Psalm 73:1-28
Doo yáʼádaashóonii haa bidiʼdoolníłígíí
73 Tʼáá aaníí Diyin God éí Ízrel dineʼé dabijéí biiʼ baaʼihii ádaadinii yaa joobaʼ.
2 Nidi shí kʼasdą́ą́ʼ tʼáadoo leʼé biʼądiishtáál; kʼasdą́ą́ʼ ałtádiighaz.
3 Háálá diné doo yáʼádaashóonii náásgóó badaʼiideełgo yiiłtsą́ągo éí yee ádaa dahaʼniihgo wooshchʼı̨́ı̨́d nítʼééʼ.
4 Bitsʼíís doo bąąh daatééhgóó doo tiʼdahoonííhgóó daniné.
5 Náánáłaʼ diné bichʼįʼ nidahwiiʼnánígi átʼéego bí doo ákótʼéego bichʼįʼ nidahwiiʼnáa da; náánáłaʼ diné bide áńdahootʼįįhígi átʼéego bí doo ákótʼéego bide áńdahootʼįįh da.
6 Éí bąą ádaa haʼniih éí dabiyoʼ nahalin; tʼáá naʼníleʼdii iiná éí ééʼ nahalingo yee hadadítʼé.
7 Daneeskʼahgo biniinaa binááʼ hadaazʼá; dabijéí biyiʼdi deinízinígíí tʼáá biláahgo yíchą́deídéelniʼ.
8 Éí dááchxǫʼ; diné yide ádahodoolíiłgo ayóó ádaalzaadgo doo yáʼáshónígi átʼéego yaa yádaałtiʼ.
9 Yótʼááh hiníláii yikʼee dadiniihgo yádaałtiʼ; nahasdzáán yikááʼ tʼáá nidaakaigóó bitsooʼ doo ádahodiilzééhgóó yádaałtiʼ.
10 Éí bąą bidineʼé kojįʼ tʼą́ą́ʼ nákai áádóó tó tʼóó ahayóí tʼáá bilááh daneelʼą́ągo yitaizką́.
11 Áko diné doo yáʼádaashóonii ádaaní, Haash yitʼéego Diyin God bił bééhózin? Aláahgo Ayóóʼátʼéiísh bił ééhózin?
12 Shoo, díí diné doo Diyin God kʼehgo ádaatʼéii danilı̨́. Nahasdzáán bikááʼ badaʼiideełgo daʼítʼįįh.
13 Tʼáá aaníí tʼáadoo biniyéhígóó shijéí chin bąąh ádingo áshłaa índa tʼáadoo bee ádąąh dah hosistʼánígóó shílaʼ tánínásgis nítʼééʼ.
14 Háálá shá bíighah shide áhootʼéé nítʼééʼ áádóó tʼáá ákwíí abíní shichʼahoʼdishkéego nashidiʼnitin nítʼééʼ.
15 Kótʼéego hadeesdzih, dííniidgo, jó, naʼáłchíní náás ahoolchíiłii binisíloʼ doo nítʼééʼ.
16 Díí lá haash yitʼéego bikʼiʼdideeshtı̨́ı̨́ł lá nisingo tʼáá íiyisí bikʼee tiʼhwiiséniiʼ.
17 Nidi Diyin God bikin biiʼ sohodizin góneʼ yah ííyáago índa beʼiinaʼ nidahidootʼihígíí baa ákoniizı̨́ı̨́ʼ.
18 Tʼáá aaníí dahwíídéeltǫʼgóó dahináago íinilaa; íʼdooldįįłjįʼ ahíníłkaad.
19 Dooládóʼ tʼáadoo hooyání ábidiʼdooldįįł da lá! Bikʼedaʼíyéeʼii ałtso ádaboołdįįł lá!
20 Naʼiisdzeeldóó chʼéédzídzidígi átʼéego, Bóhólníihii nílíinii, díldzíiłgo anaʼí ádanóolninii dadííʼįįł.
21 Shijéí bíniʼ yiiʼaʼ yę́ędą́ą́ʼ; shintsíkees jishhishiigi ádzaago
22 tʼóó doo áháshyą́ą da nítʼééʼ áádóó tʼáadoo leʼé doo shił bééhózin da nítʼééʼ; ninááł naaldlooshii nahonishłin nítʼééʼ.
23 Azhą́ ákótʼée nidi, tʼáá áłahjįʼ nił honishłǫ́; shílaʼ nishʼnáájí yínítąʼ.
24 Ninahatʼaʼ bee shiyííłááł, áádóó bikʼijįʼ hózhǫ́ǫgo hazʼą́ąjįʼ shił yah anídíítʼash.
25 Háishąʼ shá yáʼąąshdi hólǫ́? Ni lá tʼéiyá ni. Áádóó nahasdzáán bikáaʼgi tʼáá ni tʼéiyá nídin nishłı̨́.
26 Shitsʼíís áádóó shijéí nanííłnaʼ, nidi Diyin God bee shijéí bidziilgo índa shííʼ nilı̨́įgo ahoolʼá.
27 Háálá nitsʼą́ądi nízaadi nidaaldeehii ádadoodįįł, jóʼakon; daʼałjiłgo nitsʼą́ądi naaldeehii tʼáá ałtso ááłdįįł.
28 Nidi tʼáá áhánídóó Diyin God bichʼįʼ niníyáago shá yáʼátʼééh; ninaanish tʼáá ałtso baa hashneʼ doo biniyé Bóhólníihii Diyin God bineʼ ahinishchéehii áshłaa.
