Revelation 11:1-19
11 Nítʼééʼ bee ídaʼneelʼąąhí gish nahalin léiʼ shaa yítą́ągo áshiʼdooʼniid, Nídiidáahgo Diyin God bikin biiʼ sohodizin áádóó bikááʼ nááʼiiniihí índa diné ákóneʼ nidahałáhígíí bídaʼneełʼąąh.
2 Nidi kin biiʼ sohodizin binaagi hazʼánígíí doo bídíʼnííłʼąął da. Éí tʼáadoo baa nánítʼíní, háálá ałʼąą dineʼé bił dah nidahazʼáanii baa deetʼą́, áko diyingo kin haalʼáii* yikʼi naaldeehgo dízdiindóó baʼaan naaki nídidooził.
3 Ooʼíinii kʼehgo shá halneʼii nidiltʼéego tʼááłáhídi mííldóó baʼaan naakidi neeznádiindóó baʼaan hastą́diin yiską́ąjįʼ, aghaashzhiin yistłʼǫ́ǫgo yee hadítʼéego Diyin God yá halneʼ doogo bee adziilii baa dideeshʼááł.
4 Diyin God éí nahasdzáán yee Bóhólníihii bidááhdóó díí áliv naaki sikaadgo ííʼáhígíí áádóó naakigo bee hoolʼiní bá yadaaʼáhígíí ooʼíinii átʼé.
5 Diné łaʼda atíhodeeshłííł hóʼníigo, hazééʼdóó kǫʼ hazdoosihgo hweʼanaʼí danilíinii bee ázhdoołdįįł; łaʼda atíhodeeshłííł hóʼníigo tʼáá ákótʼéego nabidiʼdootsił.
6 Ádahodooníiłii yaa halneʼgo yoołkááł góneʼ doo nahałtingóó íidoolííł biniyé yá yidádiʼdoołkałgo bee óhólníihii bee hólǫ́, áádóó tó dił íidoolíiłgo, índa tʼáá ánéiniidzįįh bikʼeh bee achʼįʼ nidahwiilnáanii tʼáá ałtso nahasdzáán bikáaʼgi ánáyoodlíiłgo bee óhólníihii bee hólǫ́.
7 Áko ałtso nahasneʼgo, aʼáán doo nihoodzą́ą́dę́ę́ʼ* naaldlooshii naayééʼ nilíinii haayáii hakʼijįʼ anaaʼ áhodoolíiłgo hakʼeh didoodleełgo nahodoołtsił,
8 áko ayóó átʼéego kin haalʼáii,* Sádam áádóó Íijip tʼóó bikʼijįʼ siʼą́ągo bee wójíii, bitaaʼaztiingi, nihiBóhólníihii tsin ałnáoszid bikáaʼjįʼ bił oʼoolkaal yę́ęgi bitsʼíís shitéezh doo.
9 Tágí jı̨́ azlı̨́ı̨́ʼdóó ałníʼníʼą́ąjįʼ nihokááʼ dineʼé danilíinii áádóó ałʼąą dineʼé áádóó bizaad ałʼąą ádaatʼéii índa ałʼąą dineʼé bił dah nidahazʼáanii dabitahdę́ę́ʼ bitsʼíís deiníłʼı̨́įgo, yóóʼádoolníiłgi dooda, daaníi doo.
10 Díí Diyin God yá halneʼii nidiltʼéego nahasdzáán bikááʼgóó kéédahatʼíinii atííłʼı̨́ı̨́ nítʼéʼígíí biniinaa nahasdzáán bikááʼgóó kéédahatʼíinii jineeznánígíí bąą bił dahózhǫ́ǫ doo, honeeni yaa naakai doo, índa ahidiníłnáago tʼáadoo leʼé ahaa dayiiʼníił doo.
11 Nidi tágí jı̨́ azlı̨́ı̨́ʼdóó ałníʼníʼą́ągo Diyin God bitsʼą́ą́dę́ę́ʼ ayol bee iiná biih hóóleʼgo, nídiitʼáazhgo yiizįʼ, áko dabiiłtsánígíí ayóó átʼéego bikʼee bił dahóóyééʼ.
12 Nítʼééʼ yáʼąąshdę́ę́ʼ iinééʼ ayóó íitsʼaʼgo kóbíłníigo yidiiztsʼą́ą́ʼ, Wóshdę́ę́ʼ hashohʼaash! Áko bidaʼanaʼí dabinááł yáʼąąsh góde kʼos yee ííʼáázh.
13 Éí oolkiłígíí biyiʼ ayóó átʼéego niʼ nahaasnáaʼgo kin haalʼáii neeznáágóó ałtsʼáádzooígíí tʼááłáhígo haadzo naaʼííłdááz, índa niʼ nahaasnáaʼgo tsostsʼidi mííl diné yiyííghą́ą́ʼ, łahjįʼígíí éí nídaasdzíidgo yáʼąąshdi Diyin God nilíinii yaa dahaznih.
14 Naaki góneʼ yééʼ silı̨́įʼii bibanááhodooshzhiizh; jóʼakon, tááʼ góneʼ yééʼ náádoodleełii kʼadę́ę baa nááhoolzhíísh!
Dilní tsostsʼid góneʼígíí
15 Ákohgo diyingo naalʼaʼí tsostsʼid góneʼígíí bidilní yee ádííniidgo, yáʼąąshdi ayóó átʼéego iinééʼ dadiistsʼą́ąʼgo kódadííniid,
Nihokááʼ bee óhólníihgo bił hazʼáanii éí nihiBóhólníihii índa biChrist bee bóhólníihgo bił hazʼáanii silı̨́ı̨́ʼ, éí hoolʼáágóó ahóyéelʼáágóó yinantʼáa doo.
16 Áko naadiin dı̨́ı̨́ʼ hastóí danilíinii bibikááʼdóó nidahatʼáii bikááʼdóó Diyin God yidáahjįʼ dah nidaháaztánígíí tséʼyaa daneeshjoolgo Diyin God yichʼįʼ nidahasá,
17 kódaaníigo:
Bóhólníihii Diyin God Aláahgo Ayóóʼánóodziilii honílóonii áádóó hodeeyáádę́ę́ʼ honílóonii [índa díínáałii],nichʼįʼ ahééh daniidzin,háálá nidziil ayóó átʼéii nídiniláago naatʼáanii nílı̨́įgo chʼíhwíínísá.
18 Ałʼąą dineʼé bił dah nidahazʼáanii bádahazhchįįd.Áádóó tʼóó báhádzidgo bee atíʼéłʼíinii baa hoolzhiizh,daneeznáanii baa nídahódóotʼįįł,ná nidaalʼaʼii, Diyin God yá dahalneʼiiáádóó Diyin God bidiyı̨́ı̨́ʼ áádóó nízhiʼ deidísinii, éí aʼohgo ádaatʼéiiínda ayóó ádaatʼéii, bichʼįʼ nidadiʼyoolyééł, índa nahasdzáán nidayiiłchxǫǫhii ádooldįįłii baa hoolzhiizh.
19 Áádóó yáʼąąshdi Diyin God bikin biiʼ sohodizin ąą ádzaago, biyiʼdi tsitsʼaaʼ dílzinii bibee ahaʼdeetʼáanii biiʼ sinilii yitʼíní silı̨́ı̨́ʼ. Áádóó atsiniltłʼish anídahataʼ áádóó ayóó íitsʼaʼgo dahodiistsʼą́ą́ʼ, áádóó daʼdiʼní, áádóó niʼ nidahaʼná, índa nílótsoh nááłtą́.
Footnotes
^ Éí Jerúsalem ááhyiłní.
^ Ayóó átʼéego ánihwiitʼaah beiníłką́ąjíʼ níłchʼi bidaʼiiníziinii éí nahasdzáán biníiʼdi doo nihodzą́ą́ góneʼ biniyé awáalyaaí danilı̨́įgo shijéeʼgo dajoodlą́ą́ nítʼééʼ.
^ Jerúsalem ááhyiłní.
