Isaiah 41:1-29
41 Tónteel bibąąhgóó kéyah danohłíinii, shidááhdóó dadínółhéelgo bíniʼdii diné yee dabidziilii ániidí nídaadleeh; bíniʼdii áháníjįʼ nihekáahgo bíniʼdii yádaałtiʼ; aa hwiinítʼįįhjįʼ áháníjįʼ ahididiikah.
2 Háísh haʼaʼaahdę́ę́ʼ diné yiyiisįʼgo tʼáá ákogi átʼéii yee, Shidááhdóó yiizįįh, yidííniid áádóó ałʼąą dineʼé yinanitʼaʼí ábiilaa índa aláahgo naatʼáanii danilíinii yinantʼáago áyiilaa? Łeezh adiijoołígi átʼéego áádóó ehégod bił deeyolígi átʼéego bidiltłish índa biʼałtı̨́ı̨́ʼ yaa hodiníʼą́.
3 Azhą́ tʼah doo digháhígóó nidi, nahgóó ahoniiłkaadgo doo bá nantłʼagóó chʼéhéghááh.
4 Hodeeshzhiizhdę́ę́ʼ aníchínígíí háísh yichʼįʼ áníigo yinaashnishgo ákódzaa? Shí Bóhólníihii nishłíinii átséhígíí áádóó akéédę́ʼígíí lą́ą éí áshtʼı̨́.
5 Tónteel bibąąhgóó kéyahgi kéédahatʼínígíí daʼiiłtsą́, áádóó bił yééʼ dahazlı̨́ı̨́ʼ; nahasdzáán nidahoneesʼą́ą́dę́ę́ʼ nídaasdzíidgo áháníjįʼ niikai.
6 Tʼááłáʼí jinítínígo bił kéédahojitʼínígíí bíká ajííjééʼ áádóó tʼááłáʼí jinítínígo hakʼisóó danilíinii ádabizhdííniid, Chánah danohłı̨́.
7 Áko kin ííłʼíní éí óola yitsidii chánah áyiilaa, áádóó bee atsidí yee adiiłkǫǫhii béésh nitłʼizii yitsidii ííłní, Ahididoolyįh biniyé hashtʼeelyaa, áádóó ił adaalkaałí bee niłdzil doo biniyé yił adeiskaal.
8 Nidi Ízrel nílíinii, Jéíkab nándiiltínígíí, Éíbraham shikʼis nilíinii bitsʼą́ą́dóó niʼdizhchíinii shinaalʼaʼí nílı̨́.
9 Tʼáá nahasdzáán nidaneesʼą́ą́dę́ę́ʼ aláahgo nahazʼą́ą́dóó níká ádííniidgo nándiiłtíinii nílíinii ándííniid, Shinaalʼaʼí nílı̨́; nándiiłtı̨́ áádóó tsʼídá doo nahjįʼ kóndeeshłíił da.
10 Tʼáadoo nił yéʼí, háálá nił honishłǫ́; tʼáadoo yéego nąąh nááhákaʼí, háálá niDiyin God nishłı̨́; nidziilgo ándeeshłííł; tʼáá aaníí, níká adeeshwoł; tʼáá aaníí, shílaʼ nishʼnáájí tʼáá ákogi áníshtʼéii bee de áníínísin doo.
11 Jó, tʼáá ałtso nichʼįʼ bádahachįʼii ádaa yádadínóozįįł áádóó bíniʼ dadooląąłgo tʼáadoo nídandlíní da doo índa yéego nichʼįʼ nidaaldzilii ádadoodįįł.
12 Hanítáa doo, nidi doo bikʼídíínáał da; nił nidaabaahgo nikʼijįʼ danilíinii éí tʼáadoo nídandlíní da índa tʼáadoo leʼé tʼáadoo násdlı̨́ʼígíí nidahalin doo.
13 Háálá shí Bóhólníihii niDiyin God nishłíinii nílaʼ nishʼnáájí yíníshtąʼgo kóndishníi doo, Tʼáadoo nił yéʼí; níká adeeshwoł.
14 Bóhólníihii nikʼé nináʼídláii éí Ízrel dineʼé biDiyin nilíinii ání, Tʼáadoo nił yéʼí; Jéíkab chʼosh nahonílinii áádóó Ízrel dineʼé hastóí danohłíinii, nihíká adeeshwoł.
15 Jó, bee alghaałí ániidíii,* deeníinii biwooʼ hólóonii ná ádeeshłííł; dził naaznilii hadííłhałgo ádaałtsʼíísígo nihidííłhał áádóó dah daaskʼidii azhool nahalingo ádíílííł.
16 Bíidííłchʼihgo níyol yóóʼadabidiyoojih, áádóó náátsʼóʼoołdísii tadabiidooghas; ni éí Bóhólníihii bee nił hózhǫ́ǫgo Ízrel dineʼé biDiyin nilíinii bee nił nihoozhǫǫh doo.
17 Badahojoobáʼíii áádóó hojoobaʼ nahasʼáanii tó hadeintáago, nidi tó ádingo dibááʼ bikʼee bitsooʼ nídááltseigo shí Bóhólníihii nishłíinii hachʼįʼ éédahodeesįįł; shí, Ízrel dineʼé biDiyin God nishłíinii, doo yóóʼahodideeshʼáał da.
18 Wódahgo nahazʼą́ądi tooh hadaazlı̨́įgo áádóó dahoníteel góyaa ałníiʼgi tó hadaazlı̨́įgo ádadeeshłííł; honoojíigi tó siyı̨́įgo ádeeshłííł, áádóó hóółtseígi tó hadaazlı̨́įgo ádadeeshłííł.
19 Honoojíigi gad áádóó tsin akéísha áádóó mértal áádóó áliv daolyéhígíí kʼidadideeshłééł; halgaidi nídíshchííʼ áádóó chʼó índa tsin sáípres wolyéhígíí adadeestsih,
20 áko Bóhólníihii éí Ízrel dineʼé biDiyin nilíinii díí yaa naayáago áádóó áyiilaago tʼáá ádzíłtso deizdoołtséełgo hoł béédahodoozįįł índa baa nitsídadzikeesgo bikʼidazhdidootı̨́ı̨́ł.
Diyin dabidiʼníinii éí Bóhólníihii nabíneeztą́ą́ʼ
21 Bóhólníihii ání, Ádá hadíídzih; biniyéii yéego bee hadíídzih, ní Jéíkab biNanitʼaʼí nilíinii.
22 Bíniʼdii ádá hadadidziihgo náásgóó áhodooníłígíí nihichʼįʼ ííshją́ą́ ádeiilééh; bíniʼdii ałkʼidą́ą́ʼ ádahoodzaa yę́ę haʼátʼíí ádaatʼéego yitʼíní ádeiiléehgo baa nitsídeiikees doo áádóó bee bá nidahwiiztʼiʼ dooleełii nihił béédahodoozįįł; éí doodaiiʼ, ádahodooníłígíí yee nihił dahodoolnih.
23 Náásgóó ádahodooníłígíí nihichʼįʼ yitʼíní ádaohłééh, áko Diyin danohłı̨́ı̨́ lágo nihił béédahodoozįįł; jó, yáʼátʼéehii, doodaiiʼ doo yáʼátʼéehii ádaahłééh, áko tʼáá łaʼ deidiiltséełgo yéego nihąąh nidahodookał.
24 Shoo, tʼáadoo danohłíní da, nihinaanish nidi tʼáadoo nídandlíní da; nihichʼįʼ nidahałáhígíí éí doo daaldinii nidahaleeh.
25 Náhookǫsdę́ę́ʼ diné łaʼ biisįʼii doogááł; haʼaʼaahdę́ę́ʼ shízhiʼ yíídóozhiił áádóó hashtłʼish ásaaʼ ííłʼíinii hashtłʼish yikʼi naagháhígi átʼéego naatʼáanii danilíinii éí hashtłʼish ditłéeʼii nidahojílingo yikʼi nidoogaał.
26 Hodeeshzhiizhdę́ę́ʼ áádóó tʼáá bítséedi háísh díí yee nihił hoolneʼ, áko nihił béédahózin doogo ádadidiiʼniił, Éí tʼáá ákogi átʼéii nilı̨́? Tʼáá aaníí, doo łaʼda nihichʼįʼ yitʼíní áyiilaa da, tʼáá aaníí, nihił hodoolnihii ádin, tʼáá aaníí, doo łaʼda nizaad yiyíistsʼą́ąʼ da.
27 Shí átsé Záíyan ábidideeshniił, Níníłʼı̨́, níníłʼı̨́, áko haneʼ yáʼátʼéehii yaa halneʼii Jerúsalem baa dideeshʼááł.
28 Áádóó dééʼı̨́įʼgo doo łaʼda yiiłtsą́ą da; bitahgóó dééʼı̨́įʼ nidi kótʼéego níinii ádin, áko nideídééłkidgo shichʼįʼ hadadoodzihgo doo yídaneelʼą́ą da.
29 Jó, tʼáá ałtso tʼáadoo nídandlíní da; binaanish nidi tʼáadoo biniyéhí da; doolyı̨́įʼgo biʼedaʼalyaii éí níyol áádóó ił dahółą́.
Footnotes
^ Tsin bee alghaałí ályaago tsé, doodaiiʼ béésh deeníinii bee diwolgo ályaii.
