1 Corinthians 3:1-23
3 Shikʼisóó, Níłchʼi Diyinii kʼehgo dahináanii nanishtinígi átʼéego nanihidínéeshtįįłígíí doo tsʼídá shił bohónéedzą́ą da, nidi tsʼísee kʼehgo dahináanii nanishtinígi átʼéego nanihinétą́ą́ʼ. Christ bee awééʼchíʼí danohłı̨́įgo tʼáá bééhózínígo nihichʼįʼ yáshtiʼ nítʼééʼ.
2 Awééʼ danohłı̨́ nahalingo abeʼ danihiyííłdlą́ą́ʼ, chʼiyáán niłdzilii éí dooda, háálá éí tʼah doo baa danoohsée da. Jó, tʼahdii nidi abeʼ daahdlą́,
3 háálá tʼahdii tsʼísee kʼehgo ádanohtʼé. Nihitahgi łaʼ daʼahoołchʼı̨́ı̨́d, łaʼ ahináádadoołtłiʼ, łaʼ ałtsʼáohkah, áko tsʼísee kʼehgo ádanohtʼé. Doo daʼoodláanii dayíkáhígi átʼéego dayínóhkááh.
4 Nihitahgóó łaʼ ádaaní, Shí Paul yíhoołʼaahii nishłı̨́, náánáłaʼ ánáádíʼní, Shí tʼéí Apálas yíhoołʼaahii nishłı̨́, dadohníigo tsʼísee kʼehgo ádanohtʼéego ádadohní.
5 Ákoshąʼ Paul haʼátʼíí nilı̨́? Apálasshąʼ ałdóʼ haʼátʼíí nilı̨́? Jó, Diyin God yá naalʼaʼí niidlı̨́įgo haneʼ yáʼátʼéehii bee nihił dahwiilneʼígíí bee daʼiisoohdląąd. Bóhólníihii tʼáá ałʼąą nihaidiníʼánígíí bikʼehgo neiilʼaʼ.
6 Shí Diyin God bizaad kʼidíílá, Apálas éí tó yił niyiizką́, nidi Diyin God tʼéí yidínéesą́.
7 Áko kʼéézhʼdídléhígíí, doodaiiʼ tó ił nijiikaahígíí éí tʼáadoo jílíní da, nidi Diyin God éí tʼáá ákónéehee adíníséii nilı̨́.
8 Áko kʼéézhʼdídléhígíí índa tó ił nijiikaahígíí éí tʼáá aheełtʼéego, hanaanish silı̨́ʼígíí bikʼehgo Diyin God hachʼįʼ niʼdoolééł.
9 Háálá Diyin God bił deíníilníísh. Nihí Diyin God bidáʼákʼeh danohłı̨́. Diyin God bikin yitłʼı̨́įłii ałdóʼ danohłı̨́.
10 Diyin God shaa joobaʼgo naanish yee shikʼi diilniiʼgo kin ííłʼíní hóyą́ągo índa yiyiichįįhígi átʼéego atłʼááh nástłʼinii íishłaa, áádóó náánáłaʼ diné éí bikááʼdóó ajootłʼı̨́ı̨́ł. Nidi hániʼdii diné tʼááłáʼí jinítínígo bikááʼdóó hazhóʼó daʼjítłʼin dooleełígíí éí tsʼídá bee ádaa ádahojilyą́ą doo.
11 Háálá Jesus Christ atłʼááh nástłʼinii nilı̨́įgo ábiʼdiilyaa. Áko diné łaʼda atłʼááh nástłʼinii náánáłahgo átʼéii doo hanáájótłʼin átʼée da.
12 Diné łaʼ atłʼááh nástłʼinii bikááʼdóó óola, béésh łigaii, tsé daʼílíinii deitłʼin, náánáłaʼ éí tsin, tłʼohda, ehégoda deitłʼin.
13 Éí tʼááłáʼí jinítínígo hanaanish béédahodoozįįł, háálá Christ beiníłką́ądi kǫʼ bee bídahodínóotahgo béédahodoozįįł. Tʼááłáʼí jinítínígo hanaanish daazlı̨́įʼii kǫʼ bee bídahodínóotah.
14 Diné łaʼda atłʼááh nástłʼinii bikááʼdóó adziztłʼinígíí yidzíiʼgo éí hachʼįʼ niʼdoolyééł.
15 Nidi diné łaʼ éí adziztłʼinígíí adííkʼą́ąʼgo éí yóóʼiʼdoołdił, nidi bí tʼéiyá yisdádoogááł, kǫʼ biyiʼgóó chʼízhníyá nahalingo jidoodzih.
16 Diyin God bikin biiʼ sohodizin danohłínígíí áádóó Diyin God biNíłchʼi Diyinii nihiiʼ hólónígíí, daʼ éísh doo nihił béédahózin da?
17 Diné łaʼ Diyin God bikin biiʼ sohodizin jííłchxǫʼgo hó ałdóʼ Diyin God hodoołchxǫǫł. Háálá Diyin God bikin biiʼ sohodizinii diyin, nihí éí bikin biiʼ sohodizinii danohłı̨́.
18 Tʼááká diné łaʼda ádiʼdódleeh lágo. Díí hoolzhishígíí biyiʼ diné łaʼ nihitahgi honisą́ jinízingo hániʼdii doo áháshyą́ą da jidínóozįįł, áko índa Diyin God bitsʼą́ą́dę́ę́ʼ hódzą́ hwee hodooleeł.
19 Háálá nihokááʼ dineʼé bibee hódzáanii éí Diyin God binááł doo áháyą́ átʼé. Diyin God bizaad bee akʼeʼashchíinii ání,
Honiidzą́ daznízinii tʼáá hó hanahagizígíí bee tsístłʼah jiikáahgo Diyin God áhósin.
20 Áádóó ánáádíʼní,Nihokááʼ dineʼé nitsídaakeesii tʼáadoo nánídlínígóó Bóhólníihii bił bééhózin.
21 Éí bąą diné łaʼda diné doo bee ádeijódlíi da dooleeł. Jó, tʼáá ałtsoní danihííʼ:
22 Paul áádóó Apálas índa Peter éí nihííʼ danilı̨́, nahasdzáán, iiná, aniné nidi, kʼad hólónígíí índa dahodooleełígíí éí tʼáá ałtso danihííʼ,
23 áádóó nihí Christ bííʼ danohłı̨́, índa Christ éí Diyin God yííʼ nilı̨́.
