1 Thessalonians 5:1-28
5 Nihikʼisóó, díí áhodooníłígíí baa hodoolzhishgi índa beidoołkáałgi bee nihichʼįʼ akʼeʼdoolchíłígíí doo bee nihichʼįʼ anáhóótʼiʼ da.
2 Háálá tʼáá nihí nihił béédahózin, tłʼéeʼgo aniʼįįhii yígháhígi átʼéego Bóhólníihii beidoołkááł,
3 áko diné, Hashtʼehodítʼée yeeʼ áádóó yáʼádahootʼééh, daaníi nidi tʼáadoo hooyání bee íʼdooldįįłii bikʼi hwiidooleeł, asdzání iʼniiłchíihgo bił náhodíníigahígi átʼéego, áko tsʼídá tʼáadoo bee yisdáhóótʼiʼí da doo.
4 Nidi nihikʼisóó, nihíyeeʼ doo chahałheeł biiʼ naałdeeh da, áko Bóhólníihii nádzá bijı̨́įdi aniʼįįhii tsíhodiłhisígi átʼéego doo tsídadidoołyis da.
5 Tʼáá ánółtso adinídíín índa jı̨́ baʼáłchíní danohłı̨́; nihíyeeʼ tłʼééʼ, doodaiiʼ chahałheeł doo bitsʼą́ą́dóó daniidlı̨́į da.
6 Ákótʼé bąą, łaʼ ádaatʼínígi átʼéego tʼáadoo tʼóó daʼiilwoshí doo, nidi hadaʼísídíilʼı̨́įʼgo hazhóʼó nitsídeiikees doo.
7 Jó, daʼałhoshii éí tłʼéeʼgo daʼałhosh, daʼadláanii éí tłʼéeʼgo tsiʼnidaakai.
8 Nidi jı̨́ biiʼ dahoniidlónígíí bąą haaʼíshąʼ hazhóʼó nitsídeiikees doo. Oodlą́ índa ayóóʼóʼóʼní béésh ééʼ nahalingo nihijéítsʼiin bąąh nidahidiiʼnił, áádóó yisdáʼiildééh bíká ił chohooʼíinii béésh chʼah danihichʼah ádadiilnííł.
9 Háálá Diyin God tʼóó báhádzidgo bibee atéʼélʼíinii doo yichʼįʼ ninihidiníʼą́ą da, nidi nihiBóhólníihii Jesus Christ bee yisdáʼiildéehii nihee nidahwiileeh.
10 Éí nihá daaztsą́, áko dahiniiʼnáago doodaléiʼ daneeʼnáa nidi nádzáago bił dahiniiʼnáa doo.
11 Éí bąą tʼáá ádaahtʼínígi átʼéego chánah ídaʼahołneʼ índa ahíłká anáhjahgo nihidziil ádaʼahołnééh.
Bee naʼnitinii áádóó kʼé haʼníigo bee naaltsoos niiltʼiʼii
12 Nihikʼisóó, díí baa nídanihiikąąh, nihitah nidaalnishii éí Bóhólníihii yee nihilą́ąjįʼ naazı̨́įgo nidanihinitinii nihił danilı̨́į leʼ.
13 Bindaanish biniinaa tʼáá íiyisí nihił danilı̨́įgo ayóóʼádeínóhʼníi leʼ. Kʼé daʼahíínóhʼníigo kéédahohtʼı̨́.
14 Áádóó nihikʼisóó danohłíinii, nihiyadahoniidlįįh: ákʼeh dahalʼíinii nidadohtehgo nidanohtin, bijéí doo hadaʼólníinii chánahgo ádaahłeʼ, doo dabidziilii bíká anídaahjah, diné tʼáá ałtso bichʼįʼ hadaʼíínółní.
15 Nihichʼįʼ doo yáʼátʼééhgóó ádaatʼíinii kʼéédideeshdlííł tʼáadoo danohsiní, nidi tʼáá áłahjįʼ ałchʼįʼ índa diné tʼáá ałtso bichʼįʼ yáʼátʼéehii baa nidaahkai leʼ.
16 Tʼáá áłahjįʼ nihił dahózhǫ́ǫ leʼ.
17 Tʼáá áłahjįʼ sodadołzin leʼ.
18 Tʼáá ałtsojįʼ ahééh danohsin leʼ. Díidíígíí Christ Jesus bee Diyin God yee nihá íinízin.
19 Tʼááká Níłchʼi Diyinii noołtłʼááh yíilaʼ.
20 Diyin God bá haneʼii tʼáadoo bá dadoołnihí.
21 Naʼnitin tʼáá ałtso nidaałkaah; yáʼádaatʼéehii yéego dayínóhtąʼ,
22 doo yáʼádaatʼéehii tsʼídá tʼáá ałtso bitsʼąą ádaa ádahołyą́.
23 Diyin God bee achʼįʼ hózhǫ́ náhásdlı̨́įʼii, tʼáá bí tsʼídá diyingo ánihóleʼ, áádóó nihiBóhólníihii Jesus Christ nádzáajįʼ nihiníłchʼi áádóó nihiiʼ naazíinii índa nihitsʼíís tʼáadoo bee bikʼídahótʼahígóó hadaałtʼéego nihá yaa áhályą́ą leʼ.
24 Nihíká áníinii éí baa hodzódlíii éí łaʼyidoolííł!
25 Nihikʼisóó, nihá sodadołzin.
26 Ałkʼisóó danohłíinii tʼáá ánółtso, ahíláłkʼe dadołniihgo kʼé bééʼahohjih.
27 Bóhólníihii bee nihichʼįʼ haasdziih, díí naaltsoos nihikʼisóó danilíinii tʼáá ałtso bichʼįʼ yídóoltah.
28 NihiBóhólníihii Jesus Christ bibee ajoobaʼ nihił hólǫ́ǫ doo. [Tʼáá ákótʼée doo.]
