Isaiah 18:1-7
18 Dooládóʼ Iithiyópiya kéyahdóó tooh danílínígíí biláahdi kéyah biyiʼdóó atʼaʼ dadiitsʼaʼ nahalinii
2 áádóó teeł bee tsinaaʼeeł ádaalyaago bee tónteel bikááʼgóó nidaalʼaʼí adabidiʼyiilʼaahii doo hojoobaʼ ájíníi da! Diné danineezii áádóó bikágí daalzhóólígíí áádóó akʼeh dadidlı̨́įgo índa ídaʼoołdįįłgo kodóó adahwiisʼáágóó diné béédaaldzidgo bikʼee bił daayéeʼii éí kéyahgi tooh danílı̨́įgo bee nidahwiisdzoh biyiʼgóó naalʼaʼí tsı̨́ı̨́ł ádaahtʼíinii, nílááh, díí diné bichʼįʼ dadohkááh!
3 Nihokááʼgóó naołdeehii tʼáá ánółtso, niʼ bikááʼgóó kéédahohtʼíinii, dziłghą́ą́ʼdóó dah naʼatʼaʼí dah diiltsoozgo dadínóołʼįįł, áádóó deenástsʼaaʼ bideeʼ bee íʼdílzoołí diistsʼą́ʼígíí dadidoohtsʼı̨́ı̨́ł.
4 Háálá Bóhólníihii áshidííniid, Nił tólígo tłʼoh bikʼijįʼ adinídíín nahonishłingo áádóó honeezdogo daʼagizhgo áhí bitsʼą́ą́dóó dahtooʼígíí nahonishłingo áhodííníszéeʼgo kééháshtʼı̨́ı̨́dóó haʼídíníshʼı̨́įʼ doo.
5 Háálá tʼah doo daʼagizhgóó chʼil naʼatłʼoʼii bizólígíí daniiłnahgo nidahindah, nidi bineestʼąʼígíí dahidíníséehgo daʼdiyiitłʼóóh aʼoh ádaatʼéhígíí béésh deeníinii bee náhágish áádóó atsʼádaʼiitłʼóhígíí ałdóʼ níjiigish.
6 Éí yę́ę dziłdę́ę́ʼ tsídii áádóó nihokááʼ naaldlooshii bá tʼáá ákǫ́ǫ́ nidadeeztąąd doo; shı̨́ bíighah tsídii dayíłkiin dooleeł áádóó hai bíighah naaldlooshii dayíłkiin dooleeł.
7 Éí hoolzhishdi diné danineezii áádóó bikágí daalzhóólígíí índa akʼeh didlı̨́įgo áádóó ídaʼoołdįįłgo kodóó adahwiisʼáágóó diné béédaaldzidgo bikʼee bił daayéeʼii, éí kéyahgi tooh danílı̨́įgo bee nidahwiisdzoh biyiʼdę́ę́ʼ Dził Záíyanjįʼ tʼáá ałtsoní bee Bóhólníihii bízhiʼ bee hójíijįʼ aa doolyéełii nidahizhdoojih.
