1 Peter 4:1-19
4 Christ bitsʼíís yee tiʼhoozniiʼgo nihí ałdóʼ tʼáá ákótʼéego tiʼhooʼniih bídanołdzilgo nitsídaahkees, háálá tʼáá háiida hatsʼíís tiʼbidiʼyoolníhígíí bąąhági átʼéii doo bił ahízhdéétʼiʼ da silı̨́ı̨́ʼ.
2 Áko nizhʼníłdįįd bijı̨́įjįʼ tsʼísee kʼehgo iiná bee adááháníinii doo bikʼehgo náájiiʼnáa da doo, nidi Diyin God íinízinii bikʼehgo jiináa doo.
3 Háálá nihí łah doo Jew dineʼé danilíinii ádaatʼínígi ádaahtʼı̨́ı̨́ nítʼééʼ, baaʼihgo tsiʼnidaahkai nítʼééʼ, adádanoołníí nítʼééʼ, wáin daahdlą́ą́ nítʼééʼ, adlą́ nihił dahoneełni nítʼééʼ, tʼáá naʼníleʼdii nidaʼsoohdląʼ, índa eʼelyaii doo daaldinii bichʼįʼ nidahohłáá nítʼééʼ.
4 Áko doo daʼoodlání kʼad tʼáá íiyisí tsiʼnaaldeehgi doo éédadoohjahgóó yikʼee tʼóó bił adahayóí, áádóó danihiʼı̨́įgo yádaałtiʼ.
5 Ákódajiníigo ádajíítʼįįdii éí diné dahinánígíí índa daneeznánígíí yá nihodiyooʼáałgo yibaʼ átʼéii bichʼįʼ ádaa nidahozhdoolnih.
6 Áko dazneeznáanii, nihokááʼ dineʼé tʼáá ałtso baa nídahódóotʼįįłígi átʼéego haa dahwiinístʼįįd nidi, daʼjoosdląądgo tʼáá Diyin God hinánígi átʼéego dajiináa doo biniyé haneʼ yáʼátʼéehii bee hoł dahaneʼ nítʼééʼ.
7 Kʼadę́ę nihodoogáałjįʼ ahalzhíísh. Éí bąą ádaa dahonohsą́ áádóó hadaʼísídółʼı̨́įʼgo sodadołzin.
8 Íiyisí agháagoígíí éí tʼáá aaníí ayóóʼádaʼahíínóhʼní, háálá ayóóʼáhiʼjóʼníigo éí bee tʼóó ahayóígóó niʼjiisíih nidi bikʼi hwiizdooził.
9 Nihaʼałkʼee nídaakahígíí tʼáadoo doo sohdadoołʼįįłí, nidi nihił danilı̨́.
10 Tʼááłáʼí nootínígo tʼáá daʼníłʼąą Diyin God nihaa joobaʼgo nihaidiníʼáanii nizhónígo bá chodaołʼı̨́įgo bee ahíłká anídaahjah leʼ.
11 Tʼáá ałtsojįʼ Jesus Christ biniitʼaa Diyin God baa haʼniih doo biniyé tʼáá háiida hadziidziihígíí tʼáá Diyin God tʼéí báhadziidziih doo; tʼáá háiida áká aníjílwoʼígíí tʼáá Diyin God bee adziilii hainíláhígíí bíighahgo bee áká aníjílwoʼ doo. Jesus Christ éí hoolʼáágóó ahóyéelʼáágóó baa haʼniih índa bóhólníih doo. Tʼáá ákótʼée doo.
Oodlání ídlı̨́įgo tiʼhooʼnííh
12 Ayóóʼánihóshʼníinii, kǫʼ nahalingo naʼíhonitaah bee nihéédahodoozįįł biniyé bee nihichʼįʼ áhooníłígíí tʼáadoo bikʼee tʼóó nihił adahayóí. Tʼáadoo áhoʼdólneʼgi laʼ átʼéégóó nashóhonitaah tʼáadoo danohsiní.
13 Nidi Christ yikʼee tiʼhoozniiʼii bił ałtsʼą́ą́ʼ daʼnołkʼiizígíí baa nihił dahózhǫ́ǫ leʼ. Áko Christ bee biʼoh adidilyéehii* nihichʼįʼ yitʼíní silı̨́įʼgo tʼáá íiyisí baa nihił dahózhǫ́ǫ dooleeł.
14 Christ bííʼ danohłínígíí biniinaa nihił nidaʼíʼįįh nidi baa nihił dahózhǫ́, háálá Níłchʼi Diyinii ayóó átʼéii, Diyin God biNíłchʼi Diyinii, nihikʼi hooleʼ. Danihódziih nidi Diyin God éí íiyisí dayódziih, nihíjígo nihee Diyin God baa haʼniih.
15 Diné neiłtseedii, daʼniʼįįhii, baaʼihii yaa nidaakaii áádóó diné binaanish yitsʼą́ą́ʼ deiníłtłʼaii tiʼdahooníhígi átʼéego tʼáadoo ákótʼéego tiʼdahoohníhí.
16 Nihí Christ deinohdlą́ągo biniinaa tiʼdahoohʼníihgo tʼáadoo baa yádanohsiní, nidi Christ bízhiʼ bee danihiʼdójíhígíí bee Diyin God baa dahohniih.
17 Diyin God éí tʼáá bí baʼáłchíní danilíinii baa dahwiidínóotʼįįłjįʼ ahoolzhiizh. Áko nihí áłtsé nihaa dahwiidínóotʼįįłgo, ákodashąʼ Diyin God baa haneʼ yáʼátʼéehii doo yikʼeh dahółʼínígíí tʼah aláhídi átʼéego haadashąʼ yitʼéhégo há nidahodiyootʼááł!
18 Áádóó diné tsʼídá tʼáá ákogi ádajítʼéii tʼáá íiyisí hojoobáʼígo yisdájookaigo,Diyin God doo dazdísingóó bąąhági ádajooníłígíí haadashąʼ hodiʼdoolnííł.
19 Éí bąą Diyin God íinízinii bikʼehgo tiʼdahojooníhígíí éí yáʼátʼéehgo ádajooníiłgo Íʼiilaii baʼahódlíii baa ádahizhdidootʼááł.
Footnotes
^ Biʼoh adidilyééh éí bidziilgo bitsʼádiʼnílíidgo doo jinóółʼı̨́ı̨́ʼ átʼéégóó óolyé.
