Revelation 5:1-14
5 Bikááʼdóó nahatʼáii bikááʼdóó dah sidáii nishʼnáájí bílákʼeegi naaltsoos yisdisii yiiłtsą́. Éí biyiʼdę́ę́ʼ áádóó bikááʼdę́ę́ʼ bikʼeʼashchı̨́įgo, bee ídaʼdiiljeehí tsostsʼid bee bidádaʼdeeshjééʼ.
2 Áádóó diyingo naalʼaʼí ayóó ábóodziilii yiiłtsą́. Éí ayóó íitsʼaʼgo ání, Háíyeeʼ díí naaltsoos bee bidádaʼdeeshjéeʼii ąą deididoozǫ́ǫsgo ąą íidoolíiłgo yą́ą́h nilı̨́?
3 Nítʼééʼ yáʼąąshdi, doodaiiʼ nahasdzáán bikáaʼgi, doodaiiʼ nahasdzáán biyiʼdi, łaʼda naaltsoos ąą ázhdoolíiłgo biyiʼ góneʼ jidídóoʼįįłgo doo bízhneelʼání da lá.
4 Áko tʼáá íiyisí yícha, háálá łaʼda naaltsoos ąą ázhdoolíiłgo [yízhdóołtah, éí doodago] biyiʼ góneʼ jidídóoʼįįłgo tsʼídá doo bą́ą́h jílíní da lá.
5 Nítʼééʼ hastóí łaʼ áshidííniid, Tʼáadoo nichaí; jóʼakon, Náshdóítsoh Bitsiijįʼ Ditłʼooígíí Júdah bidineʼé bitsʼą́ą́dóó nilíinii, tʼáá éí David Bihétłʼóól nilíinii* akʼeh deesdlı̨́ʼígíí, éí naaltsoos áádóó bee ídaʼdiiljeehí tsostsʼid bee bidádaʼdeeshjéeʼii ąą íidoolíiłgo yíneelʼą́.
6 Bikááʼdóó nahatʼáii áádóó haʼátʼíí shı̨́ı̨́ dahináanii dı̨́ʼígíí índa hastóí danilíinii bitahgi, Dibé Yázhí nilíinii seesyı̨́ı̨́ nítʼééʼ nahalingo sizı̨́įgo yiiłtsą́, éí bideeʼ tsostsʼid, binááʼ ałdóʼ tsostsʼid, anááʼ tsostsʼidígíí éí Diyin God biNíłchʼi tsostsʼidgoígíí nahasdzáán bikááʼgóó tʼáá níłtéél nítʼééʼ tadabiʼdoosʼaʼígíí ádaatʼé.
7 Dibé Yázhí nilíinii éí bikááʼdóó nahatʼáii bikááʼdóó dah sidáii yichʼįʼ dah diiyáago nishʼnáájígo bílákʼeedóó naaltsoos néidiiʼą́.
8 Naaltsoos néidiiʼą́ągo, haʼátʼíí shı̨́ı̨́ dahináanii dı̨́ʼígíí índa naadiin dı̨́ı̨́ʼ hastóí tʼááłáʼí nítínígo tsin tłʼóół bąąh daneelzheeʼgo bee nidaʼaʼnéii dah dayítįįh, índa óola łeetsʼaaʼ biyiʼdóó tsin bijeeh dilidgo łikání halchinígíí biiʼ hadadeezbingo dah dayíkaah, éí Diyin God bidiyı̨́ı̨́ʼ bisodizin ádaatʼéego, éí yił Dibé Yázhí nilíinii bidáahjįʼ tséʼyaa daneeshjool.
9 Kódaaníigo sin ániidíii yee dahóótáál:
Naaltsoos nídidííʼáałgo bee ídaʼdiiljeehí bee bidádaʼdeeshjéeʼiiąą ádadíílíiłgo bą́ą́h nílı̨́,háálá niʼdiisyı̨́ı̨́ nítʼéeʼgo ałʼąą dineʼé áádóó bizaad ałʼąą ádaatʼéii áádóó nihokááʼ dineʼé danilíinii índa ałʼąą dineʼé bił dah nidahazʼáaniitʼáá átʼéé nítʼééʼ bitahdę́ę́ʼ Diyin God bá nidił bee diné bikʼé nináʼíínídlá.
10 Índa nihiDiyin God yá aláahgo naatʼáanii danilı̨́įgoáádóó Diyin God yá náádaʼiiłniihii danilı̨́įgo íinilaa,áko nahasdzáán bikáaʼgi bídahólníihgo nidantʼáa doo.
11 Áko dééʼı̨́įʼgo bikááʼdóó nahatʼáii áádóó haʼátʼíí shı̨́ı̨́ dahináanii índa hastóí danilíinii binaadę́ę́ʼ tʼóó ahayóí diyingo nidaalʼaʼí, tʼáadoo bee néelą́ʼígóó míildi míilgo
12 dabiinééʼ ayóó íitsʼaʼgo disétsʼą́ą́ʼ, kódaaníigo,
Dibé Yázhí seesyı̨́ nilíinii éí óhólnííh, atʼı̨́, hódzą́, adziil, ił ídlı̨́, ayóó éʼétʼé índa aa haʼniih bee hodooleełgo yą́ą́h nilı̨́!
13 Nítʼééʼ yáʼąąshdi áádóó nahasdzáán bikáaʼgi áádóó nahasdzáán biyiʼdi índa táyiʼdi nidaaldeehii, áádóó biyiʼdi dahólóonii tʼáá ałtso kódaaníigo disétsʼą́ą́ʼ,
Bikááʼdóó nahatʼáii bikááʼdóó dah sidáii índa Dibé Yázhí nilíinii éí aa haʼniih, ił ídlı̨́, ayóó éʼétʼé índa adziil hoolʼáágóó ahóyéelʼáágóó bííʼ dooleeł!
14 Áádóó haʼátʼíí shı̨́ı̨́ dahináanii dı̨́ʼígíí, Tʼáá ákótʼée doo! dadííniid, índa naadiin dı̨́ı̨́ʼ hastóí danilíinii tséʼyaa daneeshjoolgo hoolʼáágóó ahóyéelʼáágóó hináanii yichʼįʼ nidahasá.
Footnotes
^ Christ ááhyiłní. Is. 11:1,10.
