Daniel 5:1-31
5 Aláahgo naatʼáanii Belsházar* éí hakééʼdóó bídahólníihii miil yiltʼéego yá adaʼíísįįd, índa miil yiltʼéego dabinááł wáin yoodlą́ą́ʼ.
2 Belsházar wáin dzizlįhgo hazhéʼé Nébukadnézzar yę́ę Jerúsalemgi kin biiʼ sohodizin biyiʼdóó óola łeetsʼaaʼ índa béésh łigaii łeetsʼaaʼ chʼíyiizhjaaʼii nináhidoojihgo bee hadzoodzííʼ, áko aláahgo naatʼáanii áádóó hakééʼdóó bídahólníihii índa hweʼasdzą́ą́ danilíinii áádóó hweʼasdzą́ą́ dajíłʼínída éí yee daʼdoodlı̨́ı̨́ł.
3 Ákohgo óola łeetsʼaaʼ índa béésh łigaii łeetsʼaaʼ éí Jerúsalem kin haalʼáagi Diyin God bikin biiʼ sohodizin biyiʼdę́ę́ʼ chʼíheeshjaaʼígíí nidahaashjaaʼgo éí aláahgo naatʼáanii áádóó naatʼáanii danilíinii, hweʼasdzą́ą́ danilíinii áádóó hweʼasdzą́ą́ dajíłʼínída éí yee daʼoodlą́ą́ʼ.
4 Wáin deidlą́ągo óola índa béésh łigaii, béésh łitsoii, béésh nitłʼizii áádóó tsin índa tsé bee diyin béédaʼalyaago yaa dahaznih.
5 Nítʼééʼ tʼáadoo hooyání yílá léiʼ yitʼíní silı̨́įʼgo aláahgo naatʼáanii bee bóhólníihgo hazʼą́ągi bikin biyiʼdę́ę́ʼ yishdlézhígíí bikʼijįʼ bee hoolʼiní bá ííʼáhígíí binaashiijí akʼeʼashchı̨́, áádóó aláahgo naatʼáanii éí yílá akʼeʼałchíigo yiyiiłtsą́.
6 Áko aláahgo naatʼáanii éí yikʼee tsídinoolyizgo łahgo ánoosnííʼ áádóó bikʼee bił yéeʼgo tsídeezkééz; bitah hoditłidgo bigod ahídínídahgo bitah doo hwiinaʼ da.
7 Ayóó íitsʼaʼgo aláahgo naatʼáanii hadoolghaazhgo ání, Déestʼı̨́ı̨́ʼ ádeiłʼíinii, Kaldíya dineʼé dahóyáanii índa náásgóó ádahodooníiłii yaa halneʼii tʼáá ałtso de nohʼéésh. Áko aláahgo naatʼáanii éí Bábilandóó diné dahóyáanii áyidííniid, Tʼáá háiida díí bee akʼeʼashchínígíí yízhdóołtahgo ááhyiłníinii bee shił hojoolneʼígíí éí ééʼ tsídídééh nahalingo łichíʼígíí bee hahodiʼdoolnííł índa óola béésh daʼahólzhaʼí hazénáztʼiʼgo tááʼ góneʼ aláahgo bee óhólníihgo bił hazʼáanii binazhʼntʼáa doo.
8 Áko aláahgo naatʼáanii bidiné dahóyáanii tʼáá ałtso yah aheeskai, nidi bee akʼeʼashchínígíí chʼééh dayółtaʼ áádóó ááhyiłníinii chʼééh yikʼidaʼdiitįįh.
9 Ákohgo aláahgo naatʼáanii Belsházar ayóó átʼéego niseedzáago łahgo ánoosnííʼ índa bídahólníihii ałdóʼ tʼáá íiyisí tʼóó bił dahóóląąd.
10 Áko aláahgo naatʼáanii bimá asdzą́ą́ naatʼááh nilı̨́įgo éí naatʼáanii índa aláahgo bídahólníihii ádaanínígíí dzidiiztsʼą́ąʼgo ídaʼazįįdgo baa naʼaldeehgi jiníyá, áko asdzą́ą́ naatʼááh ázhdííniid, Aláahgo naatʼáanii nílíinii, hoolʼáágóó hinínáa leʼ. Tʼáadoo bikʼee nił yéeʼgo nitsíníkeesí, doodaiiʼ tʼáadoo łahgo áníínílniní;
11 aláahgo bee níhólníihgo nił hazʼáanii biyiʼ diné léiʼ diyin danilíinii biníłchʼi biiʼ hólǫ́. Nizhéʼé bíyoołkááł yę́ędą́ą́ʼ bee hódzáanii áádóó bee akʼidiʼyiitįįhii bee éí diyin danilíinii bibee hódzáanii biiʼ hólónígíí bééhoozin índa aláahgo naatʼáanii Nébukadnézzar nizhéʼé yę́ę éí álílee kʼehgo ídaʼoołʼįįłii, déestʼı̨́ı̨́ʼ ádeiłʼíinii, Kaldíya dineʼé danilíinii áádóó náásgóó ádahodooníiłii yaa halneʼii yinanitʼaʼí nilı̨́įgo ábiʼdiilyaa.
12 Háálá díí diné Daniel tsʼídá aláahgo haniihii éí baa naʼiisgeelgo ááhyiłnínígíí yikʼidiʼyiitįįhgo áádóó haneʼ bee ééʼdeetįįhii yaa halneʼ índa tʼáá íiyisí nidantłʼago deítʼéehii kʼééyoołdǫǫł; éí Bélteshazar ałdóʼ wolyé. Áko kʼad Daniel, Hágo, bidiní; éí ááhyiłníinii nił ííshją́ą́ íidoolííł.
13 Ákohgo Daniel éí aláahgo naatʼáanii bidááhdę́ę́ʼ nihoʼdeedlóóz, nítʼééʼ aláahgo naatʼáanii éí Daniel áyidííniid, Daʼ niísh Daniel ánítʼı̨́? Éí Judíya kéyahdóó shizhéʼé naatʼáanii nilı̨́ yę́ędą́ą́ʼ Judíya kéyahdę́ę́ʼ yisnááh danilíinii chʼíiníʼeezhii łaʼ ánítʼı̨́?
14 Diyin danilíinii biníłchʼi niiʼ hólǫ́ǫgo índa nantłʼaii naniłkaahgo áádóó bee akʼidiʼyiitįįhii índa bee hódzą́ tsʼídá aláahdi átʼéii niiʼ hólǫ́ǫgo yíniiʼ.
15 Áko diné dahóyáanii, éí déestʼı̨́ı̨́ʼ ádeiiłʼíinii, shidááhdóó niheeshtʼeezhgo díí bee akʼeʼashchínígíí deízhdóołtahgo ááhyiłníinii bee shił dahozhdoolnihgo shił bééhózin doo biniyé nidziiskai nítʼééʼ, nidi ááhyiłníinii bee shił dahozhdoolnih doo bídazhneelʼą́ą da.
16 Nidi tʼáá ni tʼéí ááhyiłníinii baa hodíílnihgo nidantłʼago deítʼéehii kʼénááłdǫǫłgo bíninilʼą́ągo yíniiʼ. Kʼad díí bee akʼeʼashchínígíí yíníłtaʼ áádóó ááhyiłníinii shił bééhózin íinilaago ééʼ tsídídééh nahalingo łichíʼígíí bee handiʼdoolnííł índa óola béésh daʼahólzhaʼí nizénáztʼiʼgo éí tááʼ góneʼ aláahgo bee íhólníihgo bił hazʼáanii binanítʼáago ándeeshłííł.
17 Ákohgo Daniel éí aláahgo naatʼáanii ábizhdííniid, Tʼáá jííkʼeh aa dííléłígíí tʼáá ni nanjaah áádóó nályééh łaʼda bichʼįʼ kódíílííł, nidi díí bee akʼeʼashchínígíí aláahgo naatʼáanii tʼóó bichʼįʼ yídéeshtah áádóó ááhyiłníinii bił bééhózingo ádeeshłííł.
18 Aláahgo naatʼáanii nílíinii, Aláahgo Ayóóʼátʼéii Diyin God éí bee óhólnííh bił hazʼáanii áádóó tsʼídá ayóó átʼéii áádóó bee ayóó éʼétʼéii índa ił ídlíinii nizhéʼé yę́ę Nébukadnézzar yeidiníʼą́.
19 Áko tsʼídá ayóó átʼéii haidiníʼą́ągo bąą diné danilíinii áádóó ałʼąą dineʼé danilíinii índa bizaad ałʼąą átʼéego yee yádaałtiʼii tʼáá ałtso tʼáá íiyisí bitah nidahwiiłnáago hakʼee bił daayééʼ nítʼééʼ. Diyeeshhééł yóʼníinii neiłtsxeed nítʼééʼ, áádóó bił yáʼátʼéehii éí dahináago áyósin nítʼééʼ. Aʼohgo átʼéii atisgo átʼéego ádeileʼ nítʼééʼ, áádóó atisgo átʼéii aʼohgo átʼéego ádeileʼ nítʼééʼ.
20 Áko ádaa hodzódlí bee hajéí áádóó hániʼ yítłʼisgo bąą bikááʼdóó nahojiʼáii áádóó ayóó átʼéii índa bee ayóó ájítʼéii éí Diyin God hatsʼą́ąjįʼ kóyiilaa.
21 Diné danilíinii bitsʼá hodiʼneedzood áádóó hániʼ éí naaldlooshii bíniʼ bił aheełtʼé dzizlı̨́ı̨́ʼ índa télii daʼałchinii bitahgóó nahwííłkaʼ nítʼééʼ; béégashii nahalingo tłʼoh jiłchozh nítʼééʼ índa wótʼááhdę́ę́ʼ dahtooʼ tʼéí bee nínájíltłoh nítʼééʼ. Aláahgo Ayóóʼátʼéii Diyin God éí diné yee bóhólníihgo bił nahazʼą́ą́góó yinantʼá áádóó tʼáá bí yinízinígíí yá niyiiníiłgo hoł bééhoozinjįʼ ákójítʼéé nítʼééʼ.
22 Áko Belsházar nílíinii, ni éí biyeʼ nílı̨́įgo díí tʼáá átʼé nił bééhózin nidi, tʼáadoo ádaa hojíínílbáʼígo tsídííníkéez da.
23 Nidi yáʼąąshdę́ę́ʼ Bóhólníihii nilíinii bichʼįʼ ayóó ánítʼéego íʼdiinilyaa. Áko bikin biiʼ sohodizin góneʼ łeetsʼaaʼ chodaoʼı̨́ı̨́ nítʼééʼ yę́ę nił yah aheeshjaaʼ, ni índa nikééʼdóó bídahólníihii, neʼasdzą́ą́ danilíinii áádóó neʼasdzą́ą́ daníłʼíní éí yee wáin dayoodlą́ąʼgo béésh łigaii áádóó óola, béésh łitsoii áádóó béésh nitłʼizii, tsin índa tsé diyin béédaʼalyaago éí yaa dahaniih, nidi éí eʼelyaii doo daʼooʼı̨́į da, doo daʼdiitsʼaʼ da, doo bił éédahózin da. Nidi Diyin God nídídzihgo ánóhsinii áádóó ánítʼéii tʼáá ałtso bílákʼee siláii éí doo baa hóniih da nítʼééʼ.
24 Ákohgo Diyin God bitsʼą́ą́dę́ę́ʼ álázhoozh yee akʼeʼashchínígíí tʼáá éí bee akʼeʼashchı̨́.
25 Áko díí saadígíí Míínii, Míínii, Tííkel, Yufársin, níigo bee akʼeʼashchı̨́.
26 Míínii, nínígíí díí ááhyiłní: bee níhólníihgo bił hazʼáanii beidoołkáłígíí nidootʼihjįʼ yééltaʼ.
27 Tííkel, nínígíí díí ááhyiłní: ałtsʼą́ąhjįʼ dah hidiidlohí bee dah niʼdiidloʼgo aʼoh nínílʼąąd.
28 Pííres, nínígíí díí ááhyiłní: bee níhólníihgo bił hazʼáanii éí Míídiya dineʼé índa Pérzha dineʼé* bá ałtsʼádoodzohgo baa didootʼááł.
29 Ákohgo Belsházar haadzíiʼgo Daniel éí ééʼ tsídídééh nahalingo łichíʼígíí biih hoʼdooltı̨́, óola béésh daʼahólzhaʼí hayoʼ ályaa; tááʼ góneʼ bee óhólníihgo bił hazʼáanii bee hóhólníih doo.
30 Tʼáá éí bitłʼééʼ Belsházar joolyéii Kaldíya dineʼé binanitʼaʼí nilíinii seesxı̨́.
31 Áko Daráíyas Míídiya dineʼé nilı̨́įgo bee óhólníihgo bił hazʼáanii náhodiiʼą́; hastą́diindóó baʼaan naaki binááhaigo ákwáátʼįįd.
Footnotes
^ Bizhéʼé Nabonáídas éí a łdóʼ aláahgo naatʼáanii nilı̨́įgo yił nantʼáá nítʼééʼ.
^ Síriya dineʼé bizaad kʼehjí Pérzha jiníigo éí ahááʼnil jiní nahalingo diitsʼaʼ.
