Psalm 9:1-20
Diyin God tʼáá ákogi áánííł baa ahééh hasin
9 Bóhólníihii nílíinii, shijéí tʼáá átʼé bee nichʼįʼ ahééh nisin doo; ninaanish bikʼedaʼayóígíí tʼáá ałtso bee naa hashneʼ doo.
2 Niniitʼaa shił hózhǫ́ áádóó tʼáá íiyisí shił hózhǫ́ǫ doo; Aláahgo Ayóóʼátʼéii nílíinii, nízhiʼ baa hashniihgo hashtaał doo.
3 Shiʼanaʼí danilíinii tʼą́ą́ʼ anáájéeʼgo nidáahjįʼ naaʼííłdáazgo daneezná.
4 Háálá bee shá hazʼáanii áádóó biniyé áshtʼíinii baa áhólyą́ą́ nítʼééʼ; bikááʼdóó nahatʼáii bikááʼ dóó dah sínídáago tʼáá ákogi átʼéego aa nánítʼı̨́.
5 Ałʼąą dineʼé dadííníteh; doo yáʼádaashóonii ádasíníłdįįd; dabízhiʼ kʼéédaʼshíníłchxǫʼgo hoolʼáágóó ahóyéelʼáágóó baa dahoyoosʼnah.
6 Anaʼí hoolʼáágóó ádaasdįįd; éíyeeʼ bikin hadaasʼáii naaʼahííníłtłʼíidgo bee bééhániih dooleeł yę́ę tʼáá yił ádaasdįįd.
7 Nidi Bóhólníihii hoolʼáágóó hólǫ́ǫ doo; bibikááʼdóó nahatʼáii bikááʼdóó ánihwiiʼaah dooleeł biniyé niiníʼą́;
8 tʼáá ákogi átʼéego nihokááʼ dineʼé yaa nídóotʼįįł; ałʼąą dineʼé aheełtʼéego yaa nídóotʼįįł.
9 Bóhólníihii éí diné bide áńdahooʼníiłii bineʼ adahinichéehii yá nilı̨́; bichʼįʼ nidahwiiʼnáago bineʼ adahinichéehii yá nilı̨́.
10 Bóhólníihii nílíinii, nízhiʼ yéédahósinii éí naa dadzólíi doo, háálá há dandéezʼı̨́įʼii doo yóóʼadííníʼą́ą da.
11 Záíyandi Bóhólníihii kééhatʼíinii baa dahohniihgo bichʼįʼ dahohtaał! Dadineʼé bitahgóó ááníłígíí baa dahołneʼ!
12 Biʼdiisyíinii bidił yá kʼééhidiʼnéehii yénálniih; diné hojoobaʼ ádaaníigo doo yaa yoonéeh da.
13 Bóhólníihii nílíinii, shaa jiiníbaah! Anoonééł bichʼįʼ yah ahóótʼiʼdóó hááshííníłtíinii, shikʼee dadiniihgo shichʼįʼ nidahwiiłnáanii níníłʼı̨́,
14 áko Záíyan bichʼéʼé bił yah aʼatiingi bee naa haʼniihii tʼáá ałtso baa hashneʼ doo; nibee yisdáʼiildéehii baa shił hózhǫ́ǫ doo.
15 Ałʼąą dineʼé éí ahoodzą́ągo ádahoolaaí góyaa nahoditsʼǫʼ ííłdááz; tłʼóół bee ódleehí nídeideesʼı̨́įʼii tʼáá bí yiih nídahaaskai.
16 Bóhólníihii éí aa nátʼı̨́įgo ánihwiiʼaahígíí bee bééhoʼdílzingo íʼdiilyaa; diné doo yáʼádaashóonii tʼáá bí łoh ádayiilaii yiih hikááh. Higáíyan. Síilah.*
17 Diné doo yáʼádaashóonii áádóó ałʼąą dineʼé Diyin God yaa dayoonéehii tʼáá ałtso hoolʼáágóó tiʼhooʼnííhgóó yiʼiiłníih doo.
18 Jó, hojoobaʼ nahasʼáanii doo baa náhoyooʼnah da doo, áádóó diné bichʼįʼ nahoʼdiilnáanii bá chohooʼíinii doo hoolʼáágóó ádoodįįł da.
19 Bóhólníihii nílíinii, díldzííł! Diné tʼáadoo akʼeh dadidlíní doo; ałʼąą dineʼé tʼáá ni baa nánítʼı̨́!
20 Bóhólníihii nílíinii, éí bił yééʼ ádahóleʼ! Ałʼąą dineʼé danilíinii tʼóó diné tʼéí danilı̨́įgo bił béédahózingo ánílééh! Síilah.
Footnotes
^ Díí saad bikʼehgo éí Hííbrew dineʼé yee dahataał nítʼééʼ. Éí ááhyiłníinii doo hózhǫ́ bééhózin da.
