Isaiah 3:1-26
3 Háálá, jóʼakon, tʼáá ałtsoní bee Bóhólníihii éí Jerúsalemgi áádóó Júdahgi bááh áádóó tó tʼáá átʼé ádingo áyiilaa;
2 diné hayóii áádóó diné naabaahii, ánihwiiʼaahii áádóó atsijįʼ halneʼii, bił áhátʼíinii áádóó hastóí nilíinii,
3 siláo ashdladiin yinantʼáii áádóó diné ił nilíinii, achʼįʼ yáltiʼii áádóó naʼachʼąąh yiyiichįįhii índa indzinii ádaadingo áyiilaa.
4 Áłchíní honanitʼaʼí danilı̨́įgo áhodeeshłííł áádóó awééʼ danilíinii hwee ádídahólníih doo.
5 Diné ahidiníłnáago ałkʼijįʼ danidlı̨́į doo; tʼááłáʼí nítínígo bikʼis áádóó bił kéédahatʼíinii yichʼįʼ ákódaatʼée doo: ániid nidaakaii éí hastóí yighá ádadoolʼáa doo, índa diné doo joobaʼii éí diné ił nilíinii yikʼijįʼ nilı̨́į doo.
6 Diné łaʼ bizhéʼé bighangi hakʼis yizdoołtsołgo ábizhdidooniił, Niʼéénééz nee hólóonii nihinanitʼaʼí dííleeł; nidahaazhchǫʼgo yáádaaʼáhígíí bee níhólníih doo.
7 Éí jínídi ádidooniił, Shí doo náádiʼyiiłáahii nishłı̨́į da doo, háálá shighan góneʼ bááh áádóó ééʼ ádin, áko diné binanitʼaʼí doo ádashidoohłíił da.
8 Jó, Jerúsalemgi hóóchǫʼ áádóó Júdah kéyah baa honeezná, háálá Bóhólníihii aláahgo bee bitsʼádiʼnílíidii doo deiniizı̨́ı̨́ʼgóó yikʼijįʼ yádááłtiʼ índa yikʼijįʼ nidaasdzil.
9 Biniiʼjįʼ bee bééhózingo; Sádamgi kéédahatʼíinii bibąąhági átʼéii yitʼíní silı̨́ʼígi átʼéego bąąhági átʼéii tʼáadoo yee nídeidółʼı̨́łígóó yee ádadootʼı̨́. Dooládóʼ biiʼ naazíinii bichʼįʼ doo hojoobaʼ ájíníi da, háálá doo yáʼáshóonii ádíkʼijįʼ yídaalná.
10 Tʼáá ákogi ádaatʼéii bee bił dahołneʼgo tʼéiyá yáʼátʼéehgo kéédahatʼı̨́į doo, háálá yáʼátʼéehgo ádaaníłígíí binahjįʼ aneestʼąʼ deiyą́ą doo.
11 Dooládóʼ doo yáʼájíshóonii hachʼįʼ doo hojoobaʼ ájíníi da! Háálá doo yáʼátʼééhgóó kééhojitʼı̨́į doo; jó, tʼáá hó ájiilaii bikʼehgo hachʼįʼ ánáhodooʼnííł.
12 Shidineʼé danilíinii éí áłchíní hachʼįʼ nidahwiiłná áádóó sáanii ałdóʼ hwee ádídahólnííh. Shidineʼé danohłíinii, nihindanitʼaʼí tʼáá áhoodzaagóó danihíʼéésh áádóó bikʼehgo dayínóhkáahii nihitsʼą́ą́ʼ nidayiishchxǫʼ.
13 Bóhólníihii bidineʼé yił ahaa nidookah yiniyé yiizįʼ áádóó yaa nídóotʼįįł yiniyé sizı̨́.
14 Bóhólníihii éí bidineʼé badahastóí áádóó bindanitʼaʼí yaa nídóotʼįįłjįʼ yah iidiyooʼish; nihí lą́ą chʼil naʼatłʼoʼii ałtso nidahishoołchxǫʼ; badahojoobáʼíii bindaalyeʼé danihighanjįʼ dasoołná.
15 Haʼátʼíishąʼ biniyé shidineʼé niłjizh áádóó badahojoobáʼíii nihidadíníilʼą́ągo bikʼi naałdeeh? ní tʼáá ałtsoní bee Bóhólníihii Diyin God.
Záíyangi sáanii baa náhódóotʼįįł
16 Bóhólníihii ánáádooʼniid, Záíyan bichʼéʼéké ádaa deidzódlí áádóó shidáhodínóoniił, danízingo dah danéetʼaahgo áádóó yooʼ achaaí bikétsíín dadiitsʼaʼgo hadahidilʼéesgo nidaakai;
17 éí bąą Bóhólníihii éí Záíyan bichʼéʼéké bitsiitahgóó łóód bikʼi nidahaazkę́ęzgo yee atíhodoolííł áádóó Bóhólníihii éí tʼáá łichíʼígo nidajikaigo áhodoolííł.
18 Éí bijı̨́ Bóhólníihii kódoonííł éí kétsíín náztʼiʼii dadiitsʼaʼígíí áádóó chʼah nidaashchʼąąʼii áádóó yooʼ dahiitą́ bidaʼalyaago,
19 jaatłʼóól áádóó látsíní áádóó aniiʼjįʼ bikʼíndaaltihii nizhóníii,
20 chʼah áádóó béésh daʼahólzhaʼí akétsíín náztʼiʼii áádóó bee áká náʼálzisii áádóó łikání bee dahojílchinii áádóó tsʼáhoníyééʼ bizéédaaztʼiʼ,
21 yoostsah áádóó áchı̨́ı̨́h bił dah nídaatı̨́hí,
22 ééłgaii agháadi ádaatʼéii áádóó éénééz áádóó dáábalí áádóó béeso bizis nidaadlóʼígíí,
23 biiʼ adéestʼı̨́ı̨́ʼ áádóó áłtsʼóózígo yisdizígíí bee naʼatʼą́hí łigaii ditsʼidgo ályaii ééʼ áádóó tsiighá bił ííʼáhí áádóó nidaneeszahgo aniiʼjįʼ bikʼídaastiʼí éí bee ádazhdilzhóní yę́ę tʼáá ałtso Bóhólníihii hatsʼą́ąjįʼ kwíidoolííł.
24 Ákódaadzaago bee łikání dahojílchinii dííłdzid dahalchin doo; bee áká dadziszaazii tłʼóół tʼéiyá dooleeł; bitsiiʼ nizhónígo nidaashchʼąąʼii bídáátʼóod doo; ééłgaii yiih nídaakahii tłʼoh azis ééʼ nídadoodleeł; dajízhóní yę́ę tʼóó haa yádahasin doo.
25 Nidiné danilíinii diltłish bee nidadootsił; nidiné dahayóii anaaʼdi nidadootsił.
26 Áko bidáńʼdaʼditı̨́hígóó daachxago yínííł danilı̨́į doo, índa tʼáadoo hąąhígóó niʼgóó dzizdáa doo.
