Isaiah 31:1-9
31 Ííjip kéyah góyaa bíká iʼdoolwoł yiniyé ałnáádaakahgo áadi łı̨́ı̨́ʼ índa tsindaabąąs bijáád naakiígíí tʼóó ahayóígíí biniinaa yaa dadzólíii áádóó łı̨́ı̨́ʼ yee nidaabaahii ayóo dabidziil biniinaa yaa dadzólíii doo hojoobaʼ ájíníi da! Éí Ízrel dineʼé biDiyin nilíinii doo yichʼįʼ chodaʼoołʼı̨́į da índa Bóhólníihii doo hádaatʼı̨́į da.
2 Azhą́ ákódajítʼée nidi, bí éí hóyą́ągo doo yáʼátʼéhígi áhodooníiłgo íidoolííł áádóó bizaadígíí doo łahgo ánéidoodlíił da, áko doo yáʼáshóonii yaa nidaakaii bighan hazʼą́ą́dóóígíí áádóó doo ákwii átʼéii yaa nidaakaigo háká anájahii yikʼijįʼ dooldził.
3 Áko Ííjip dineʼé éí bílaʼ ashdlaʼii danilı̨́; doo éí Diyin God danilı̨́į da áádóó bilı̨́ı̨́ʼ éí atsįʼ ádaatʼé; doo éí níłchʼi átʼée da. Áko Bóhólníihii kʼídeeshchidgo áká ajilyeedii áádóó háká oʼoolwodii tʼáá ájíłah naʼazhdínóodah índa tʼáá ádzíłtso ádazhdoodįįł.
4 Jó, Bóhólníihii éí shichʼįʼ haadzííʼ, Náshdóítsoh bitsiijįʼ ditłʼooígíí áádóó biyázhí yił yidoolghałii shóyoostʼeʼgo biyiʼ nahodiʼniʼgo éí bikʼijįʼ naʼniłkaadii tʼóó ahayóí dadoobah biniyé hágo dabiʼdooʼniidgo dabiinéʼígíí doo yináldzidígi átʼéego índa hahóółʼáhígíí doo yikʼee dínóolyisígi átʼéego tʼáá ałtsoní bee Bóhólníihii éí Dził Záíyan áádóó deílkʼidii yikʼijįʼ doobah biniyé hadahodooleeł.
5 Tsídii akááʼ dah naatʼaʼígi átʼéego tʼáá ałtsoní bee Bóhólníihii éí Jerúsalem yá dooba; ákótʼı̨́įgo yisdéidoojih, índa yikááʼgóó chʼíhoníleʼgo yaa áhályą́ą doo.
6 Ízrel dineʼé yéego hakʼijįʼ nidaalteehii hachʼįʼ ninádookah.
7 Jó, éí yoołkáałdi diné tʼááłáʼí nítínígo ídaʼalyaii béésh łigaii áádóó óola bee ádaalyaii, éí nihílaʼ bee ádaahłaago bee ádił daʼsoohsiihii yóóʼádeidiyoołkał.
8 Áko índa Asíriya dineʼé éí doo diné bidiltłish yikʼee naaʼadínóodah da; tʼáá éí diltłish doo diné bíhígíí ábidoołdįįł, nidi diltłish yitsʼą́ąjįʼ dah dínóochééł, áádóó bitsíłkéí éí tʼóó naalteʼ dadooleeł.
9 Áádóó tsé bineʼ aʼniichéehii yóóʼadoolmas índa binanitʼaʼí danilíinii nídaaldzidgo bidah naʼatʼaʼí yitsʼą́ąjįʼ dah didoojah, ní Bóhólníihii; bikǫʼ éí Dził Záíyandi áádóó bidéédíljahii éí Jerúsalemgi hólǫ́.
