Exodus 11:1-10
11 Áko Bóhólníihii éí Mózes ánéidooʼniid, Díí tʼéiyá tsʼídá akéeʼdi Féro índa Ííjip dineʼé atíshłéhígíí átʼé, áko índa níláhgóó nihiʼdoołnihgo kodóó tsʼídá tʼáá ánóhtʼé chʼínihidínóołkał.
2 Kʼad díí Ízrel dineʼé bee bił hodíílnih, Bíniʼ diné índa asdzání tʼááłáʼí jinítínígo hoł kééhatʼíinii tʼáadoo leʼé béésh łigaii índa óola bee yódí ádaalyaii bídeízhdóokił.
3 Áko Bóhólníihii éí Ízrel dineʼé bichʼohaʼnéego Ííjip dineʼé baa dajoobaʼgo ábiilaa, índa tʼah nááyówehgo Féro bá nidaalʼaʼí áádóó bidineʼé binááł Ííjip kéyahgi Mózes tsʼídá ayóó átʼéii jílı̨́.
4 Áko Mózes ádííniid, Bóhólníihii kóní, Tłʼéʼííłníiʼgo Ííjip dineʼé bitahgóó hadideeshááł.
5 Áko Ííjip kéyahgi alą́ąjįʼ nidahaazhchíinii tʼáá ałtso dadínóonééł; Féro dah sidáádóó índa akʼáán álʼíní bineʼdóó asdzání á nidaalʼaʼí hwee nihoolʼáajįʼ alą́ąjįʼ nidahaazhchíinii, índa alı̨́ı̨́ʼ alą́ąjįʼ daazhchíinii tʼáá átʼé dadínóonééł.
6 Áádóó Ííjip kéyahgi tʼáá átʼéé nítʼééʼ ayóó átʼéego cha hááʼáa doo; hádą́ąʼda ákótʼéii doo ánéeh da nítʼééʼ, áko kodóó hoolʼáágóó doo ákónááhodooʼníił da.
7 Nidi Ízrel dineʼé bichʼįʼgo éí łééchąąʼí nidi doo łaʼ hashkénídzin da doo; diné índa alı̨́ı̨́ʼ bichʼįʼ nidi dooda, áko díí nihił béédahodoozįįł: Bóhólníihii éí Ííjip dineʼé índa Ízrel dineʼé doo aheełtʼéii átʼée daígíí ííshjání áyósin.
8 Áko ná nidaalʼaʼí tʼáá ałtso shichʼįʼ hadadookah, áádóó shichʼįʼ yaa ádadooníiłgo kódadidooniił, Akóóh yówehjįʼ chʼínóhnééh; diné nikééʼ tádíkáhígíí tʼáá ałtso ałdóʼ tʼáá bił, áádóó bikʼijįʼ índa akǫ́ǫ́ chʼídeeshááł. Mózes éí Féro bitsʼą́ą́ʼ chʼízhníyáago tʼáá íiyisí háhóóchįįd.
9 Áko Bóhólníihii éí Mózes áyidííniid, Féro doo níistsʼą́ąʼ da doo, áko Ííjip kéyahgi shibikʼee tʼóó ił adahayóii kʼeeʼąą yilzhish doo.
10 Mózes áádóó Éran díí bikʼee tʼóó ił ahayóigo áhooníiłii tʼáá ałtso Féro binááł ájiilaa, áádóó Bóhólníihii éí Féro bijéí nááyííłtłʼisgo bikéyahdóó tʼáadoo Ízrel dineʼé yééʼníłniiʼ da.
