Revelation 1:1-20
1 Tʼóó hodíínááʼígo ádahodooníiłii Jesus Christ bá nidaalʼaʼí yichʼįʼ íidoolííł biniyé Diyin God bił yitʼíní áyiilaa, áádóó John éí Christ bá naalʼaʼí jílíinii hachʼįʼ bidiyingo naalʼaʼí yiníłʼaʼgo hoł yitʼíní áyiilaa.
2 Éí John tʼáá bí yiyiiłtsáanii tʼáá ałtso áádóó Diyin God bizaad índa Jesus Christ baa haneʼii yaa hoolneʼ.
3 Díí ádahodooníiłii baa haneʼgo yółtaʼígíí bikʼihojidlí, índa éí saad deidiitsʼaʼígíí bikʼidahojidlí, áádóó díí biyiʼ bee akʼedaʼashchíinii yikʼeh dahółʼíinii ałdóʼ bikʼidahojidlí, háálá koshídę́ę́ʼ hoolzhish.
Tsostsʼidgo daʼoodlání áłah nídaadleehii kʼé biʼdooʼniid
4 Shí John, Éízha kéyah* biyiʼdi tsostsʼidgo daʼoodlání áłah nídaadleehii bichʼįʼ naaltsoos áshłééh:
Diyin God éí hojílóonii, éí tʼáá áłahjįʼ hojílónígíí, tʼáá éí jidoogáałii, áádóó Níłchʼi tsostsʼidgo habikááʼdóó nahatʼáii yidááhdóó naazíinii, éí habee ajoobaʼ índa habee achʼįʼ hózhǫ́ náhásdlı̨́įʼii bee nihikʼihojidlíi leʼ,
5 índa Jesus Christ, baʼahódlíii ooʼíinii kʼehgo halneʼii, aninéédę́ę́ʼ áłtsé hinááh násdlı̨́įʼii, niʼ bikáaʼgi aláahgo naatʼáanii danilíinii yinantʼáii, éí bibee ajoobaʼ índa bibee achʼįʼ hózhǫ́ náhásdlı̨́įʼii yee nihikʼijidlíi leʼ.
Ayóóʼánihijóʼníigo hadił bee nihibąąhági átʼéii nihąąh táádzízgiz,
6 índa haDiyin God tʼáá éí haTaaʼ bee bóhólníihii áádóó bá nááʼiiłniihii daniidlı̨́įgo ádanihijiilaa. Ayóó éʼétʼé índa óhólnííh hoolʼáágóó ahóyéelʼáágóó hóóʼ dooleeł! Tʼáá ákótʼée doo.
7 Jóʼakon, kʼos bił yildohgo doogááł, áko diné tʼáá ałtso dahwiidoołtsééł, tʼáá éí adaʼashiizhii dahwiidoołtsééł. Niʼ bikááʼgóó ałʼąą dineʼé tʼáá ałtso haniinaa ákʼidadiitʼaah doo. Tʼáá aaníí! Tʼáá ákótʼée doo.
8 Bóhólníihii Diyin God, hojílóonii, éí tʼáá áłahjįʼ hojílónígíí, tʼáá éí jidoogáałii, Aláahgo Ayóóʼáhóodziilii ájíní, Álfa áádóó Oméga, bee hodeeztʼiʼii índa bee nihonítʼiʼii shí éí nishłı̨́.
Diné Silı̨́įʼii ił ádzaa
9 Shí John, nihínaaí nishłíinii, Jesus bił łáʼí daniidlı̨́įgo tiʼhooʼnííh áádóó aláahgo bee bóhólníihgo bił hazʼáanii índa nízaadgóó haʼahóní nihił ałtsʼą́ą́ʼ daʼniskʼiiz. Diyin God bizaad baa hashneʼgo índa Jesus bá hashneʼgo biniinaa táyiʼdę́ę́ʼ kéyah hááʼáago Pátmos hoolyéedi nishiʼdeeltı̨́.
10 Bóhólníihii bihááʼáyı̨́ı̨́h jı̨́ı̨́ góneʼ Níłchʼi Diyinii nashiiłáá nítʼééʼ, shikéédę́ę́ʼ dilnígi átʼéego ayóó íitsʼaʼgo iinééʼ disétsʼą́ą́ʼ,
11 kóníigo, [Álfa áádóó Oméga, áłtséhígíí índa akéeʼdiígíí nishłı̨́. Áádóó,] Yíníʼínígíí naaltsoos bikááʼ áníléehgo Éfesasgi, Smírnagi, Pérgamasgi, Thaiyatáíragi, Sárdisgi, Filadélfiyagi, índa Leiyodisíyagi, éí tsostsʼidgo daʼoodlání áłah nídaadleehii bichʼįʼ ánílééh.
12 Áko shichʼįʼ yáłtiʼígíí yideestsééł nisingo náháyáá nítʼééʼ; bee hoolʼiní bá yadaaʼáhígíí óola bee ádaalyaa léiʼ tsostsʼidgo yiiłtsą́,
13 áádóó bee hoolʼiní bá yadaaʼáhígíí bitahgi łaʼ Diné Dzizlı̨́įʼii nahojílingo hoołtsą́, tʼáá hazhdiilʼéeʼgo óola sis hajéítsʼiin gónaa bináztʼiʼ.
14 Hatsiitsʼiin áádóó hatsiiʼ aghaałgaiigi átʼéego łigai, yasígi átʼéego łigai, áádóó hanááʼ kǫʼ dah nídínoʼígíí nahalin;
15 hakeeʼ éí déédíljah góneʼ béésh łitsoii nídoolyı̨́įʼgo ániidí ánályaago bízdílidígíí nahalin, áádóó tó tʼóó ahayóí hadah yiilı̨́ nahalingo hwiinééʼ diitsʼaʼ;
16 hálaʼ nishʼnáájí bee sǫʼ tsostsʼidgo dah joojih, áádóó diltłish tʼáá ałchʼishjigo deeníinii hazééʼdę́ę́ʼ hadzisih, índa jı̨́honaaʼéí bitsʼádiʼnílííd nahalingo haniiʼ yiiłtsą́.
17 Shí hoołtsą́ągo dadziztsą́ nahalingo hayaajįʼ íígoʼ. Nidi kóníigo bílaʼ nishʼnáájí yee shikʼi dah deesniiʼ, Tʼáadoo nił yéʼí, áłtséhígíí índa akéeʼdiígíí nishłı̨́.
18 Hináanii nishłı̨́; dasétsą́ą́ nítʼééʼ, nidi kʼad shoo, ahóyéelʼáágóó hinishná. [Tʼáá ákótʼée doo.] Anoonééł áádóó chʼı̨́įdiitah bibee ąą ńdítı̨́hí shee hólǫ́.
19 Yíníʼínígíí áádóó kʼad ádaatʼéii índa náásgóó ádahodooníiłii kʼad bee akʼeʼíłchí.
20 Nishʼnáájí shílákʼeegi sǫʼ tsostsʼid doo bééhózinii yiniłtsáanii áádóó bee hoolʼiní bá yadaaʼáhígíí óola bee ádaalyaii doo bééhózinii yiniłtsáanii díí óolyé: tsostsʼid sǫʼígíí éí tsostsʼidgo daʼoodlání áłah nídaadleehii bidiyingo nidaalʼaʼígíí ádaatʼé, índa tsostsʼidgo bee hoolʼiní bá yadaaʼáhígíí éí tsostsʼidgo daʼoodlání áłah nídaadleehii ádaatʼé.
Footnotes
^ Éízha kéyah Rome bee bóhólnííh nítʼééʼ. Kʼad éí kéyah Térkii łahdóó biyiʼ. 1Cor. 16:19.
