Revelation 21:1-27
21 Nítʼééʼ yádiłhił ániidíii índa nahasdzáán ániidíii yiiłtsą́. Yádiłhił áłtséhígíí índa nahasdzáán áłtséhígíí bił yóóʼahóóyá, áádóó tónteel ałdóʼ ádin.
2 Áko yáʼąąshdę́ę́ʼ Diyin God bitsʼą́ą́dóó diyingo kin haalʼáii, Jerúsalem ániidíii, báʼiigehii bahastiin yibaʼ hashtʼeʼádiilyaagi átʼéego hashtʼeʼádiilyaago hadahooleełgo yiiłtsą́.
3 Áko bikááʼdóó nahatʼáii bitsʼą́ą́dóó ayóó íitsʼaʼgo iinééʼ kóníigo disétsʼą́ą́ʼ, Jóʼakon, Diyin God yiiʼ kééhatʼíinii diné bił hólǫ́. Éí bił kééhojitʼı̨́į doo, áádóó bidineʼé dajílı̨́į doo. Diyin God tʼáá bí hoł hólǫ́ǫ doo, índa haDiyin God nilı̨́į doo.
4 Dabinákʼeeshtoʼ tʼáá ałtso yá yidootʼoł, aniné ádin doo, áádóó atínáhodinidleeh ádin doo, áádóó cha ádin doo índa adiniih ádin doo, háálá áłtséédą́ą́ʼ dahólóonii bił yóóʼahóóyá.
5 Bikááʼdóó nahatʼáii yikááʼdóó dah sidáii ání, Jóʼakon, tʼáá ałtsoní ániidígo ánáshdlééh! Áádóó ałdóʼ ánáádíʼní, Díí bee akʼeʼíłchí, háálá díí saad tʼáá aaníinii áádóó badaʼahódlíii ádaatʼé.
6 Áádóó áshidííniid, Kʼad lą́ą ałtso ádzaa! Álfa áádóó Oméga, bee hodeeztʼiʼii índa bee nihonítʼiʼii shí éí nishłı̨́. Dibááʼ jílíinii iiná tó háálı̨́ı̨́dóó tʼáá jííkʼe tó haa deeshkááł.
7 Tʼáá akʼesdeesdlı̨́ʼígíí díí hóóʼ dooleeł: haDiyin God nishłı̨́į doo, índa hó shiyeʼ jílı̨́į doo.
8 Nidi ninádanihinilyéesii, doo daʼoodlání, doo daaldinígi ádaatʼíinii, diné nideiłtseedii, ałjiłnii, bindaʼadloʼgo álílee kʼehgo nidahałáii, eʼelyaii yichʼįʼ nidahałáii índa dabiyoochʼíidii tʼáá ałtso éí kǫʼ tsékǫʼ bił beʼekʼid dookʼą́ąłii biyiʼ góneʼ bá nahazʼą́, áko éidíígíí naakidi náʼníʼné átʼé.
Jerúsalem ániidíii
9 Nítʼééʼ diyingo nidaalʼaʼí tsostsʼidgo, bee achʼįʼ nidahwiiłnáanii tsostsʼidgo akéeʼdiígíí łeetsʼaaʼ tsostsʼid hadadeezbingo dah dayíkaahii łaʼ shaa níyáago kóníigo shichʼįʼ haadzííʼ, Tįʼ, báʼásgehii, Dibé Yázhí nilíinii beʼasdzą́ą́ dínííłʼįįł.
10 Áádóó Níłchʼi Diyinii shił hólǫ́ǫgo dził ayóó áníłtso léiʼ bighą́ąʼjįʼ hasistı̨́įgo, yáʼąąshdę́ę́ʼ Diyin God bitsʼą́ą́dóó Jerúsalem diyingo kin haalʼáii hadah hooleełgo shichʼįʼ yitʼíní áyiilaa.
11 Éí Diyin God bee bitsʼádiʼnílíidii bee bitsʼádiʼnílíidgo, bitsʼádiʼnílídígíí tsé ílíinii bikʼi nizdidlaadígíigi átʼé, jásper wolyéhígíí nahalingo, tséghádiʼnídíniigi átʼéego niłtólí.
12 Ayóo daʼátʼé áádóó wódahgo ditą́ągo binaa ahééʼítłʼin, naakitsʼáadahgóó chʼéʼétiin, áko naakitsʼáadahgóó chʼéʼétiinígíí diyingo naalʼaʼí yikʼeh nízı̨́, éí naakitsʼáadahgo chʼéʼétiin bikáaʼgi Ízrel baʼáłchíní naakitsʼáadahgo dineʼé danilíinii dabízhiʼ tʼáá daʼníłʼąą bee bikʼidaʼashchı̨́.
13 Haʼaʼaahdę́ęʼgo táaʼgo chʼéʼétiin, náhookǫsdę́ęʼgo ałdóʼ táaʼgo chʼéʼétiin, shádiʼááhdę́ęʼgo ałdóʼ táaʼgo chʼéʼétiin, eʼeʼaahdę́ęʼgo ałdóʼ táaʼgo chʼéʼétiin.
14 Áádóó kin haalʼá ditą́ągo binaa ahééʼítłʼinii bee hadaastłʼinii naakitsʼáadah lá, áko éí bikáaʼgi Dibé Yázhí nilíinii bá daalʼaadii naakitsʼáadahgoígíí dabízhiʼ tʼáá daʼníłʼąą bee bikʼidaʼashchı̨́.
15 Áádóó shichʼįʼ yájíłtiʼii óola bee ídaʼneelʼąąhí éí kin haalʼáhígíí áádóó chʼídaʼiiztiingóó índa ditą́ągo binaa ahééʼítłʼinígíí bee bídazhdíʼnóołʼąąłgo dah jootı̨́ı̨́ł.
16 Kin haalʼáhígíí tʼáá dı̨́ı̨́ʼgóó dikʼą́, náásee áádóó naaniigo tʼáá aheeníłtso. Habeeʼídaʼneelʼąąhí bee kin haalʼáhígíí bízhʼnééłʼąądgo ashdlaʼáadahdi neeznádiin tsin sitą́ą́ lá; náásee, naaniigo áádóó dego éí tʼáá aheedaníłtso.
17 Ahééʼítłʼinígíí ałdóʼ bízhʼnééłʼąąd, nítʼééʼ achʼoozhlaaʼdóó álaʼ bílátahjįʼ áníłtsoígíí éí tʼááłáhídi neeznádiindóó baʼaan dízdiindóó baʼaan dı̨́įdi ahą́ą́h díʼá áníłtso lá, éí diné kʼehgo íʼneelʼąąhígíí kʼehgo, tʼáá éí diyingo naalʼaʼí kʼehgo íʼneelʼąąh átʼé.
18 Ahééʼítłʼinii jásper bee ályaa, kin haalʼáhígíí éí tsésǫʼ bigházdiníłtólígíí nahalingo óola tʼáá bízhání bee ályaa.
19 Kin haalʼá ditą́ągo binaa ahééʼítłʼinígíí bee hadaastłʼinii nitłʼiz ałtaasʼéí tʼáá ałʼąą ádaatʼéii bee nidaashchʼąąʼ, áłtséhígíí jásper, naakiígíí sáfair, táʼígíí kalsédonii, dı̨́ʼígíí émerald,
20 ashdlaʼígíí sardániks, hastánígíí sárdiyas, tsostsʼidígíí krísolait, tseebíígíí béril, náhástʼéígíí tópaz, neeznánígíí krísopreiz, łaʼtsʼáadahígíí jéísinth, naakitsʼáadahígíí ámethist.
21 Naakitsʼáadahgo chʼéʼétiinígíí éí diichiłí bee ádaalyaa, chʼídaʼiiztiinígíí tʼáá átʼé diichiłí bee ádaalyaa. Kintahgóó hahodiitʼiʼígíí éí tsésǫʼ bigházdiníłtólígíí nahalingo óola tʼáá bízhání bee ályaa.
22 Kin haalʼáhígi kin biiʼ sohodizin doo łaʼ yiiłtsą́ą da, háálá Bóhólníihii Diyin God Aláahgo Ayóóʼábóodziilii índa Dibé Yázhí nilíinii éí ákwii tʼáá bí kin biiʼ sohodizin nilı̨́.
23 Éí kin haalʼáadi jı̨́honaaʼéí, doodaiiʼ tłʼéhonaaʼéí ádin, háálá Diyin God bee bitsʼádiʼnílíidii bee adinídíín, áádóó Dibé Yázhí nilíinii bee adinídíinii nilı̨́.
24 Ałʼąą dineʼé bił dah nidahazʼáanii adinídíinii yiiʼ dayíkáah doo, áádóó nahasdzáán bikááʼdóó aláahgo naatʼáanii danilíinii yee ayóó ádaatʼéii yił, yah adahakáah dooleeł.
25 Áadi aańdaditı̨́ı̨́hgóó tsʼídá doo dádadiʼdoolkał da, háálá áadi tłʼééʼ ádin doo.
26 Ałʼąą dineʼé bił dah nidahazʼáanii yee ayóó ádaatʼéii índa yee ił danilíinii yił yah adahakáah dooleeł.
27 Nidi haʼátʼíida tʼóó baaʼihii tsʼídá doo biih hodooleeł da, índa doo yildingóó naagháii áádóó biyoochʼíidii tsʼídá doo yiih doogáał da, nidi iiná naaltsoos* Dibé Yázhí nilíinii bíhígíí biyiʼ dabízhiʼ bikʼidaasdzohii tʼéiyá yiih dookah.
Footnotes
^ Iináájí naaltsoos yiłnínígíí éí Diyin God tʼáá ałtso baʼáłchíní dabízhiʼ bikʼidaasdzohgo yisʼą́.
