2 Corinthians 6:1-18
6 Áko Diyin God bił neiilnishii Diyin God bibee ajoobaʼ tʼáadoo biniyéhígóó tʼáadoo nídahidoohłéhí nihidiiʼníigo nánihiikąąh,
2 háálá bí ání,
Níídéestsʼįįłjįʼ ahoolzhiizhgo baa shił hózhǫ́ǫgo nidisétsʼą́ą́ʼ,índa yisdáʼiildééh beiníłką́ yę́ędą́ą́ʼ níká aashwod.
Shoo, kʼad tsʼídá áajįʼ ahoolzhiizh; kʼadyeeʼ yisdáʼiildééh bił hoolzhish.
3 Bee neiilʼaʼígíí doo bikʼíhátʼáah da doo biniyé, diné łaʼda bidínóołtłʼahii doo bidáahjįʼ ahiiʼníił da,
4 nidi tʼáá ałtsojįʼ Diyin God yá naalʼaʼí niidlı̨́įgo ádééhoniilzinii, yéego haʼííníilníigo tiʼdanihiyoołnííh, nihichʼįʼ nahoʼdiilná, nihichʼįʼ nahwiiʼná,
5 nánihidiʼniltsxis, awáalyaaí niidlı̨́, nihił háhonichaʼ, yéego neiilnish, doo awosh, índa dichin ídlı̨́ ádaatʼéii bichʼįʼ haʼííníilní,
6 áádóó tʼáadoo bee nihikʼíhótʼahígóó, áádóó ałdóʼ nihił ééhózinígíí, nízaadgóó haʼííníilnínígíí, nihá áhwiinítʼı̨́ʼígíí, Níłchʼi Diyinii, tʼáá aaníígóó ayóóʼíʼííníiʼnínígíí bee yáʼátʼéehgo ádééhoniilzin,
7 áádóó ałdóʼ tʼáá aaníígóó saad bee yéiiltiʼgo, índa Diyin God bibee adziilii bee; tsʼídá tʼáá ákogi átʼéii bideezlaʼ nishʼnáájí índa nishtłʼají bee yíníitąʼ,
8 áádóó nihił dajílı̨́ índa doo nihił dajílı̨́į da, nihíniʼ neheʼaah índa yáʼátʼéehgo ééhoʼdílzin bee yáʼátʼéehgo ádééhoniilzin. Binaʼadloʼii niidlı̨́įgo nihaa nitsáhákees nidi, tʼáá aaníinii bikʼehgo ániitʼé;
9 diné doo bééhoʼdílzinii niidlı̨́į nidi, yáʼátʼéehgo nihééhoʼdílzin; nabiʼdiztseedii niidlı̨́į nidi, tʼáá hiniiʼná; atélyaii niidlı̨́į nidi, doo naaztseedii niidlı̨́;
10 yínííł naagháii niidlı̨́į nidi, tʼáá áłahjįʼ bił hózhóonii niidlı̨́; téʼéʼı̨́ niidlı̨́į nidi, ląʼí daʼatʼı̨́įgo ádeileʼii niidlı̨́; tʼáadoo nihee hólónída nidi, tʼáá ałtsoní bee hólóonii niidlı̨́.
11 Kórinth dineʼé danohłíinii, nihijéí tłʼááhdę́ę́ʼ įįh nihííníiʼníigo tʼáá ałtsojįʼ ííshjání ídíʼníilzingo nihichʼįʼ yéiiltiʼ.
12 Nihijéí biiʼ nihá hosiilʼą́, nidi nihí aají danihijéí biiʼ doo nihá nidahosoołʼą́ą da.
13 Nábidinínáádę́ę́ʼ nihí ałdóʼ danihijéí bee ayóóʼádanihíínóhʼníi leʼ; haʼáłchíní bichʼįʼ yájíłtiʼígi átʼéego yáshtiʼgo ádíshní.
Nihí Diyin God hináanii bikin biiʼ sohodizin daniidlı̨́
14 Doo daʼoodlání tʼáadoo bił ałchʼodanohʼníní. Háálá haa yitʼéegoshąʼ diné tʼáá ákogi átʼéii índa doo ákogi átʼéii ałchʼooʼníi doo? Doodaléiʼ haa yitʼéegoshąʼ adinídíín éí chahałheeł yił ahił nidlı̨́į doo?
15 Haʼátʼíísh bee Christ índa níłchʼi bidaʼiiníziinii binanitʼaʼí yee aheełtʼéego nitsíkees? Doodaléiʼ oodlání índa doo oodláníshąʼ haʼátʼíí tʼááłáʼíígíí ałtsʼą́ą́ʼ íłkʼiiz doo?
16 Diyin God bikin biiʼ sohodizin índa edaʼalyaiishąʼ haʼátʼíí yee tʼááłáʼí nilı̨́įgo ahaʼdidootʼááł? Jó, nihí Diyin God hináanii bikin biiʼ sohodizin daniidlı̨́, háálá Diyin God tʼáá bí ádííniid,
Hatah kééhashtʼı̨́į doo, áádóó hataasháa doo,áádóó haDiyin God nishłı̨́į doo,índa hó shidineʼé dajílı̨́į dooleeł.
17 Éí bąą Bóhólníihii ádííniid,Doo oodláanii bitahdę́ę́ʼ wóshdę́ę́ʼ chʼíhóhkááh,áádóó tʼáá sahdii bitsʼą́ąjįʼ ahohkááh,áádóó haʼátʼíhída tʼóó badaaʼihii tʼáadoo baa nídaahtʼíní,áko nihichʼįʼ kʼé nísdzingo shaa hidoohkah,
18 áádóó nihiTaaʼ nishłı̨́į doo,áko nihí tʼéiyá shiyeʼké índa shitsiʼké danohłı̨́į doo,
ní Bóhólníihii Aláahgo Ayóóʼábóodziilii.
