Isaiah 60:1-22
60 Nídiidáahgo adííníłdíín, háálá adinídíín ná baa hoolzhiizh; Bóhólníihii bee bitsʼádiʼnílíidii bee nikʼi diidláád.
2 Háálá nahasdzáán chahałheeł bikʼéstiʼ índa dadineʼé yéego chahałheełii bikʼéstiʼ, jóʼakon, nidi Bóhólníihii nikʼi hwiidooleełgo bee bitsʼádiʼnílíidii nikʼijįʼ yitʼı̨́į doo.
3 Áádóó ałʼąą dineʼé neʼadinídíinjįʼ nidookah índa aláahgo naatʼáanii danilíinii neʼadinídíín hoonaałjįʼ nidookah.
4 Ninaagóó díníʼı̨́įʼgo iidííłtsééł: tʼáá ałtso áłah silı̨́įʼgo nichʼįʼ nehekááh; niyáázhké nízaadę́ę́ʼ nehekááh índa niniitʼaa nichʼéʼéké naa hidoojih.
5 Áko nił hózhǫ́ǫgo yidííłtsééł, áádóó ił hózhǫ́ nijéí nayiiłnáa doo, háálá tónteel tséʼnaadę́ę́ʼ daatʼíinii ląʼí bee ákinidláa doo; ałʼąą dineʼé yee daʼatʼíinii naa hindéeh doo.
6 Mídiyan kéyah áádóó Íífah kéyahdę́ę́ʼ ghą́ą́ʼaskʼidii tʼóó ahayóí nikʼíidoodǫ́ǫ́s; éí Shííba kéyahdę́ę́ʼ tʼáá ałtso óola áádóó tsin bijeeh dilidgo łikání halchingo náhániihígíí naa deidooyééł, áádóó Bóhólníihii yaa dahaniihígíí yaa chʼídahodooʼááł.
7 Kíídar kéyahdóó dibé tʼáá ałtso naa áłah ádoolnííł; Niibéíyath kéyahdóó deenástsʼaaʼ ná chodeidooʼįįł; shibikááʼ nááʼiiniihí bikááʼ náádahidoonihgo dínóodzįįł, índa shikin biiʼ sohodizin ayóó átʼéii ayóó ánóolningo biyiʼdóó akʼijishdlíi doo.
8 Kʼos nidaʼajooł nidahalinígíí índa tsésǫʼjįʼ hasbídí nidahalingo dah nídadiitʼahígíishąʼ háí ádaatʼı̨́?
9 Tónteel bibąąhgóó kédaayah shibaʼ ádaatʼée doo, áádóó Bóhólníihii niDiyin God bízhiʼ áádóó Ízrel dineʼé biDiyinii bił danilı̨́į doo biniyé nízaadę́ę́ʼ naʼáłchíní bibéésh łigaii áádóó óola tʼáá bił Társhishdóó tsinaaʼeełgi ádaatʼéii áłtsé bił tséʼnaa nádadiʼyooʼoł, háálá Diyin God bił yínílįįd.
10 Déʼéyóní dabiyeʼ éí ninaa ahéédaʼastłʼinii áńdeidoodlííł áádóó aláahgo binanitʼaʼí danilíinii ná nidaalʼaʼ doo, háálá yéego sháháchįʼgo atíniishłaa, nidi nichʼoshníigo naa aʼáhí niizı̨́ı̨́ʼ.
11 Éí bąą nił yah adaʼiiztiinígíí tʼáá áłahjįʼ ąą ádaatʼée doo; jı̨́įgo áádóó tłʼéeʼgo doo dáńʼdadilkał da doo, áko ałʼąą dineʼé yee daʼatʼíinii naa dayiiyeeh doo áádóó aláahgo binanitʼaʼí danilíinii naa deidiyooʼish.
12 Jó, ałʼąą dineʼé índa bee ídahólníihgo bił nahazʼą́ą́góó doo ná chodaoʼíinii éí ádadoodįįł, áádóó índa tʼáá aaníí éí ałʼąą dineʼé tsʼídá tʼáá ákohígo dazhdooleeł.
13 Shidiyingo hazʼáanii bee hózhónígo ádoolnííł biniyé Dził Lébanan ayóó áhonóolningo bee baa haʼniihii éí gad áádóó tsin akéísha wolyéii índa tsin sáípras wolyéii ahídaóltąʼgo naa hodoolzhish, áádóó dínísʼeezgi ayóó áhonóolningo ádeeshłííł.
14 Nichʼįʼ nidahwiisnááʼ yę́ę baʼáłchíní nichʼįʼ nihidookahgo nitsidadidoogoh, áádóó daniʼı̨́ı̨́ nítʼééʼ yę́ę tʼáá ałtso nikétsı̨́įjįʼ yaa ádadoonííł, índa ádandidooniił, Bóhólníihii bikin haalʼáhígíí, tʼáá éí Ízrel dineʼé biDiyin nilíinii biDził Záíyan yinílyée doo.
15 Azhą́ łah yóóʼandootʼą́ áádóó nijiʼjoosdláaʼgo, áko diné doo łaʼda niyiʼgóó chʼíníyáa da nítʼééʼ nidi, hoolʼáágóó ayóó ánínílnin índa ląʼídi ałkʼi náʼázhchı̨́ı̨́góó ił hózhǫ́ nílı̨́įgo áńdeeshłííł.
16 Ałʼąą dineʼé bitsʼą́ą́dóó íłtʼoʼ doo áádóó aláahgo naatʼáanii danilíinii bibeʼ niłtʼoʼ doo índa shí Bóhólníihii áádóó niYisdáʼiiníiłii índa Náániisniiʼii, tʼáá éí Jéíkab beʼAyóóʼátʼéii nishłı̨́įgo nił bééhodoozįįł.
17 Béésh łitsoii bitsáskʼehgi óola deeshjih, áádóó béésh nitłʼizii bitsáskʼehgi béésh łigaii deeshjih, índa béésh łitsoii éí tsin bitsáskʼehgi áádóó béésh nitłʼizii tsé bitsáskʼehgi deeshjih; ashtʼehodítʼé áádóó tʼáá ákogi átʼéii ninanitʼaʼígo ádeeshłííł.
18 Nikéyahgi doo tsʼííʼádahooníłígíí áádóó tʼáá ádzaaí niʼiileeh índa óʼoodįįłígíí doo baa náádahozdidootsʼı̨́įł da, nidi ninaa ahéédaʼastłʼinígíí bee yisdáʼiildééh bidiníi doo, áádóó nił yah adaʼiiztiinígíí aa haʼniih bidiníi doo.
19 Jı̨́įgo jı̨́honaaʼéí doo bee ná adinídíin da doo, doo nidi tłʼééhonaaʼéí bee ná adinídíin da doo, nidi Bóhólníihii éí hoolʼáágóó ná adinídíín índa niDiyin God bee nideezlíidii ná nilı̨́į doo.
20 Doo anááʼdootʼáał da, doo nidi tłʼééhonaaʼéí anáádoodáał da, háálá Bóhólníihii éí hoolʼáágóó bee ná hoolʼin doo, índa yínííł bił níyoołkáłígíí nidootʼih.
21 Nidineʼé tʼáá ałtso ałdóʼ tʼáá ákogi ádaatʼée doo; shaa haʼniih doo biniyé hoolʼáágóó kéyah daabííʼ dooleeł, háálá tʼáá shí kʼidideeshłééł.
22 Áłtsʼíísígíí éí miil nídoodleeł, áádóó aʼoh áníłtsooígíí éí dineʼé bidziilii dooleeł; shí Bóhólníihii nishłíinii baa hoolzhiizhgo tsxı̨́įłgo ádeeshłííł.
