Ecclesiastes 7:1-29
7 Yáʼátʼéehgo hoʼdójíigo tłah daʼílíinii biláahgo yáʼátʼééh áádóó łaʼ hoʼdizhchínígíí biláahgo dadziztsą́ą́jígo yáʼátʼééh.
2 Hooghangi ídaʼazįįdgo jiníyáhígíí biláahgo hooghangi yínííł hólǫ́ǫgo jiníyáájígo yáʼátʼééh, háálá diné tʼáá ałtso díí bee bá nidahwiiztʼiʼ áádóó dahináanii díí yee ádiih dahwiidiyooʼnił.
3 Aníjídlohígíí biláahgo yínííł jílı̨́ı̨́jígo yáʼátʼééh, háálá yínííł joolniiʼígíí daatsʼí hajéí bá yáʼátʼééh.
4 Diné hóyáanii éí yínííł bá hooghanígíí bijéí yee yaa nitsíkees, nidi diné doo áhályáanii dloh hanáltǫǫhgo bá hooghanígíí bijéí yee yaa nitsíkees.
5 Diné doo ádahalyáanii nidadiʼaʼgo wóltsʼą́ʼígíí biláahgo diné hóyáanii hashkéego wóltsʼą́ą́ʼjígo yáʼátʼééh.
6 Háálá ásaaʼ biiʼ abézhí biyaagi chʼil deeníní dookʼą́ąłgo dilchʼiłígíí nahalingo diné doo áhályáanii anádloh. Díí ałdóʼ tʼáadoo nánídlíní da.
7 Tʼáá aaníí diné hóyáanii bide áhólzingo báháchįʼ ábiiłʼįįh, áádóó bee nabiʼdiiniihii éí bibee akʼiʼdiitįįhii éí yee átʼéii ííłdįįh.
8 Haʼátʼíhída hadahatʼéhígíí biláahgo tʼóó nidahaztʼiʼjí yáʼátʼééh áádóó ádaa hodzódlí biláahgo haʼahónííjígo yáʼátʼééh.
9 Tʼáadoo hání síníʼání, háálá diné doo ádahalyáanii áháchįʼ biiʼ dahólǫ́.
10 Haʼátʼíí lá bee átʼéego díí yoołkáłígíí biláahgo nahdę́ę́ʼ yoołkááł yę́ę yáʼátʼééh nítʼééʼ lá? tʼáadoo diníní, háálá díí éí doo áháyą́ą́góó naʼídíłkid átʼé.
11 Hódzą́ éí hwííʼ dooleełii biłgo ílı̨́, áádóó binááł hááʼátʼáahgo hódzą́ bił bídayéełkaahii tʼah yówehgo bá yáʼátʼééh.
12 Háálá béeso áchʼą́ą́h naalyéhígi átʼéego hódzą́ ałdóʼ áchʼą́ą́h naalyéii átʼé, nidi ił ééhózin aláahgo yáʼátʼéehii éí hódzą́ bee dahólóonii yee dahiná.
13 Diyin God binaanish baa nitsídaohkees, háálá haʼátʼíhída digizgo áyiilaii háishąʼ kʼéidoołdǫǫł?
14 Tʼáá ałtsoní bee ídaʼazįįd haleehgo baa nił hózhǫ́, nidi nitsʼą́ą́jí neʼakǫsgo díí baa nitsíníkees: diné hakééʼ áhásdįįdóó bikʼijįʼ hakéédę́ę́ʼ áhodooníiłii doo hoł bééhózin da dooleełígíí biniyé Diyin God tʼáá áłah hólǫ́ǫgo áyiilaa.
15 Tʼáadoo nánídlínígóó hinínaadę́ę́ʼ tʼáá ałtsoní yiiłtsą́. Diné tʼáá ákogi átʼéii tʼáá ákogi ááníiłgo bikééʼ áhádįįh, áádóó diné doo yáʼáshóonii doo yáʼáshǫ́ǫ́góó hináago tʼáá náás yołtʼih.
16 Tʼáá ákogi átʼéii tʼáá biláahgo tʼáadoo tʼáá ákogi ánítʼéhí, áádóó honíyánígíí tʼáá biláahgo tʼáadoo honíyą́ ádíínílziní. Haʼátʼíísh biniyé tʼáá ni atíʼádílnéeh doo?
17 Doo yáʼáníshónígíí tʼáá biláahgo tʼáadoo doo yáʼáníshóní, áádóó doo áhólyánígíí tʼáá biláahgo tʼáadoo doo áhólyání. Haʼátʼíísh biniyé ná hazʼánígíí tʼáá bichʼįʼ dadíítsaał?
18 Díí bee ádiih tsííníkéezgo laʼ tʼáá íiyisí yáʼátʼéeh doo, áádóó doo bididííchił da, háálá Diyin God yidósinii díí tʼáá áłah yitsʼádoogááł.
19 Kin haalʼáagi diné neeználtʼéego naatʼáanii danilínígíí éí biláahgo diné hóyáanii hódzą́ yee bidziil.
20 Nahasdzáán bikáaʼgi diné tʼáá ákogi átʼéii éí yáʼátʼééh ááníłígíí áádóó doo ádił niʼiisíihii tʼáá ádin.
21 Saad tʼáá ałtso bee hadaʼiidziihígíí ałdóʼ tʼáadoo baa náʼáhodíltʼíní, áko ná naalʼaʼí neinítʼı̨́įgo doo didíítsʼı̨́įł da.
22 Háálá nahdę́ę́ʼ tʼáá ahą́ą́h tʼáá ákótʼéego diné baa nánítʼı̨́ı̨́ nítʼéeʼgo nił bééhózin.
Hódzą́ hátʼı̨́
23 Díí tʼáá ałtso hódzą́ bee bééhózingo áshłaa; Honisą́ą dooleeł, dííniid nidi, doo deeghánídi shitsʼą́ądi hólǫ́ǫ́ lá.
24 Dahólóonii biʼoh nitsáhákosdi hólǫ́ áádóó bikʼidiʼdootı̨́łígíí nantłʼa. Háísh éí yikʼidiʼdootı̨́ı̨́ł?
25 Hadínéeshtaał áádóó hádídéeshʼįįł índa tsʼídá haʼátʼéego ádaatʼéé lá nisingo shił bééhodoozįįł niizı̨́ı̨́ʼ áádóó doo yáʼáshóonii éí doo hóshkał átʼéego índa doo áháyą́ éí áhodiigis átʼéego shił bééhodoozįįł biniyé shijéí bee háshtʼı̨́įgo ádaa dinishtʼą́.
26 Asdzání łaʼ bijéí łoh áádóó tłʼóół yistłʼóonii átʼéego bílaʼ éí álátsíín nináʼniłí átʼéego aniné biláahgo díchʼíiʼgo hadinishʼı̨́ı̨́ʼ; tʼáá háiida Diyin God yił hóshóonii éí yitsʼádínóochééł, nidi diné ádił niʼiilzíihii éí asdzání azahodínóoʼah.
27 Biniinaanii shił bééhodoozįįł nisingo ahąąh nidaashnilgo díí shił bééhoozin, jóʼakon, ní halneʼí nilíinii.
28 Éí lą́ą shiiʼ sizíinii tʼahdii háidéezʼı̨́ı̨́ʼ, nidi tʼah doo bikʼíninishtáah da. Tʼááłáhídi mííl diné ákónéelą́ąʼgo diné tʼááłáʼí hadinishʼı̨́ı̨́ʼ, nidi díí ákónéelą́ąʼgo bitahdóó asdzání tʼah doo łaʼ bikʼíninishtáah da.
29 Jó, díí tʼéiyá shił bééhoozin, Diyin God éí diné tʼáá ákogi átʼéego áyiilaa, nidi ląʼígóó tʼáá hó bindahodzizʼáanii bikʼídazneeztą́ą́ʼ.
