Hebrews 6:1-20
6 Éí bąą haaʼíshąʼ Christ bínaʼniltinígíí átsé bee nidanihidiʼneestą́ʼígíí doo éí tʼéiyá bee nidaʼahiniitin da dooleeł, nidi diyin kʼehgo nidíníilzéełii bichʼįʼ náás yiikah doo. Kin bitłʼááh nástłʼinii hanáájítłʼinígíí nahalingo átsé bee nidanihidiʼneestą́ʼígíí bee nináádaʼahiniitingo éí dooda. Átsé bee nidanihidiʼneestą́ʼígíí éí díí: tʼáadoo biniyéhígóó baa nidasiikaii łahgo átʼéego bąąh tsíńdahiikeesgo Diyin God deiniidlą́ągo,
2 áádóó díí bee naʼnitinii: tó bee alzı̨́ı̨́h, índa akʼi dah adinííh, áádóó aninéédę́ę́ʼ nááʼdiijeeh, índa hoolʼáágóó atéʼélʼı̨́.
3 Haaʼíyeeʼ Diyin God nihaʼdiʼníʼą́ą́ ládą́ą́ʼ náás náánéiikah doo.
4 Diné łaʼ haneʼ yáʼátʼéehii bee hoł chʼídadeezdláád; yáʼąąshdę́ę́ʼ bee akʼihojidlíii bee hakʼidahodzisdliʼ; Níłchʼi Diyinii bibee adziilii łahjįʼ hwee dahazlı̨́ı̨́ʼ;
5 Diyin God bizaad éí yáʼátʼéehii átʼé dazniizı̨́ı̨́ʼ, áádóó łahgo náhodeesdzáago bee adziil dooleełígíí łaʼ hoł béédahoozin.
6 Éí tʼą́ą́ʼ anídahizneezdeeʼgo łahgo átʼéego tsínáhodookosjįʼ ánáhodiʼyootʼishgi tsʼídá doo bohónéedzą́ą da, háálá tʼáá hó hániikʼeh tsin ałnáoszid bikáaʼjįʼ Diyin God biYeʼ bił anáádaʼdziskaal nahalingo bee baa nináájíkai, índa tʼáá ííshjání nilı̨́įgo tʼóó baa yáhásinígi ánáádajííłʼįįd.
7 Kéyahgi tʼáá ahą́ą́h nááháłtı̨́įhgo tó łeeh sinitséedii, áádóó naniseʼ chodaoʼíinii yindaalnishii bá hááhinootʼı̨́įłii éí bá Diyin God yikʼijidlíi łeh.
8 Nidi bikáaʼgi hosh índa chʼil deeníní hanootʼą́ągo, éí doo ílı̨́ı̨́góó baa nitsáhákees, índa doolchxǫǫłgo bá haʼdoodzihgi bichʼįʼ hoolzhish, áko tʼóó kǫʼ bee adidoolkʼą́ą́ł.
9 Nidi ayóóʼádanihííníshʼníinii, azhą́ kótʼéego nihichʼįʼ ádadiiʼníi nidi, aají nihí nihił hazʼą́ą́jí tʼáá aaníí yisdánáhisoohkaigo éí bee akʼihojidlíii yee nihikʼijidlíigo nihił béédahózin, éí tʼah aláhígo yáʼádaatʼééh.
10 Háálá baa nidasoohkaígíí áádóó Diyin God bidiyı̨́ı̨́ʼ ayóóʼádeínóhʼníigo bá nidasoołʼaʼígíí, kʼad Diyin God tʼáá ákogi éʼéłʼı̨́įgo tʼahdii bá nidaałʼaʼígíí doo yaa yoonéeh da.
11 Áko tʼááłáʼí nootínígo tʼáá nihonítʼiʼjįʼ tʼáá ákótʼéego bídanoohdlı̨́į doo danihííníiʼní, áko bíká nihił chodahooʼíinii nihá biʼdoolnííł.
12 Tʼáadoo ádadahodoohłáhí, nidi daʼoosdląądgo hadaʼólníigo Diyin God aidiníʼáanii bííʼ dadooleełígíí bidaʼołʼı̨́į leʼ.
Diyin God éí Éíbraham yeidiníʼáanii
13 Diyin God éí Éíbraham yichʼįʼ haadzííʼ yę́ędą́ą́ʼ náánáłaʼ yiláahdi átʼéii biniitʼaa ádee hadidoodzihígíí tʼáá ádingo biniinaa tʼáá bí ádee hadoodzííʼ,
14 kóníigo, Nikʼijishdlíigo éí tʼáá íiyisí nikʼijishdlíi doo, áko kʼeeʼąą noohtʼı̨́įłgo éí nitsʼą́ą́dóó tʼáá íiyisí kʼeeʼąą anootʼı̨́įłgo ándeeshłííł.
15 Áko Éíbraham nízaadgóó haʼjoosniidgo Diyin God hachʼįʼ yee ádee hadoodzíiʼii hwee hazlı̨́ı̨́ʼ.
16 Tʼáá háiida ádee hadidzihgo diné haláahdi átʼéii biniitʼaa ádee hadidzih łeh, ákótʼéego doo ałghaʼditʼááh nááhódlǫ́ǫ da.
17 Diyin God binahatʼaʼ doo łahgo ánáoʼneʼ átʼéii yee haadzíiʼii hwee dahodooleełígíí tsʼídá tʼáadoo naaki nilíní hoł béédahózingo áhodeeshłííł niizı̨́įʼgo ádee hadoodzííʼ.
18 Áko naaki góneʼ hazʼą́ tsʼídá doo łahgo ánáoʼneʼ átʼéii yee Diyin God doo biyoochʼííd wóleʼ átʼée da. Áko éí binahjįʼ nihí doo yáʼátʼéehii bikʼee Diyin God bichʼįʼ adahiniichą́ąʼii yáʼátʼéehii nihidáahdi hólóonii bíká nihił chodahooʼíinii deidiiltsołgo yéego bee chánah daniidlı̨́į doo.
19 Tsinaaʼeeł bee dah náhátłʼóohii nahalingo éí bíká nihił chodahooʼíinii bee nihiiʼ naazíinii daniłdzil. Aláahgo nááʼiiłniihii dáádiníbaal bineʼgóó Diyin God hólǫ́ǫdi yah anádááh yę́ęgi átʼéego nihí éí bíká nihił chodahooʼíinii Diyin God baa hiikai.
20 Jesus éí Diyin God hólǫ́ǫdi nihilą́ąjįʼ yah ííyá. Éí Melkízedek nááʼiiłniihii nilı̨́ yę́ęgi átʼéego hoolʼáágóó aláahgo nááʼiiłniihii silı̨́ı̨́ʼ.
