Exodus 35:1-35
35 Mózes éí Ízrel dineʼé tʼáá ałtso áłah áyiilaago áyidííniid, Díí saad Bóhólníihii nihichʼįʼ yee haadzíʼígíí bikʼeh ádaahtʼı̨́į doo.
2 Hastą́ą́h jı̨́ tʼéí naʼanish dooleeł, nidi tsostsʼid jínígíí éí hááʼáyı̨́ı̨́h jı̨́ átʼéego dílzin; Bóhólníihii bichʼįʼ dahodíínóhsingo háádahołyı̨́įh doo; éí bijı̨́ı̨́ góneʼ łaʼ tʼáá haʼátʼéegoda nijilnishgo tʼóó hodiʼyoolyééł.
3 Kéédahohtʼínígi tʼáá ánółtso hááʼáyı̨́ı̨́h jı̨́ı̨́ góneʼ tʼáadoo déédadołjahí.
Bóhólníihii bichʼįʼ náádahaniihii (Ex. 25:1-9)
4 Mózes éí Ízrel dineʼé tʼáá ałtso áyidííniid, Díí Bóhólníihii nihichʼįʼ yee haadzíiʼgo ání,
5 Nihitahgóó tʼáadoo leʼé Bóhólníihii baa dahidohʼaah; tʼáá háiida bił hadleeʼii hániʼdii díí Bóhólníihii bichʼįʼ náádahizhdoołnihígíí nidajiijáah doo: éí óola, béésh łigaii, béésh łitsoii,
6 yisdizii yá nahalingo dootłʼizhígíí, tsídídééh nahalingo łichíʼígíí áádóó łichxíʼígíí áádóó áłtsʼóózígo yisdizígíí bee naʼatʼą́hí łigaii ditsʼidgo ályaii áádóó tłʼízí bighaaʼ,
7 deenástsʼaaʼ bikágí daaldzą́ągo deilchiiʼii áádóó nahashchʼid bikágí, tsin nitłʼizii akéíshiya wolyéii,
8 akʼah bee hoolʼinígíí, áádóó akʼah akʼi yahiidzíidgo bee alzı̨́įhii índa tsin bijeeh dilidgo łikání halchinii bá spáis wolyéii,
9 tsé ániks wolyéhígíí índa tsé daʼílíinii éí íífad wolyéii áádóó ayidgi dah siłtsooz dooígíí bikáaʼgi bee nidoochʼąhii Bóhólníihii baa dahidohʼaah.
Níbaal biiʼ hodílzinii bee biiʼ hahodítʼéhígíí (Ex. 39:32-43)
10 Hániʼdii diné tʼááłáʼí nítínígo naanish dayiichįįhgo nidaalnishii éí tʼáá átʼé ádazhdoolíiłgo Bóhólníihii hachʼįʼ yee haadzíʼígíí ádazhdoolííł;
11 éí níbaal biiʼ hodílzinii índa bitis ahííkaad dooígíí áádóó éí bikáaʼgi ałkʼi sikaad dooígíí índa ahidahidiiłtsoozgi bił dah nídaatı̨́įh dooígíí, tsin neheeshjííʼ ahééneelkáal dooígíí índa booshkʼiizhjí tsin níyizii naaniigo bąąh daníʼáa dooígíí áádóó tsin níyizii ííyah daniiʼáa dooígíí índa bitłʼááh naaznilgo tʼááłáhíjí biih dahasdzą́ą dooígíí,
12 tsitsʼaaʼ dílzinii índa tsin níyizii bee naatʼáa dooígíí, aa aʼááh hasinii bił hazʼáanii dooleełígíí, ataʼnaníbaal dooleełígíí,
13 bikááʼ adání áádóó tsin níyizii bee naatʼáa dooígíí áádóó beedí chodaoʼı̨́į dooleełígíí tʼáá ałtso tʼáá bił, Diyin God bichʼįʼ bááh nááhániih dooleełígíí,
14 bee hoolʼiní bá yadaaʼáii ałdóʼ, bił chodaoʼíinii índa bílátah dah naʼazkánígíí áádóó akʼah iih náhádzíidgo bee hoolʼin dooleełígíí,
15 tsin bijeeh dilidgo łikání halchinii bá bikááʼ nááʼiiniihí, tsin níyizii bee naatʼáa dooígíí tʼáá bił índa akʼah akʼi yahiidzíidgo bee alzı̨́įhii áádóó tsin bijeeh dilidgo łikání halchin dooígíí, níbaal biiʼ hodílzinii bichʼéʼétiingi dáádiníbaal dooígíí,
16 bikááʼ nááʼiiniihí éí didlidgo nááhániihii bá ályaaígíí índa bá béésh łitsoii ałnáshizhoozh dooígíí áádóó tsin níyizii bee naatʼáa dooígíí índa bił chodaoʼíinii tʼáá ałtso tʼáá bił, biiʼ táʼádígisí índa bá siʼánígíí tʼáá bił,
17 níbaal biiʼ hodílzinii binaa hazʼánígi nídadilbał dooígíí índa tsin níyizii ííyah daniiʼáa dooígíí áádóó bitłʼááh naaznilgo tʼááłáhíjí biih dahasdzą́ą dooígíí, ahééneelkálígíí bichʼéʼétiingi dáádiníbaal dooleełígíí,
18 níbaal biiʼ hodílzinii áádóó binaadi ahééneelkáalgo bąąh aníbaalii bá anídaalkał dooleełígíí índa bitłʼóól bee dah nídahatłʼóoh dooleełígíí,
19 áádóó ééʼ tsʼídá yáʼátʼéehgo ádaalyaago nááʼiiłniihii dabiʼéeʼgo hodiyingo hazʼą́ągi nidaalʼaʼ doo biniyéhígíí, éí ééʼ dílzinii Éran nááʼiiłniihii nilíinii índa biyeʼké náádaʼiiłniihii danilı̨́įgo yiih nídaakahgo shá nidaalʼaʼ doo biniyéhígíí tʼáá ałtso ádazhdoolííł.
Diné éí náádayiiłniihii nidayiijááh
20 Áko Ízrel dineʼé tʼáá ałtso Mózes yitsʼą́ą́ʼ anáhaaskai.
21 Áko nidahaaskaii tʼááłáʼí nítínígo bijéí nidabiiłʼnáago biiʼ naazíinii bił dahóódleeʼígíí éí Bóhólníihii yichʼįʼ náádayiiłniihii nidayiizhjaaʼ; éí níbaal biiʼ dahozdísinii bee hadidoolnííł áádóó biyiʼ nááʼiiłniihii chodayoołʼı̨́į dooígíí tʼáá ałtso índa ééʼ dadílzinii biiʼ astı̨́įgo naʼalʼaʼ dooígíí ádeidoolííł biniyé nidayiizhjaaʼ.
22 Ákohgo diné áádóó asdzání nidahaaskaigo, tʼááłáʼí nítínígo tʼáá bí lą́ daniizı̨́ʼígíí bikʼehgo ił dah nátı̨́hí áádóó jaatłʼóół áádóó yoostsah áádóó béésh kʼeetʼoh índa óola bee ádaalyaaígíí tʼáá ałʼąą ádaatʼéii nidayiizhjaaʼ; diné tʼááłáʼí nítínígo óola bee dahólónígíí éí Bóhólníihii yichʼįʼ náádayiiłniihgo nidayiizhjaaʼ.
23 Áádóó éí tʼááłáʼí jinítínígo yisdizii yá nahalingo dootłʼizhígíí, tsídídééh nahalingo łichíʼígíí, łichxíʼígíí, áłtsʼóózígo yisdizígíí bee naʼatʼą́hí łigaii ditsʼidgo ályaii, tłʼízí bighaaʼ, deenástsʼaaʼ bikágí daaldzą́ągo deilchiiʼii índa nahashchʼid bikágí díí hwee dahólóonii nidajiizhjaaʼ.
24 Tʼááłáʼí jinítínígo éí béésh łigaii áádóó béésh łitsoii hwee dahólónígíí Bóhólníihii baa dahizdeezʼánígíí nidajiizhjaaʼ, áko Bóhólníihii baa nídahizdeezʼą́. Áádóó tʼááłáʼí jinítínígo tsin nitłʼizii hwee dahólónígíí chodeidooʼįįł biniyé nidajiizhjaaʼ.
25 Asdzání adiz yéédahósinii éí yisdizii yá nahalingo dootłʼizhígíí áádóó tsídídééh nahalingo łichíʼígíí áádóó łichxíʼígíí índa áłtsʼóózígo yisdizígíí bee naʼatʼą́hí łigaii ditsʼidgo ályaii hadayiizdizígíí nidayiizhjaaʼ.
26 Asdzání tʼáá ałtso adiz yéédahósinii adiih ádaatʼı̨́įgo tłʼízí bighaaʼ hadayiizdiz.
27 Índída diné nidaʼaʼeeshígíí éí tsé ániks wolyéhígíí áádóó tsé daʼílíinii éí íífad wolyéii índa ayidgi dah siłtsooz dooígíí bikáaʼgi bee nidaachʼąąhii nidayiizhjaaʼ,
28 áádóó akʼah bee hoolʼin dooígíí áádóó akʼah akʼi yahiidzíidgo bee alzı̨́įhii índa tsin bijeeh dilidgo łikání halchinii bá spáis wolyéii nidayiizhjaaʼ.
29 Áko Ízrel dineʼé tʼáá bí ádeiniizı̨́įʼgo Bóhólníihii yaa nídeidiyiizʼáanii nidayiizhjaaʼ; diné danilíinii áádóó asdzání danilíinii tʼááłáʼí nítínígo bijéí nidabiiłʼnáago naanish tʼáá ałʼąą ádaatʼéii tʼáá ałtso yiniyé tʼáadoo leʼé deeshjih danízinígíí Bóhólníihii tʼáá Bí éí Mózes binahjįʼ yee haadzíiʼii bikʼehgo nidayiizhjaaʼ.
Biizáliyel áádóó Ahóliyab bíká áhodooʼniid (Ex. 31:1-11)
30 Áádóó Mózes éí Ízrel dineʼé áyidííniid, Shoo, Bóhólníihii éí Yúrai biyeʼ Biizáliyel wolyéii yiyíízhiʼgo néidiiłtı̨́. Yúrai éí Her biyeʼ jílı̨́įgo Júdah bidineʼé bitsʼą́ą́dóó jílı̨́.
31 Áádóó Biizáliyel bíniʼ bíighahgo Diyin God biNíłchʼi Diyinii biiʼ hólǫ́ǫgo hóyą́ągo áádóó akʼidiʼyiitįįhgo áádóó bił ééhózingo índa naanish ałʼąą ádaatʼéii yiyiichįįhgo áyósin.
32 Áko naʼachʼąąh yindoolnishii yinahaʼáa doo; éí óola áádóó béésh łigaii índa béésh łitsoii bee ázhdoolííł.
33 Tsé daʼílíinii bee hazhdidoolííł áádóó tsin nijikʼęęhgo bee nizhdoochʼąh biniyé hashtʼezhdoolííł, áko naanish ałʼąą ádaatʼéii jiichįįhgo binizhdoolnish.
34 Bóhólníihii éí Biizáliyel índa Ahóliyab tʼáá ájíłah ahozhniiyąądgo nazhʼntin áhoolaa; Ahóliyab éí Ahísamak biyeʼ jílı̨́įgo Dan bidineʼé bitsʼą́ą́dóó jílı̨́.
35 Diyin God éí Biizáliyel índa Ahóliyab bíniʼ bíighahgo iichįįhgo átʼé hwiindzin biiʼ hólǫ́ǫgo áyiilaa, áko éí nidiltʼéego naanish ałʼąą ádaatʼéii íidoolíiłgo tsʼídá tʼáá átʼéegi bił bééhózin silı̨́ı̨́ʼ: éí atsidjí lá, naʼachʼąąh áádóó yisdizii yá nahalingo dootłʼizhígíí áádóó tsídídééh nahalingo łichíʼígíí índa łichxíʼígíí áádóó áłtsʼóózígo yisdizígíí bee naʼatʼą́hí łigaii ditsʼidgo ályaii biyiʼjįʼ yistłʼǫ́ǫgo naashchʼąąʼgo atłʼóó lá, áko tʼáá haʼátʼíhída yindoolnishii yiyiichįįh áádóó yinahaʼáago binaanish ííłʼı̨́.
