1 Corinthians 14:1-40
14 Diyin God beʼayóóʼóʼóʼniʼ nihíniʼ danilı̨́į leʼ. Níłchʼi Diyinii aidiiʼaahii ałdóʼ hádaahtʼı̨́įgo Diyin God bá dahołneʼ dooígíí éí agháago hádaahtʼı̨́.
2 Jó, álílee kʼehgo yátiʼ bee yájíłtiʼígíí doo diné bichʼįʼ yájíłtiʼ da, háálá diné doo hakʼiʼdiitįįh da, nidi Diyin God bichʼįʼ yájíłtiʼ. Naʼnitin doo béédahózinii Níłchʼi Diyinii bee baa yájíłtiʼ.
3 Nidi tʼáá háiida Diyin God bá hojilneʼígíí éí saad yee diné dadínóoséełii, áádóó yee chánah danilı̨́į dooleełii, índa yee hadaʼólníi dooleełii bee bichʼįʼ yájíłtiʼ.
4 Álílee kʼehgo yátiʼ bee yájíłtiʼígíí tʼáá hó hweʼoodląʼ bidziilgo bee ázhdílnééh, nidi Diyin God bá hojilneʼígíí éí daʼoodlání danilíinii áłah nádleehígíí biʼoodląʼ dabidziilgo ádajileʼ.
5 Áko tʼáá ánółtso álílee kʼehgo yátiʼ bee yádaałtiʼ dooleeł yę́ę nisin nidi, éí tʼah biláhídi átʼéego Diyin God bá dahołneʼjígo nihá nisin. Diyin God bá hojilneʼígíí éí álílee kʼehgo yátiʼ yee yáłtiʼígíí biláahdi ájítʼé, ákondi álílee kʼehgo yátiʼ yee yáłtiʼígíí bá ataʼ haneʼgo daʼoodlání áłah nádleehii yee dabidziilgo ádeiileʼ.
6 Shikʼisóó, álílee kʼehgo yátiʼ bee yáshtiʼgo nihaa níyáago, haʼátʼíísh bee nihíká adeeshwoł? Jó, Diyin God shił ííshją́ą́ áyiilaii tʼéí bee nihił hodeeshnihgo bee nihíká adeeshwoł ni, doodaiiʼ shił bééhózinígíí lá bee, doodaiiʼ Diyin God bá hashneʼgo, náádoodaiiʼ naʼnitin bee nihaa níyáago lá bee nihíká adeeshwoł ni.
7 Jó, tsin bee íʼdílzoołí, doodaiiʼ tsin tłʼóół bąąh daneelzheeʼgo bee nidaʼaʼnéii, azhą́ éí doo hináa da nidi diitsʼaʼ, áko doo ákwii diitsʼaʼgóó haa yitʼéegoshąʼ diitsʼaʼígíí bééhózin doo?
8 Siláo bidilnéhígíí doo bééhózingóó diitsʼaʼgo háishąʼ anaaʼ yiniyé hashtʼeʼádidoolnííł?
9 Nihí ałdóʼ tʼáá ákódanohtʼé; álílee kʼehgo yátiʼ bee yádaałtiʼgo, baa yádaałtiʼígíishąʼ haa yitʼéego bééhózin doo? Háálá éí ákótʼéego tʼóó dzólníígóó yádaałtiʼgo átʼé.
10 Nihokááʼ dineʼé dabizaad daashı̨́ı̨́ néelą́ą́ʼ tʼáá daʼníłʼąą átʼéego yee yádaałtiʼ, áko éí tʼáá ałtso tʼáá bí bizaad yikʼidadiʼyiitįįh.
11 Nidi saad bee yátiʼii doo shił bééhózin dago, yáłtiʼígíí bichʼįʼ náánáłaʼ dineʼé nishłı̨́į doo, áádóó yáłtiʼígíí shichʼįʼ náánáłaʼ dineʼé nilı̨́į doo.
12 Áko nihí Níłchʼi Diyinii aidiiʼaahii tʼáá íiyisí bídin danohłı̨́įgo daʼoodlání áłah nádleehii bidziilgo ádeidoolíłígíí yéego bidadoołkaal.
13 Éí bąą álílee kʼehgo yátiʼ yee yáłtiʼígíí ataʼ haneʼgi yíneelʼą́ą dooleełgo ádá sodilzin doo.
14 Háálá álílee kʼehgo yátiʼ bee sodiszingo shiiʼ sizíinii tʼéí bee sodiszin, shintsíkees éí doo bee sodiszin da.
15 Ákoshąʼ haa deeshnííł? Jó, shiiʼ sizíinii bee sodiszin doo, shintsíkees ałdóʼ bee sodiszin doo; shiiʼ sizíinii bee hashtaał doo, shintsíkees ałdóʼ bee hashtaał doo.
16 Niiʼ sizíinii tʼéiyá bee Diyin God baa hóniihgo diné tʼáá azlı̨́ʼígíí ááhdiníinii doo bił bééhózingóó éí, Tʼáá ákótʼée leʼ, doo didooniił da.
17 Jó, baa ahééh nínízingo yáʼátʼéehgo sodílzin nidi éí dinéhígíí doo bee bidziilgo ábiʼdilnéeh da.
18 Tʼáá ánółtso nihiláahdi álílee kʼehgo yátiʼ Níłchʼi Diyinii yee yáshiiłtiʼgo bąą Diyin God bichʼįʼ baa ahééh nisin,
19 ákondi daʼoodlání áłah nádleehgi saad tʼáá ashdlaʼí bee akʼidiʼdootı̨́įłii bee yáshtiʼgo, łaʼ diné nidínéeshtįįłjí shił aghá, álílee kʼehgo yátiʼ bee saad neeznáadi mííl bee yáshtiʼjí éí shił aʼoh.
20 Shikʼisóó, tʼáadoo áłchínígi átʼéego nitsídaahkeesí; jó, awéeʼgi átʼéego doo ákǫ́ǫ́ ádaatʼéii doo baa ákodanohsin da, nidi hóyáanii kʼehgo nitsídaahkees.
21 Diyin God bibee hazʼáanii bee akʼeʼashchı̨́įgo kóní:
Bóhólníihii ání, Náánáłaʼ dineʼé dabizaad beedíí dineʼé bichʼįʼ hadeesdzih.Ákondi doo dashíistsʼą́ąʼ da doo.
22 Áko álílee kʼehgo yátiʼ éí doo daʼoodlánígíí bichʼįʼ Diyin God bibee adziilii bee ééhózinii átʼé, tʼáá íídą́ą́ʼ daʼoosdląądígíí bichʼįʼ éí dooda, nidi Diyin God bá haneʼii éí doo daʼoodlání doo bá bee ééhózinii átʼée da, daʼoodlánígíí éí bá átʼé.
23 Éí bąą daʼiinohdlánígíí tʼáá ánółtso áłah soolı̨́įʼgi tʼáá ánółtso álílee kʼehgo yátiʼ bee yádaałtiʼgo, nítʼééʼ diné doo akʼiʼdiitįįhii, doodaiiʼ doo daʼoodlánígíí yah ahikáahgo, Tʼóó dadiigis lá, daatsʼí danihididooniił.
24 Nidi tʼáá ánółtso Diyin God bá dahołneʼgo, nítʼééʼ łaʼ doo oodlánígíí, doodaiiʼ doo akʼiʼdiitįįhii yah ííyáago, éí Diyin God bá dahołneʼígíí tʼáá ałtso binahjįʼ bí ádił niʼiilzíihgo ádaa ákodínóodzįįł, índa bí baa hwiinítʼı̨́įgo yąąh tsídookosgo
25 bijéí yiiʼ neiniłʼinii bééhodoozįįł, áko tséʼyaa dínóoljołgo Diyin God yichʼįʼ sodidoolzįįł, áádóó ádidooniił, Tʼáá aaníí Diyin God nihitahgóó hólǫ́ǫ́ lá!
Daʼoodlání áłah nádleehgi tʼáá ádzíłtso hashtʼezhdítʼée doo
26 Ákoshąʼ haitʼée doo, shikʼisóó? Jó, áłah nídaahdleehgóó, nihí łaʼ sin bee dahohtaał doo, łaʼ nidaʼnohtin doo, łaʼ éí nihił ííshją́ą́ ályaii baa dahołneʼ doo, łaʼ álílee kʼehgo yátiʼ yee yádaałtiʼ doo, náánáłaʼ éí ataʼ dahołneʼ doo. Kótʼéego nidahohłáhígíí bee nihidziilgo dahohkah doo.
27 Álílee kʼehgo yátiʼ yee yádaałtiʼgo bíniʼdii nidiltʼéegoda, doodaiiʼ táltʼéegoda ákódaatʼı̨́į doo, biláahgo éí dooda, tʼááłáʼí nítínígo bikʼeh hoolzhishgo yádaałtiʼ doo, áádóó bíniʼdii łaʼda bá ataʼ halneʼ doo.
28 Nidi há ataʼ halneʼii ádingo éí daʼoodlání áłah nádleehgi tʼáadoo yájíłtiʼí doo, nidi tʼáá hayiʼídi yájíłtiʼgo Diyin God bichʼįʼ yájíłtiʼ doo.
29 Bíniʼdii Diyin God yá dahalneʼii nidiltʼéegoda, táltʼéegoda hadahadziih doo, áko łaʼígíí bíniʼdii tʼóó yaa nitsídaakeesgo nideiłkaah doo.
30 Nidi náánáłaʼ oodlání nihitah sidáago, nítʼééʼ tʼáá aaníinii łaʼ bił ííshją́ą́ silı̨́įʼgo, bíniʼdii áłtsé yájíłtiʼii tʼóó jididoołhiłgo, oodlání hatah sidáii bazhdiʼdooʼáałgo bíniʼdii hadoodzih.
31 Áko tʼáá ánółtso tʼááłáʼí nootínígo Diyin God bá dahołneʼ doo, áko tʼáá ałtso bił éédahodoozįįł, áádóó tʼáá ałtso chánah dadooleeł.
32 Diyin God bá hojilneʼii tʼáá hó hadziidziihígíí bee ádaa áhojilyą́ągo hadziidziih doo.
33 Háálá Diyin God éí hahóóʼá doo bił yáʼátʼéeh da, nidi Diyin God bidiyı̨́ı̨́ʼ tʼáá ałtsogóó áłah nídaadleehígi átʼéego hashtʼediniitʼéego bił yáʼátʼééh.
34 Daʼoodlání áłah nídaadleehgi sáanii tʼáadoo yádajiłtiʼí dooleeł, háálá yádajiłtiʼígíí doo bee há hazʼą́ą da, nidi tʼáá bee hazʼáanii Mózes baa deetʼáanii ánínígi átʼéego tʼóó akʼeh hojíłʼı̨́į doo.
35 Tʼáá haʼátʼíhída nihił béédahodoozįįł daznízingo hániʼdii tʼáá dahaghandi hadahastiin éí bíndabízhdíłkid doo. Háálá daʼoodlání áłah nádleehgi asdzání yájíłtiʼgo baa yáhásin.
36 Daʼ Diyin God bizaadísh nihitsʼą́ą́dóó háátʼiʼ? Daʼ tʼáásh nihí tʼéí nihaa nítʼiʼ? Dooda lą́ą!
37 Diné łaʼda Diyin God yá halneʼii nishłı̨́ nízingo, éí doodago Níłchʼi Diyinii aidiiʼaahii shaa deetʼą́ nízingo éí bíniʼdii nihichʼįʼ bee akʼeʼashchíhígíí tʼáá aaníí Bóhólníihii yee hasʼáanii átʼéego yaa ákonízin doo.
38 Nidi diné łaʼda díí bee akʼeʼashchíhígíí doo yaa ákonízin dago, éí bíniʼdii doo haa ákohwiindzin da doo.
39 Éí bąą, shikʼisóó, Diyin God bá dahołneʼ doogo tʼáá íiyisí bídin danohłı̨́į leʼ, áádóó álílee kʼehgo yátiʼ tʼáadoo ahąąh daahtʼíní.
40 Bíniʼdii tʼáá ałtsoní yáʼátʼéehgo índa hashtʼehodítʼéego baa naʼaldeeh leʼ.
