Ecclesiastes 8:1-17
8 Háísh diné hóyáaniigi átʼé? Áádóó tʼáadoo leʼé ááhyiłníinii háísh bił bééhózin? Diné habee hódząʼ bee hoł hózhǫ́ joolniiʼ, áádóó jistiʼ jinoolninii łahgo ádoonííł.
Aláahgo naatʼáanii bikʼeh honíłʼı̨́
2 Diyin God binááł ádee haʼdiidziihígíí biniinaa aláahgo naatʼáanii bibikʼeh óʼooʼníiłii bikʼeh honíłʼı̨́, nidishní.
3 Tʼáadoo tsxı̨́įłgo bitsʼą́ą́ʼ hidínáhí; haʼátʼíhída doo yáʼátʼéehii tʼááká haółtʼééh lágo, háálá haʼátʼíhída baa nideeshaał hiniizįįhgo tʼáá bí nízingo yaa naaghá.
4 Aláahgo naatʼáanii bizaad bidziilígíí bąą, Haʼátʼíí lá baa naniná? háísh yididooniił?
5 Tʼáá háiida éí bibikʼeh óʼooʼníiłii yikʼeh hółʼíinii doo yáʼáshóonii tʼáadoo átʼé dínóozįįł da; diné hóyáanii éí hoolzhishígíí áádóó ánihwiitʼaah bił bééhózin.
Diyin God óʼoolíiłii éí diné bił ééhózinii biláahdi átʼé
6 Háálá biniyé ádahatʼíinii tʼáá ałtso baa hwiilzhíísh áádóó ánihwiitʼaah bá hólǫ́; éí bąą diné bide áhósinii bide átʼįįh.
7 Háálá átʼée dooleełígíí doo bił bééhózin dago bichʼįʼ áhodooníłígíí háísh yee bił hodoolnihgo yíneelʼą́?
8 Diné éí níłchʼi tʼą́ą́ʼ jótąʼ dooleełígíí doo bíjíighah da, áádóó dazdootsaałígíí bijı̨́ doo dadeestsaał da dzinízin, nidi doo bízhneelʼą́ą da; anaaʼ baa naʼaldeehdę́ę́ʼ doo hwééʼdoolnih da, doodaiiʼ doo yáʼáshóonii baa ázhdeetʼánígíí doo bitsʼáhodiʼdooltéeł da.
9 Éí tʼáá ałtso yiiłtsą́, áádóó ooʼáłígíí biyaagi naanish daazlı̨́ʼígíí tʼáá ałtso tʼáá shiyiʼídi baa nitsísíkééz; diné łaʼda náánáłaʼ diné binazhnitʼáhígíí bee atíʼánízhdílʼı̨́į doo.
Diné beʼiinaʼ doo ahedaałtʼée da
10 Áko diné doo yáʼáshóonii yóóʼádabiʼdiilyaago yiiłtsą́. Hodiyingo hazʼą́ą́ góneʼ yah anídaakah áádóó chʼéédahakááh nítʼééʼ, áko kin haalʼáagi yaa nidaaskai yę́ę baa dahoyoosʼnah. Díí ałdóʼ tʼáadoo nánídlíní da.
11 Doo yáʼáshǫ́ǫ́góó ádáátʼįįdii doo tsxı̨́įłgo bá nidahwiitʼaahgóó biniinaa diné baʼáłchíní dabijéí yee ádił niʼiidzííh deidiniidzı̨́ı̨́ʼ.
12 Azhą́ diné ádił niʼiilzíihii tʼááłáhídi neeznádiindi ádił náʼásiih áádóó asʼahgóó bíyoołkáałgo ályaa nidi, tʼáá aaníí shił bééhózingo Diyin God deidósinii, tʼáá éí binááł dahodísingo bá yáʼátʼéeh dooleeł.
13 Nidi diné doo yáʼájíshóonii éí doo há yáʼátʼéeh da dooleeł, áádóó chahaʼoh ahildóhígi átʼéego doo nízaadgóó jiiná ájóleʼ átʼée da, háálá Diyin God binááł doo hozdósin da.
14 Nahasdzáán bikáaʼgi tʼáadoo nánídlíníii baa nidaʼaldeeh; jó, diné doo yáʼádaashóonii ádayoolíłígíí bikʼehgo diné tʼáá ákogi ádaatʼéii bichʼįʼ áánííł, áádóó diné tʼáá ákogi ádaatʼéii ádayoolíłígíí bikʼehgo diné doo yáʼádaashóonii bichʼįʼ áánííł. Díí ałdóʼ éí tʼáadoo nánídlíní da, dishní.
15 Kódíshní, Nił honeedlı̨́įgo ná yáʼátʼééh, háálá ooʼáłígíí biyaagi diné ayą́ áádóó adlą́ índa bił hózhǫ́ǫgo hinánígíí tʼah náábíláahgo bá yáʼánáánátʼéeh dooleełii ádin, áko ooʼáłígíí biyaagi nizhdoołdįįł bijı̨́įjįʼ Diyin God haidiníʼánígíí biyiʼ nijishnishgo hwee hólóonii tʼéí doodzih.
16 Hódzą́ shił bééhodoozįįł nisingo shijéí bee háshtʼı̨́įgo ádaa dinishtʼą́. Nahasdzáán bikáaʼgi naanish baa daʼíldéehii dínéeshʼįįł niizı̨́įʼgo jı̨́įgo, doodaiiʼ tłʼéeʼgo doo ajoołháásh átʼée da.
17 Ákohgo Diyin God binaanish tʼáá ałtso nééłʼı̨́ı̨́ʼ; ooʼáłígíí biyaagi Diyin God binaanish silı̨́ʼígíí éí diné łaʼ doo hoł bééhoozı̨́ı̨́ʼ átʼée da, háálá azhą́ éí shił bééhodoozįįł jinízingo haa shı̨́ı̨́ néelą́ąʼjįʼ baa nitsídzíkees nidi, tʼáadoo hoł bééhodoozįįł da; tʼáá aaníí, tʼah nááyówehgo, azhą́ diné hóyáanii, Shił bééhózin, nízin nidi, hoł bééhodoozįįłígíí doo bízhneelʼą́ą da.
