidi, Bóhólníihii nílíinii, ni nihiTaaʼ nílı̨́; nihikʼé nináʼídláii nílı̨́; nízhiʼ hoolʼáádę́ę́ʼ hólǫ́.
17 Bóhólníihii nílíinii, haʼátʼíísh biniyé ááníiłii bitsʼánihiyííníłkai áádóó nitsʼąą dasiitiʼ doo yę́ęgi nihijéí déíníłtłʼis? Ádóoneʼé nííʼ dooleełii biniyé ná nidaalʼaʼí bichʼįʼ náníyis.
18 Nidineʼé dadiyinii éí nihodiyingo hazʼánígíí tʼóó kónígháníjįʼ daabí nítʼééʼ nidi, nihiʼanaʼí danilíinii yikʼi naaskai.
19 Tʼáadoo binanínítʼą́ą daígíí áádóó tʼáadoo nízhiʼ bee dayééjiʼígíí nidahoniidlin dasiidlı̨́ı̨́ʼ.
