Psalm 47:1-9
Diyin God éí nahasdzáán tʼáá átʼé nítʼééʼ yinantʼá
47 Ałʼąą dineʼé danohłíinii tʼáá ánółtso, ahídaahkad; akʼeh hodidleehgo sin bee Diyin God bichʼįʼ yéego dahohtaał!
2 Háálá Bóhólníihii Aláahgo Ayóóʼátʼéii dílzin. Nahasdzáán tʼáá náhwiizʼą́ą́ nítʼééʼ bikááʼgóó Aláahgo Naatʼáanii Ayóóʼátʼéii nilı̨́.
3 Dadineʼé nihikʼeh dahółʼı̨́įgo nihídahółníihgo áyiilaa; ałʼąą dineʼé bił dah nahazʼáanii nihiyaa ayíínilgo bikʼi dadiilʼeez.
4 Bóhólníihii éí Jéíkab ayóóʼáyóʼníinii yee ádaa haʼniihii nihííʼ dooleełgo nihá niidiiʼaah. Síilah.
5 Deenástsʼaaʼ bideeʼ bee íʼdílzoołí diitsʼaʼgo diné biinééʼ nídididlaʼgo Bóhólníihii Diyin God dego ahóóleʼ.
6 Diyin God baa dahohniihgo bichʼįʼ dahohtaał. Baa dahohniihgo bichʼįʼ dahohtaał. Aláahgo nihinanitʼaʼí baa dahohniihgo bichʼįʼ dahohtaał. Baa dahohniihgo bichʼįʼ dahohtaał.
7 Háálá nahasdzáán tʼáá siʼą́ą́ nítʼééʼ bikááʼgóó Diyin God aláahgo naatʼáanii nilı̨́. Baa dahohniihgo sin ayóó ánóolninii bee bichʼįʼ dahohtaał!
8 Diyin God éí ałʼąą dineʼé yinantʼá; bidiyingo bikááʼdóó nahatʼáii yikááʼ dah sidá.
9 Diné yá aląąjįʼ naazíinii éí Éíbraham biDiyin God bidineʼé danilı̨́įgo áłah nádleeh. Nahasdzáán bikááʼdóó dadineʼé yichʼą́ą́h naazíinii éí Diyin God bííʼ danilı̨́; Diyin God ayóó átʼéii nilı̨́įgo ábiʼdiilyaa.
