Deuteronomy 12:1-32
12 Díí yee nihwiizʼáanii áádóó yee nihodiiʼaahii bikʼeh dahonołʼı̨́į doo; éí danihizhéʼé yę́ę biBóhólníihii Diyin God éí kéyah ádííʼ ádadoohłíiłgo nihaidiníʼánígíí biyiʼ nihídeídíiską́ą́góó nahasdzáán bikáaʼgi kéédahohtʼı̨́įgo bikʼeh ánóhtʼée doo.
2 Kéyah nihííʼ dooleełígíí bikááʼ tʼáá ałtsogóó ałʼąą anaʼí danilíinii bidiyin dabidiʼníinii yá nidaalʼaʼ yę́ęgóó tsʼídá ałtso nidahidoołchxǫǫł; dziłghą́ą́ʼgóó áádóó dah daaskʼidgóó índa tsin dadootłʼizh naazkaadii tʼáá átʼé biyaagóó yichʼįʼ nidahałáhígíí ałtso nidahidoołchxǫǫł.
3 Áádóó bibikááʼ náádaʼiiniihígíí naaʼadahidoołtłʼił, áádóó bitsé nidaashchʼąąʼgo yadaaʼáago ádaalyaii yichʼįʼ nidahałáhígíí dadidoohséí, áádóó tsin bee eʼelyaii ádaalyaii adahididoołkʼą́ą́ł, áádóó edaʼalyaii bidiyin dabidiʼníinii nidahidoohtsxił, índa éí nahazʼánígóó dabízhiʼ ałtso nahjįʼ kódadoohłííł.
4 Anaʼí nidahałáhígi átʼéego nihí éí tʼáá ádzaagóó tʼáadoo Bóhólníihii nihiDiyin God bichʼįʼ nidahohłáhí.
5 Nidi Bóhólníihii nihiDiyin God tʼáá bí náhodidooʼáłígi nidineʼé tʼáá ałtso bitahgóó Bóhólníihii tʼáá bí bízhiʼígíí dólzingo íidoolíiłgi nídaʼoohkąąhgo ahínáohkah doo.
6 Índa ákwii didlidgo náádahołniihii, áádóó nááhidoonihgo náádahołniihii, áádóó tʼáadoo leʼé neeznáá daníjaaʼígíí éí tʼááłáʼígo shijaaʼ, Bóhólníihii baa nídahidohʼaahii, áádóó bił yádiʼdiilnihgo náádahołniihii, áádóó bee ádee hadasoohdzíiʼgo náádahołniihii, áádóó tʼáá nihí ádeinohsingo náádahołniihii, índa nihilı̨́ı̨́ʼ áádóó nihidibé alą́ąjįʼ nidahaazhchíinii náádahołniihii ninádahohjih doo.
7 Ákwii Bóhólníihii nihiDiyin God binááł nídaʼohdı̨́įh doo. Nihí áádóó nihaʼáłchíní bił baa nidaahkaígíí tʼáá ałtso baa nihił nidahoozhǫǫh doo; éí Bóhólníihii nihiDiyin God yee nihikʼijidlí.
8 Nihí éí díí kweʼé tʼáá ałtso díí jı̨́ baa nideiikaígíí doo baa nidaahkai da doo; jó, tʼááłáʼí jinítínígo, Díí tʼáá ákóneʼ áshtʼı̨́, daznízingo baa nidajikai.
9 Jó, hááʼáyı̨́ı̨́h áádóó kéyah ííʼ dooleełii éí Bóhólníihii nihiDiyin God nihaideeʼaahígíí tʼah doo biih wohnéeh da.
10 Nidi Jórdan tooh haʼnaa ninoonáago, áádóó ákwii kéédahohtʼı̨́į doo biniyé Bóhólníihii nihiDiyin God éí kéyah nihaidiníʼánígíí ádííʼ ádadoohłíiłgo áádóó ákwii nihinaagóó nihiʼanaʼí kéédahatʼíinii tʼáá ałtso yitsʼąą nihaa áhályą́ągo háádahołyı̨́įhgo tʼáadoo nitsihadáhí kéédahohtʼı̨́įgo
11 ákwii hazʼą́ągi Bóhólníihii nihiDiyin God tʼáá bí náhodidooʼáłígi bízhiʼ dólzin doo; áadi náádahołniihii tʼáá ałtso nidahohjáah dooígíí nihichʼįʼ bee haasdziih: éí didlidgo náádahołniihii, áádóó nááhidoonihgo náádahołniihii, áádóó tʼáadoo leʼé neeznáá daníjaaʼígíí éí tʼááłáʼígo shijaaʼ Bóhólníihii baa nídahidohʼaahii, áádóó bił yádiʼdiilnihgo náádahołniihii, índa tʼáá bee ádee hadasoohdzíiʼii tsʼídá yáʼátʼéehii tʼáá ałtso Bóhólníihii bichʼįʼ ádee hadasoohdzíiʼgo náádahołniihii nidahohjáah doo.
12 Áko Bóhólníihii nihiDiyin God binááł nihił nidahoozhǫǫh doo; nihí áádóó nihiyeʼké áádóó nihitsiʼké áádóó diné nihá nidaalʼaʼí áádóó asdzání nihá nidaalʼaʼí índa Líívai dineʼé nihitahgi kééhatʼínígíí éí nihííʼ dadooleełii doo bił ałtsʼą́ą́ʼ daʼnołkʼiiz daígíí ałdóʼ bił nihił nidahoozhǫǫh doo.
13 Ádaa ádahołyą́ągo tʼááká didlidgo nááhániihii tʼáá áhoodzaagi náádahołniih lágo.
14 Nidi nihitahgi tʼááłáʼí dineʼé dah yikahígíí biníiʼgi Bóhólníihii náhodiiʼánígi ákwii tʼéiyá didlidgo náádahaniihii náádahołniih doo, índa nihichʼįʼ bee haasdzíʼígíí áadi tʼáá ałtso bidaʼíínóhsin doo.
15 Ákondi tʼáá danihiníghanígi aałkʼee áńdahoołʼįįhgo daʼołghał, danohsinii éí Bóhólníihii nihiDiyin God nihikʼijidlíigo nihaidiiʼaahígíí bikʼehgo doo biʼdidéehii, doodaiiʼ biʼdidéehii danohłíinii éí jádí bitsįʼ, doodaiiʼ bįįh bitsįʼ daohsą́ą doo.
16 Tʼáá hazhóʼó bidił tʼéí tʼáadoo daohsání, łeeshtahjįʼ tó yaadziʼígi átʼéego łeeshtahjįʼ yadahoosíid doo.
17 Danihiníghangóó díí tʼáadoo daohsání: éí tłʼoh naadą́ą́ʼ neeznáá daníjoolgo tʼááłáʼígo shijoolii, éí Bóhólníihii baa nídahidohʼaahii, doodaiiʼ wáin ániidíii, doodaiiʼ áliv tsin naazkaadii bineestʼąʼ bikʼah neeznáá daníką́ągo tʼááłáʼí sikánígíí, éí Bóhólníihii baa nídahidohʼaahii, doodaiiʼ nihilı̨́ı̨́ʼ áádóó nihidibé alą́ąjįʼ nidahaazhchíinii náádahołniihii, doodaiiʼ tʼáá haʼátʼíhída bee ádee hadasoohdzíiʼii bee náádahołniihii, doodaiiʼ tʼáá nihí ádeinohsingo náádahołniihii, doodaiiʼ bił dah níʼdiilnihgo náádahołniihii,
18 nidi Bóhólníihii nihiDiyin God hólǫ́ǫgi Bóhólníihii nihiDiyin God náhodidooʼáłígi ákwii daohsą́ą doo; ni áádóó niyeʼ áádóó nitsiʼ áádóó diné ná naalʼaʼí áádóó asdzání ná naalʼaʼí índa Líívai dineʼé nilíinii tʼáá nighangi nił yah eʼetiingóó nił kééhatʼíinii Bóhólníihii nihiDiyin God hólǫ́ǫgi baa nidaahkaígíí tʼáá ałtso baa nihił nidahoozhǫǫh doo.
19 Ádaa ádahołyą́ągo tʼááká Líívai dineʼé yóóʼadadoohʼááł lágo, yidiiską́ą́góó nahasdzáán bikáaʼgi ákótʼéego dahinohnáa doo.
20 Áko Bóhólníihii nihiDiyin God éí kéyah hótsaago nihá yínéidoozohgo, jó, ákótʼéego yee nihaʼdiʼníʼą́, áádóó ádadidoohniił, Adeeshghał, háálá atsįʼ bídin danohłı̨́, áko tʼáá deeshghał danohsinígíí daołghał doo.
21 Bóhólníihii nihiDiyin God náhodidooʼáłígi ákwii Bóhólníihii bízhiʼ dólzingo íidoolíłígóó nihá nízaad ládą́ą́ʼ, tʼáá nihí nihibéégashii, doodaiiʼ nihidibé hólǫ́ǫgo aałkʼee ádahwíínóhsin doo biniyé Bóhólníihii nihaidiníʼánígíí tʼáá éí bee nihá hoséłʼą́, áko tʼáá danihiníghanígi, Tʼáá deeshı̨́ı̨́ł, danohsinígíí daołghał doo.
22 Jádí bitsįʼ, doodaiiʼ bįįh bitsįʼ daołghałígi átʼéego béégashii, doodaiiʼ dibé bitsįʼ daołghałgo yáʼátʼééh; doo biʼdidéehii, doodaiiʼ biʼdidéehii danohłíinii éí atsįʼígíí daołghałgo yáʼátʼééh.
23 Tʼáá hazhóʼó diłígíí tʼéí tʼááká daohsą́ą́ʼ lágo, háálá dił éí iiná átʼé, áko iiná éí atsįʼ tʼáá bił doo daohsą́ą́ʼ átʼée da.
24 Dił tʼéí tʼááká daohsą́ą́ʼ lágo, łeeshtahjįʼ tó yaadzídígi átʼéego łeeshtahjįʼ yadahoosíid doo.
25 Tsʼídá tʼááká daohsą́ą́ʼ lágo, áko nihaʼáłchíní náás daʼahílchíihii bił nihá yáʼátʼéehgo áhooníił doo, háálá Bóhólníihii binááł tsʼídá tʼáá ákóneʼ ádanohtʼée doo.
26 Tʼáá hazhóʼó dadílyingo nidaahjaahii áádóó bee ádee hadadidoohdzihgo náádahołniihii tʼéí Bóhólníihii náhodidooʼáłíjįʼ nidahohjááh.
27 Didlidgo náádahaniihii náádahołniihgo, ííshją́ą́ Bóhólníihii bibikááʼ nááʼiiniihí bikáaʼjįʼ atsįʼígíí dił tʼáá bił náádahołniih doo, áádóó náádahołniihígíí bidił éí Bóhólníihii bibikááʼ nááʼiiniihí bikáaʼjįʼ yadahoosíid doo, índa atsįʼígíí tʼéí nídaohdı̨́įh doo.
28 Díí saad nihichʼįʼ bee haasdzíʼígíí tʼáá ałtso hazhóʼó ádaa daohsįįhgo deísółtsʼą́ą́ʼ, áko nihaʼáłchíní náás daʼahílchíihii bił yáʼátʼéehgo nihá áhooníiłgo ahoolʼáa doo, háálá Bóhólníihii nihiDiyin God binááł tsʼídá yáʼátʼéhígi índa tʼáá ákóneʼ ádanohtʼée doo.
Beʼelyaii bichʼįʼ nahadlá yóweh hoʼdooʼniid
29 Bóhólníihii nihiDiyin God nihilą́ąjįʼ anaʼí áyoołdįįłgo bikéyah bighadahididoohtʼáałgo nihííʼ ádadoohłííł áádóó ákwii kéédahohtʼı̨́į doo.
30 Ádaa ádahołyą́ągo nihilą́ąjįʼ anaʼí ábiʼdisdįįdgo biloh doo biih doohkah da, índa bidiyin dabidiʼníinii yichʼįʼ nidahałáhígíí tʼáadoo bíndaʼídółkidgo kódadohníní, Haadashąʼ yitʼéego díí anaʼí danilíinii dabidiyin yá nidaalʼaʼ nítʼééʼ? Shí ałdóʼ ákóshtʼı̨́įgo naashʼaʼ doo.
31 Bóhólníihii nihiDiyin God bichʼįʼ tʼáadoo ákódaahtʼíní, háálá Bóhólníihii bichʼįʼ tsʼídá doo haldinígi ádáátʼįįdgo bąą bijoołxáhígíí bidiyin dabidiʼníinii yá ádáátʼįįd; jó, biyeʼké índa bitsiʼké deidiłidgo bidiyin dabidiʼníinii yichʼįʼ náádayiiłniihgo yaa naaskai.
32 Nihichʼįʼ bee haasdzíʼígíí ádaa daahsįįhgo bidaʼíínóhsin; doo łaʼ bíidoohʼáał da, doodaiiʼ doo łaʼ bididoohʼáał da.
