1 John 4:1-21
4 Ayóóʼánihóshʼníinii, Níłchʼi Diyinii shiiʼ hólǫ́, daanínígíí tʼáadoo tʼáá ałtso deinohdlání, nidi éí tʼáá ałtso nidaałkaah, tʼáá daatsʼí aaníí Diyin God biNíłchʼi Diyinii biiʼ dahólǫ́. Háálá tʼóó ádahodilʼı̨́įgo dahalneʼii nihokááʼgóó tʼóó ahayóí deíkááh.
2 Díí bee Diyin God biNíłchʼi Diyinii biiʼ dahólónígíí nihił béédahózin doo, jó éí, Jesus Christ diné silı̨́įʼgo biʼdizhchı̨́, daanínígíí Diyin God biNíłchʼi Diyinii biiʼ hólǫ́.
3 Nidi tʼáá háiida, Jesus Christ doo diné silı̨́įʼgo biʼdizhchı̨́į da, dajinínígíí, éí Diyin God biNíłchʼi Diyinii hwiiʼ ádin. Nidi Christ biʼanaʼí nilíinii biníłchʼi tʼéí hwiiʼ hólǫ́. Christ biʼanaʼí biníłchʼi doogááł haʼníigo dasidootsʼą́ʼígíí kʼad tʼáá íídą́ą́ʼ nihokáaʼgi hólǫ́.
4 Shaʼáłchíní, nihí Diyin God bííʼ danohłı̨́, áko doo tʼáá aaníí átʼéégóó nidaʼnitinii bikʼeh dasidoohdlı̨́ı̨́ʼ, háálá nihiyiʼ hojílónígíí éí nihokááʼ dineʼé bitahdi hólónígíí biláahgo áhóodziil.
5 Éí nihokááʼ yitsʼą́ą́dóó ádaatʼı̨́, éí bąą nihokááʼ dineʼé kʼehgo yádaałtiʼ, áádóó nihokááʼ dineʼé dabidiitsʼaʼ.
6 Nidi nihí éí Diyin God bííʼ daniidlı̨́. Tʼáá háiida Diyin God yééhósinígíí danihidiitsʼaʼ, nidi Diyin God doo bííʼ danilíinii doo danihidiitsʼaʼ da. Díí bee tʼáadoo bahatʼaadí Níłchʼi tʼáá aaníinii índa níłchʼi binaʼadloʼii nihił béédahózin.
Diyin God éí ayóóʼóʼóʼníinii nilı̨́
7 Ayóóʼánihóshʼníinii, haaʼíshąʼ ayóóʼádaʼáhííníiʼníi doo, háálá ayóóʼóʼóʼní éí Diyin God bitsʼą́ą́dę́ę́ʼ, áádóó ayóóʼóʼóʼníinii éí Diyin God bitsʼą́ą́dóó biʼdizhchı̨́, áko Diyin God yééhósin.
8 Tʼáá háiida doo ayóóʼáʼjóʼníinii éí Diyin God doo bééhodzísin da, háálá Diyin God ayóóʼóʼóʼníinii nilı̨́.
9 Jó, Diyin God biYeʼ tʼááłáʼí bá yizhchínígíí bee dahiniiʼnáa doo biniyé nihokááʼ dineʼé yitahjįʼ yiníłʼaʼ. Díí bee Diyin God ayóóʼánihóʼnínígíí nihił béédahoozin.
10 Díí éí ayóóʼóʼóʼní bee bééhózinii: nihídóogo Diyin God ayóóʼádeíníiʼnínígíí éí dooda, nidi bídę́ęʼgo ayóóʼánihóʼníigo biYeʼ nihá dadootsaał biniyé yiníłʼaʼgo nihibąąhági átʼéii ałtso nihá yóóʼiidííʼą́.
11 Ayóóʼánihóshʼníinii, díigi átʼéego Diyin God ayóóʼánihóʼníigo, haaʼíshąʼ nihí ałdóʼ ayóóʼádaʼahííníiʼníi doo.
12 Diné tsʼídá doo łaʼ Diyin God yiyiiłtsą́ą da, ayóóʼádaʼahííníiʼníigo, Diyin God nihiyiʼ hólǫ́, áko Diyin God bee ayóóʼóʼóʼniʼ nihiyiʼ hadaałtʼéego hashtʼeelyaa.
13 Diyin God haNíłchʼi Diyinii nihaazhníłʼaʼígíí bee Diyin God hwiiʼ dahoniidlǫ́ áádóó nihiiʼ hojílǫ́ǫgo nihił béédahózin.
14 Áádóó aYeʼ nihokááʼ dineʼé yisdáyiinííł dooleełgo aTaaʼ biníłʼaʼígíí daníilʼı̨́ı̨́ʼ, áko éí baa chʼídahoyiitʼaah.
15 Tʼáá háiida Jesus éí Diyin God biYeʼ nilı̨́įgo bee hadziidziihígíí éí Diyin God hayiʼ hólǫ́, áádóó Diyin God biyiʼ hojílǫ́.
16 Áko Diyin God ayóóʼánihóʼníigo nihił béédahózin áádóó deisiidląąd. Diyin God ayóóʼóʼóʼní átʼé, áko ayóóʼóʼóʼní biyiʼ hojílónígíí, éí Diyin God biyiʼ hojílǫ́, áádóó Diyin God hayiʼ hólǫ́.
17 Éí lá bee ayóóʼóʼóʼní nihiyiʼ hadaałtʼéego hashtʼeelyaa ni, áko ánihwiitʼaah beiníłką́ądi doo nitsideiidáa da dooleeł, háálá nihokáaʼgi nihí ałdóʼ tʼáá bí átʼéhígi ádaniitʼé.
18 Ayóóʼóʼóʼní, yééʼ bąąh ádin, nidi ayóóʼóʼóʼní hadaałtʼéii yééʼ baa yóóʼahijeeh. Háálá yééʼ atíʼélʼı̨́ bił naatʼiʼ, áko bił yééʼ hólóonii doo hadaałtʼéego ayóóʼóʼóʼníi da.
19 Diyin God átsé ayóóʼánihóʼníigo bąą ayóóʼádeíníiʼní.
20 Diné łaʼda, Diyin God ayóóʼóóshʼní, jiníi nidi hakʼis jijoołáago, biyoochʼíidii jílı̨́, háálá éí hakʼis tʼáá jooʼı̨́į nidi doo ayóóʼájóʼníígóó, haʼátʼéegoshąʼ Diyin God doo jooʼı̨́į da nidi ayóóʼájóʼníi dooleeł?
21 Áádóó díí bikʼeh óʼooʼníiłii Diyin God bitsʼą́ą́dę́ę́ʼ nihee dahazlı̨́ı̨́ʼ, éí tʼáá háiida Diyin God ayóóʼájóʼnínígíí hakʼis ałdóʼ ayóóʼájóʼníi dooleeł.
