Acts 24:1-27
24 Ashdlaʼ yiską́ą́dóó bikʼijįʼ Ananáíyas aláahgo nááʼiiłniihii áádóó diné yá aląąjįʼ naazíinii łaʼ, índa Tertálas yolyéé léiʼ, éí á yáłtiʼii nilı̨́įgo, ákóyaa yił yíkai. Éí Paul bee bikʼi hodiitʼáanii yee naatʼáanii yił dahoolneʼ,
2 áko hágo hoʼdooʼniidgo, Tertálas kóníigo hakʼi hodiiʼaahgo ayáʼniiłtiʼ:
Niniiłtʼaa tʼáá íiyisí hodéesyéelgo dahiniiʼnáago bąą nihił dahózhǫ́, áádóó honíyą́ągo baa áhólyánígíí binahjįʼ díí diné bitahgi doo yáʼádaatʼéehii hashtʼenááʼnííł,
3 kwáʼásiní, aláahgo ił nílíinii Fííliks, tʼáá áłahjįʼ índa tʼáá ałtsogi tʼáá íiyisí baa ahééh daniidzin.
4 Nidi tʼáadoo ádanihidiniłáhí, nee ajoobaʼ biniitʼaa saad tʼáá díkwíí nihá didíítsʼı̨́įłgo baa nánooshkąąh.
5 Jó, nihił béédahoozingo, eii diné nihwiiłchxǫǫhii nilı̨́, áádóó kéyah tʼáá átʼéé nítʼééʼ Jew dineʼé bitahgóó hááhoniłchaʼgo naaghá, índa łaʼ, Názariin dabidiiʼnínígíí yichʼijí danilíinii yá nahaʼáii nilı̨́.
6 Tʼah nááyówehgo, kin biiʼ sohodizin yidoołchǫǫłgo yíneeztą́ą́ʼ, nidi dasiilził, [áko tʼáá nihí nihibee hazʼáanii bikʼehgo haa nídadíitʼįįł nítʼééʼ.
7 Nidi siláo aląąjįʼ binanitʼaʼí Lísiyas nihaa níʼeezhgo tʼáá íiyisí tʼáá naʼníleʼdii nihílákʼee hahóółtı̨́,
8 áko Lísiyas éí hakʼi dahodiiʼaahii nidááhdóó nihidookahgo yá haadzííʼ]. Tʼáá ni nahódídííłkiłgo, bee hakʼi dahodiitʼánígíí nił bééhodoozįįłgo hazʼą́.
9 Jew dineʼé ałdóʼ díí bee hakʼi hodiitʼánígíí tʼáá ałtso tʼáá ákótʼé dadííniid.
Fííliks bidááhdóó Paul áchʼą́ą́h haadzííʼ
10 Ákohgo hazdoodzih biniyé naatʼáanii hóʼdeezhgishgo, Paul ájíní:
Díí dineʼé bá ánihwiiʼaahii nílı̨́įgo ląʼí nááhaígíí shił bééhózingo bąą, shił hózhǫ́ǫgo ninááł ákʼi hadideesdzih.
11 Naakitsʼáadah yiskánídą́ą́ʼ atah nahodeeshłaał biniyé Jerúsalemgóó níyá,
12 áko kin biiʼ sohodizin bił hazʼą́ą́ góneʼ diné doo łaʼ bił ałghaʼdishtʼáahgo dashijiiłtsą́ą da, doo nidi diné bił hahonishchaad da, kin biiʼ áłah nídaʼadleehgi índa kin haalʼáagi nidi doo ákóshtʼı̨́į da.
13 Áko kʼad bee shikʼídahojiʼáhígíí nidi ninááł tʼáá aaníí ájítʼı̨́ doo dashizhdóneʼ átʼée da.
14 Nidi díí bee tʼáá aaníígóó nichʼįʼ ádaa chʼíhonishtʼaah, jó, éí honítʼiʼii,* bee ałtsʼáʼáldah deiłnínígíí bikʼehgo, danihizhéʼé yę́ę biDiyin God bichʼįʼ nahashłá, nidi bee nihá hazʼáanii índa Diyin God yá dahalneʼii binaaltsoos biiʼ bee akʼedaʼashchínígíí tʼáá ałtso wooshdlą́,
15 áádóó tʼáá daabí Diyin God yaa dadzólíigo, tʼáá ákogi ádaatʼéii índa doo ákwii ádaatʼéii daneeznáádę́ę́ʼ náábidiʼdooljahgo yíká dadéezʼı̨́ı̨́ʼ, áko shí ałdóʼ tʼáá ákóníshtʼé.
16 Éí bąą tʼáá áłahjįʼ dziilí bee Diyin God índa diné bichʼįʼ tʼáá ákwii áníshtʼéego íʼdííníszinígíí doo shiʼdiiłʼáágóó íínísin.
17 Áko kweʼé doo naasháágóó díkwíí shı̨́ı̨́ shinááhaigo, daʼoodlání yee dajoobaʼii shidineʼé baa dadeeshnił áádóó náádiʼyeeshnih biniyé kʼad índa náánísdzá.
18 Éidíígíí baa naasháago, kin biiʼ sohodizin bił hazʼą́ą́ góneʼ doo ąąh chingóó nahadlá bíighah aséłı̨́įʼgo, doo nidaʼaldeehgóó, doo nidi hahóóʼáágóó Éízhadę́ę́ʼ Jew dineʼé łaʼ shikʼídadziskai.
19 Éí bee shikʼídahojiʼáahii hwee dahólǫ́ǫgo, kweʼé nidááhdóó nizhdookahgo bee hadazdoodzih nítʼééʼ.
20 Éí doodago, díí diné ándahaʼáii bidááhdóó sézı̨́ı̨́ nítʼééʼ yę́ędą́ą́ʼ, doo ákǫ́ǫ́ íisdzaii shá hoł béédahoozin ládą́ą́ʼ, hániʼdii tʼáá hó baa chʼídahojíʼaah,
21 tʼáá hazhóʼó bitahgi sézı̨́ı̨́ nítʼééʼ yę́ędą́ą́ʼ tʼááłáhígo tʼéiyá tʼáá yéego bee haasdzííʼ, jó éí, Daʼneeznáádę́ę́ʼ náádiʼdoojah haʼnínígíí biniinaa díí jı̨́ nihinááł shaa hwiinítʼı̨́, dííniid.
22 Nidi Fííliks [díí yidiiztsʼą́ąʼgo], honítʼiʼii tʼáá íídą́ą́ʼ bił bééhózingo, Lísiyas, siláo aląąjįʼ binanitʼaʼí níyáago índa bee naa hwiinítʼíinii ná baa nídéeshtʼįįł, níigo náás yideezʼą́.
23 Áádóó Fííliks éí siláo neeznádiingo binanitʼaʼí áyidííniid, Paul baa áhólyą́, áádóó bíniʼdii tʼáá bí nízingóó nahaltsaadgo dabichʼoonéhígíí bá nidaalʼaʼ doo biniyé baa nídaakahígíí tʼáadoo bitsʼą́ąjįʼ kóníłʼíní.
Paul éí Fííliks áádóó beʼasdzą́ą́ yichʼįʼ yáłtiʼ
24 Nidi tʼáá díkwíida yiską́ągo, Fííliks beʼasdzą́ą́ Drusíla yił níʼáázh, éí Jew dineʼé nilı̨́. Fííliks éí Paul yíká iʼííłʼaʼ, nítʼééʼ áádę́ę́ʼ níyáago Christ Jesus woodlą́ągo baa hodzódlí yaa halneʼgo yidiiztsʼą́ą́ʼ.
25 Áko tsʼídá tʼáá ákogi éʼétʼé índa ádaa áháyą́, áádóó ánihootʼaah bichʼįʼ hoolzhishígíí bee hadziisdzíiʼgo, Fííliks tʼáá íiyisí yikʼee bił yééʼ hazlı̨́ı̨́ʼ, áko, Kʼad nílááh yínááł; hahgoda ashja hoodzaago índída níká anááʼdeeshʼaał, hodííniid.
26 [Paul béézhʼníłniiʼgo] eii shı̨́ı̨́ béeso łaʼ sheidooniłgo daʼátʼé jiniizı̨́ı̨́ʼ. Áko tʼáá ahą́ą́h yíká anáʼáłʼaahgo yił ahił náhálnih.
27 Nidi áádóó naaki nááhaigo Pórshas Féstas éí Fííliks naatʼáanii nilı̨́ı̨́ nítʼééʼ yę́ęgi naatʼáanii nilı̨́į doo biniyé níyá, áádóó Fííliks éí Jew dineʼé bił dahodeeshǫǫł niizı̨́įʼgo, Paul tʼáá awáalyaa sidáa doogo yee nihoníʼą́ągo dah diiyá.
Footnotes
^ Honítʼiʼii nínígíí éí Jesus woodlą́, níigo ání.
