Isaiah 34:1-17
34 Ałʼąą dineʼé dadiʼdoohtsʼı̨́ı̨́ł biniyé áháníjįʼ ninohkááh, áádóó nihokááʼ dineʼé nohłíinii, daʼíísółtsʼą́ą́ʼ; bíniʼdii nahasdzáán áádóó biyiʼgi hólóonii tʼáá ałtso, nihokááʼ áádóó bikááʼdóó nihwiileehígíí tʼáá ałtso daʼíísółtsʼą́ą́ʼ.
2 Háálá Bóhólníihii éí ałʼąą dineʼé yichʼįʼ hashké niidzı̨́ı̨́ʼ áádóó hasiláo dah deínéehii yéego yichʼįʼ báháchįʼgo ałtso íísdįįd áádóó nidahoʼdidootsxiłjįʼ hoʼníłniiʼ.
3 Nidabidiztseedii chʼíhidooltłʼiłgo dabitsʼíís bitsʼą́ą́dóó dííłdzid dah didooldoh, áádóó dabidiłę́ę éí dził bąąh danílı̨́į doo.
4 Áádóó yá biyiʼdi dahiníláii ałtso ádoodįįł, áádóó yádiłhił éí naaltsoos yisdisii nahalingo doodis, índa chʼil naʼatłʼoʼii bitʼąąʼ bąąh nandéhígi átʼéego áádóó fig sikaadii bineestʼąʼ nandéhígi átʼéego yá biyiʼdi dahólóonii nidoołdas.
5 Háálá yáʼąąshdi shidiltłish nidíʼnóodlı̨́ı̨́ł; éí kéyah Íídamgi* dineʼé hóyéeʼgo bá haasdzíiʼii atíidoolíiłgo biniyé hadahodooleeł, jóʼakon.
6 Bóhólníihii bidiltłish éí dił bee yishdléézh, áádóó akʼah bee hwiih asdlı̨́ʼígi átʼéego índa dibé yázhí áádóó tłʼízí bidił, áádóó deenástsʼaaʼ bitsą́ áshkʼazhí bikʼah yee hwiih silı̨́ʼígi átʼéego sitą́, háálá Bázra kin haalʼáagi Bóhólníihii nááʼiiniih áyiilaa áádóó kéyah Íídamgi ayóó átʼéego naʼastseed.
7 Áádóó béégashii ałchinii yił ádoodįįł; éí dóola yázhí áádóó dóola ałdóʼ tʼáá bił, áádóó bikéyah dił bee nídooltłoh, índa łeezh dibahí éí akʼah bee niłhin nahalin doo.
8 Háálá Bóhólníihii kʼéédíʼnééh beiníłką́; Dził Záíyan yá kʼéédidooʼníłígíí baa hoolzhíísh.
9 Áko Íídamgi tó danílínígíí łeejin dijéʼígíí nídoodleeł, áádóó łeezh dibahí éí tsékǫʼ nídoodleeł, índa éí kéyahígíí łeejin dijéʼígíí dookʼą́ąłii dooleeł.
10 Tłʼéeʼgo áádóó jı̨́įgo doo dinóotsis da; hoolʼáágóó bilid yaatʼiʼ doo; ałkʼi hááʼiiyoochííłgóó tʼáadoo biniyéhígóó hazʼą́ą doo; doo łaʼ yiiʼgóó chʼínádáhígóó hoolʼáágóó ahoolʼáa doo.
11 Nidi naalʼeełí áádóó tsékʼi naʼazólii yee ádídahólníih doo, índa néʼéshjaaʼ áádóó gáagii ałdóʼ ákwii kéédahatʼı̨́į doo. Ákwii béésh bee ídaʼneelʼąąhí ił hodoołąąłígíí índa tsé dah naalchʼąąłgo bikʼehgo íʼneelʼąąhí bee doo siláhígóó íidoolííł.
12 Diné daʼílíinii bee óhólníihgo bił hazʼą́ąjįʼ hágo deididooniił, nidi doo łaʼ ákwii doogáłí da, índa binanitʼaʼí tʼáá ałtso tʼáadoo danilíní da doo.
13 Áádóó aláahgo naatʼáanii dabighan yę́ęgóó chʼil deeníní hadadínóosééł índa bineʼ naʼadziʼ bił nahazʼą́ yę́ęgóó chʼil biwosh dahólóonii áádóó chʼil daʼdishahii hadadínóosééł; mąʼii áádóó tsídiitsoh ástrich wolyéii dabighan dooleeł.
14 Honoojíídóó naaldlooshii daʼałchinii éí naaldlooshii daachago hahóółʼáii yił ahínéikah doo, áádóó tsétah tłʼízí yił ałchʼodaoʼnínígíí yíká yicha; yee naaldlooshii bináłtʼéii ałdóʼ ákwii hááhályı̨́įhgo bá hazʼą́ą doo.
15 Ákwii tłʼiish kʼaaʼ bitʼoh anáyiilʼįįhgo náʼálchíih doo áádóó biyázhí néidiiłjahgo bichahaʼoh anéiʼnił doo; ákwii jeshóóʼ ałdóʼ tʼááłáʼí nítínígo biʼáadii yił áłah nádleeh doo.
16 Bóhólníihii binaaltsoos biyiʼdóó naniłkaahgo yíníłtaʼ; díí doo łaʼ ádin da dooleeł, biʼáadii doo chʼééh háidéezʼı̨́įʼ da doo; tʼáá bí yee haadzííʼ áádóó biníłchʼi yee áłah áyiilaa.
17 Áádóó tʼáá ałʼąą bá nahazʼą́ągo áyiilaa índa yídaʼneełʼąąhgo yá ałtsʼádeiznil; hoolʼáágóó daabí dooleełgo ałkʼi hááʼiiyoochííłgóó ákwii kééhatʼı̨́į doo.
Footnotes
^ Íídam kéyah éí Idumíya ałdóʼ wolyé. Is. 63:1-6; Jer. 49:7-22; Ezek. 25:12-14; 35:1-15; Amos 1:11,12; Obad. 1-14; Mal. 1:2-5.
