Isaiah 16:1-14
16 Sííla hazʼánídóó honoojíí góde Záíyan bitsiʼ bidziłghą́ąʼgi kéyahdóó naatʼáanii dibé yázhí baa dahinołkaad.
2 Jó, ákótʼée doo: tsídii yázhí bitʼoh bił nidahaasdáazgo tʼóó nídantłohígi átʼéego Árnan tooh nílíníjįʼ Móʼab bitsiʼké tʼóó nídantłoh.
3 Kótʼée doo, bidiní, doo haada yitʼéii bee bichʼįʼ handziih; tłʼéeʼgo honeezkʼázígi átʼéego ałníʼníʼą́ągo nichahaʼoh biyaagi dahoneezkʼázígo ádíílííł; yóóʼadabiʼdiistʼáanii náhidíłʼįįh; yóóʼahineezhchą́ʼígíí tʼáadoo átsʼéínílnání.
4 Hániʼdii Móʼab kéyahdę́ę́ʼ yóóʼadabiʼdiistʼáanii nił kééhatʼı̨́į doo; ábidoołdįįłii bitsʼąą baa áhólyą́, háálá bide íinízinii yichʼįʼ niidooléełii ninítʼiʼgo niʼiiłchǫǫhii ásdįįd; kéyahgi ade ádahósinii ádabiʼdisdįįd.
5 Áádóó bikááʼdóó nahatʼáii aa aʼááh hasin bił yitʼihgo hazʼą́ą doo áádóó ákwii David biníbaal biyiʼ góneʼ łaʼ tʼáá aaníinii yee dah sidáa doo, áádóó ánihwiiʼaahgo áádóó doo haada yitʼéii hátʼı̨́į doo, índa haneetehee tʼáá ákogi ááníił doo.
6 Móʼab dineʼé éí ayóogo ádeidzódlíigo bibee ádaa hodzódlí yee aizdooʼı̨́ áádóó yee agháʼádoolʼáago índa tʼóó báhádzidgo báháchįʼgo baa dahosidiitsʼą́ą́ʼ, nidi yee ádaa haʼniihii éí woochʼííd átʼé.
7 Éí bąą Móʼab dineʼé chaał hahoyiiníih doo; tʼááłáʼí jinítínígo Móʼab kéyahgi dajicha doo, áádóó Ker-háraseth kin haalʼáádóó tʼáadoo náhódleʼígóó chʼil naʼatłʼoʼii ahídiiłjéeʼii yaa daacha.
8 Háálá Héshban kin haalʼáagi dádaʼakʼeh áádóó Síbmah kin shijaaʼgi chʼil naʼatłʼoʼii kʼidoolyáhígíí ałtso daniiłnaʼ; chʼil naʼatłʼoʼii yáʼátʼéehii kʼideideezlaʼígíí tʼáá Jéízer kin haalʼáágóó áádóó dahonoojíígóó kʼeeʼąą nídadínéestʼáanii áádóó bitsʼádaozʼaʼ tónteel biláahjįʼ adahineesáanii éí ałʼąą dineʼé bibídahólníihii nayéskai.
9 Éí bąą Jéízer kin haalʼáagi daachaaígíí éí bił Síbmah kin shijaaʼgi chʼil naʼatłʼoʼii kʼidoolyáhígíí baa yishcha doo; Héshban kin haalʼá áádóó Iiliyéíleh kin shijaaʼ nohłíinii, shinákʼeeshtoʼ nihikʼijįʼ náálı̨́, háálá shı̨́įgo nihiʼaneestʼąʼ áádóó nínádanołtʼı̨́įhii baa dahohtaał yę́ę doo íistsʼą́ʼí da.
10 Dáʼákʼehgóó nínádeiniłtʼı̨́hígíí yaa bił dahózhǫ́ yę́ę áádóó bee bił dahózhǫ́ yę́ę bił ahóóyáa doo; chʼil naʼatłʼoʼii kʼidadeesyaʼídi doo dahojitaał da doo, áádóó doo hodiwosh da doo; chʼil naʼatłʼoʼii yiljizh biniyé hazʼánígi tʼáadoo náájółjizhí da doo; baa hoł dahózhǫ́ yę́ę doo íitsʼaʼígóó áhooshłaa.
11 Éí bąą tsin tłʼóół bąąh daneelzheeʼgo bee nidaʼaʼnéii diitsʼaʼ nahalingo tʼáá shiyiʼídi Móʼab kéyah áádóó shijéí tłʼááhdę́ę́ʼ Ker-háraseth kin haalʼá baa yishcha.
12 Áádóó bikʼijįʼ Móʼab éí ninádahałaah doo biniyé wódah nahazʼą́ągo ályaadi naagháago nídínéesdzá áádóó bihodiyingo hazʼą́ągi sodidoolzįįł biniyé doogáałgo bisodizin yee chʼééh ádootʼįįł.
13 Bóhólníihii díí saadígíí yee Móʼab dineʼé yeinítʼı̨́įgo yaa yáłtiʼgo haadzííʼ.
14 Nidi kʼad Bóhólníihii haadzíiʼgo ání, Tááʼ nááhaidóó bikʼijįʼ ííshją́ą́ Móʼab yee ayóó átʼéii áádóó bidineʼé tsʼídá tʼóó ahayóigo tʼáá ałtso bił bá nidahatʼiʼ dooleeł, áádóó tʼáá díkwíí daadzíʼígíí éí doo dabidziil da dooleeł. .. American Bible SocietyLearn
