Exodus 8:1-32
8 Ákohgo Bóhólníihii éí Mózes áyidííniid, Nílááh, Féro bił yah anináahgo ábidiní, Bóhólníihii kóní, Shidineʼé bééʼníłnííh, áko shichʼįʼ nidahałáa doo.
2 Nidi doo bééʼníłnííhgóó, jó, nihił hahoodzojįʼ chʼał deeshłąął.
3 Tooh biyiʼdóó chʼał tʼóó ahayóí hadoołnihgo nikin góneʼ áádóó nítééh góneʼ índa nitsáskʼeh bikáaʼjįʼ adooldah; ná nidaalʼaʼí dabighan góneʼ yah adooldah, áádóó dineʼé bikʼiidooldah; danihibááh bighan góneʼ índa nihibiiʼtáádaʼooʼnihí biyiʼ góneʼ ahidooldah.
4 Chʼał nihikʼiidooldah; nidineʼé índa ná nidaalʼaʼí tʼáá ałtso bikʼiidooldah.
5 Áko Bóhólníihii éí Mózes áyidííniid, Éran kóbidiní, Tooh danílínígíí áádóó tó dadeezlínígíí índa bedaʼakʼid bichʼįʼ nigish bił dah didiilnííh, áko Ííjip kéyah bikááʼgóó chʼał dooląął.
6 Ákohgo Ííjip kéyahgi tó yichʼįʼ Éran bigish yił dah didiilniiʼ, áko áádę́ę́ʼ chʼał haaldeeʼgo Ííjip kéyah ałtso yikʼi diilkǫʼ.
7 Áko álíleego ádaʼoołʼįįłii bedaʼálííl yee tʼáá ákónáádaʼiidlaa, áko Ííjip kéyahjįʼ chʼał nááníłniiʼ.
8 Tʼáá áko Féro éí Mózes áádóó Éran hágo yidííniidgo ání, Bóhólníihii shá néinikąąh, shí áádóó shidineʼé bił nihitsʼą́ąjįʼ chʼał nahgóó kónéidoodlííł, áko diné bééʼdeeshʼnihgo Bóhólníihii yichʼįʼ náádaʼdiʼyoołnih.
9 Áko Mózes éí Féro áyidííniid, Ná ashjaʼóhsingo ni áádóó ná nidaalʼaʼí índa nidineʼé nihá Bóhólníihii néideeshkąął, áko nihighan hazʼánígóó chʼał nihikʼóoznánígíí ałtso ádooldįįł, áko tooh tʼéí yiiʼ hólǫ́ǫ doo.
10 Áko Féro ání, Yiską́ągo lą́ą. Áádóó Mózes ánáázhdooʼniid, Tʼáá háínídzíʼígi átʼée doo, áko díí nił bééhodoozįįł: tʼáadoo łaʼ Bóhólníihii nihiDiyin God átʼéhígi átʼéhí da.
11 Áko chʼał nihikʼóoznánígíí éí ni lá áádóó danihighandóó áádóó ná nidaalʼaʼí índa nidineʼé bitsʼą́ąjįʼ anídoołnih, áko toohdi tʼéí hólǫ́ǫ doo.
12 Mózes áádóó Éran éí Féro bitsʼą́ą́ʼ chʼízhníʼáázh, áko Féro bikʼijįʼ chʼał yiníłniiʼígíí biniinaa Mózes éí Bóhólníihii náyookąąh.
13 Áko Bóhólníihii éí Mózes náhooskanígíí biʼjiilaago daakingóó áádóó kin dah naazhjaaʼgóó índa anídaʼaztʼiʼgóó chʼał ałtso daneezná.
14 Áko chʼał tʼááłáhíjįʼ yáádaaʼáago ádayiilaa áádóó kéyah tʼáá íiyisí hółchxon silı̨́ı̨́ʼ.
15 Áko Féro bikʼi hooldogo bił bééhoozingo bijéí náánáátłʼisgo doo nááhwíistsʼą́ąʼ da; Bóhólníihii ádííniidígi áhoodzaa.
Yaaʼ bee atíʼályaaígíí
16 Áko Bóhólníihii éí Mózes áyidííniid, Éran kóbidiní, Nigish bił dah náádidiilníihgo łeezh dibahí nídiiłhaał, áko éí Ííjip kéyahgi tʼáá átʼéé nítʼééʼ yaaʼ dooleeł.
17 Áádóó tʼáá áhoʼdooʼniidígi ádziidzaa; Éran hagish bił dashdidiilniiʼgo łeezh dibahí nízhdííłhaalgo łeezh dibahí yaaʼ daazlı̨́ı̨́ʼ. Diné bikááʼgóó índa naaldlooshii bikááʼgóó łeezh dibahí tʼáá átʼé yaaʼ daazlı̨́ı̨́ʼ. Ííjip kéyahgi tʼáá átʼéé nítʼééʼ ákódzaa.
18 Áko álíleego ádaʼoołʼįįłii bedaʼálííl yee tʼáá ákódaʼalééh nítʼééʼ; chʼééh ádáátʼįįdgo tʼáadoo yaaʼ hazlı̨́įʼ da, áko diné áádóó naaldlooshii éí yaaʼ baa níłniiʼ.
19 Ákohgo álíleego ádaʼoołʼįįłii éí Féro ádeidííniid, Díí Diyin God bílaʼ yee átʼı̨́ı̨́ lá, nidi Féro bijéí yítłʼisgo doo hwíistsʼą́ąʼ da; Bóhólníihii ádííniidígi áhoodzaa.
Tséʼédǫ́ʼii bee atíʼályaaígíí
20 Áko Bóhólníihii éí Mózes áyidííniid, Tʼah abíínídą́ą́ʼ nídidííʼnahgo toohgi Féro níyáago bidááhdę́ę́ʼ nidíínááł, háálá tóógóó deeyá, áko ábididííniił, Bóhólníihii kóní, Shidineʼé bééʼníłnííh, áko shichʼįʼ nidahałáa doo.
21 Doodaiiʼ, shidineʼé doo bééʼníłnííhgóó, jó, ni áádóó ná nidaalʼaʼí áádóó nidineʼé índa danihighan góneʼ tséʼédǫ́ʼii nihił dah nídaʼasołgo ádeeshłííł, áádóó Ííjip dineʼé dabighan góneʼ tséʼédǫ́ʼii bił dah nídaʼasoł doo índa niʼgóó nidi ałkʼídaʼasoł doo.
22 Áko éí bijı̨́ Góshen kéyahgi shidineʼé kéédahatʼínígíí atsʼádeeshʼáałgo áadi tséʼédǫ́ʼii doo bił dah nídaʼasoł da doo, áko nahasdzáán bikáaʼgi shí Bóhólníihii nishłı̨́įgo nił bééhodoozįįł.
23 Áko shidineʼé índa nidineʼé doo aheełtʼéego bił hazʼą́ą́góó ádeeshłííł; yiską́ągo díí bee ééhózinii ádoolnííł.
24 Áádóó Bóhólníihii ákóʼiilaa, áko Féro bikin góneʼ áádóó bá nidaalʼaʼí dabighan góneʼ índa Ííjip kéyah tʼáá átʼéé nítʼééʼ tʼóó báhádzidígi ánéelą́ąʼgo tséʼédǫ́ʼii haalzhiizh, áko tséʼédǫ́ʼii haalzhiizhgo bee hóóchxǫʼ.
25 Áko Féro éí Mózes índa Éran yíká ádííniid, Nihílááh, tʼáá nihiDiyin God bichʼįʼ díí kéyahgi náádaʼiyołniih.
26 Áko Mózes ádííniid, Ákódeiidzaago doo beełtʼée da, háálá Bóhólníihii nihiDiyin God bichʼįʼ náádaʼiyeelniiʼgo éí Ííjip dineʼé tʼóó baaʼihígi yaa nitsídaakees doo. Jó, nihí Ííjip dineʼé binááł náádahiilniiʼígíí tʼóó baaʼihgo yaa nitsídaakeesígíí biniinaa nihił nidazdiyoołniił.
27 Nihí honoojíígóó tágí jı̨́ oodááł bíighahgóó diiʼnééł; áadi Bóhólníihii nihiDiyin God bichʼįʼ náádadiʼyiilnih tʼáá nihichʼįʼ yee haadzíʼígi ádadiiʼnííł.
28 Áko Féro ádííniid, Nihééʼdeeshnih lą́ą, áko honoojíidi Bóhólníihii nihiDiyin God bichʼįʼ náádadiʼyoołnih, nidi tʼáá íiyisí nízaadgóó éí doo adoohnéeł da. Shá náʼiidííkąął.
29 Áko Mózes ádííniid, Jó, nitsʼą́ą́ʼ chʼééníshdááh áádóó Bóhólníihii néideeshkąąłgo tséʼédǫ́ʼii éí Féro áádóó bá nidaalʼaʼí índa bidineʼé bitsʼą́ąjįʼ yiską́ągo yóóʼanídooldah, nidi tʼááká Féro nihinááʼdóleehgo tʼáadoo Ízrel dineʼé éí Bóhólníihii yichʼįʼ náádaʼayółniih da lágo.
30 Áko Mózes éí Féro yitsʼą́ą́ʼ chʼíníyáago Bóhólníihii náyooskan.
31 Áko Bóhólníihii éí Mózes náhooskanígíí biʼjiilaago tséʼédǫ́ʼii bił dah nídaʼasołígíí Féro áádóó bá nidaalʼaʼí índa bidineʼé yitsʼą́ąjįʼ iinííłkaad; tʼááłáʼí nidi doo łaʼ tʼáá ákǫ́ǫ da.
32 Nidi nááʼáłdóʼ Féro bijéí náánáátłʼisgo bąą tʼáadoo diné yééʼníłniiʼ da.
