Psalm 44:1-26
Yisdáʼooldeeʼ áádóó kʼad achʼįʼ nahwiiʼnáanii
44 Diyin God nílíinii, tʼáá nihí dasidiitsʼą́ą́ʼ, éí danihizhéʼé bídayéełkaah yę́ędą́ą́ʼ baa nisíníyáhígíí yee nihił dahoolneʼ.
2 Tʼáá ni ałʼąą dineʼé kéyah biiʼdóó hahinííníłkaad. Áko índa tsin kʼizhdííláhígíí nahalingo ákwii nihwíínínil. Ałʼąą dineʼé éí bichʼįʼ nidahoyíníłnááʼ índa nidineʼé kʼeeʼąą nootʼı̨́įłgo íinilaa.
3 Jó, tʼáá bí bidiltłish yee doo kéyah dayoosbą́ą da áádóó doo tʼáá bí bigaan yee yisdáákai da. Nidi nigaan nishʼnáájí áádóó tʼáá ni nidziilígíí índa niniiʼ bitsʼádiʼnílídígíí bee íínítʼįįd. Háálá bichʼoniníigo ánítʼı̨́.
4 Ni lą́ą, aláahgo shinanitʼaʼí nílı̨́, shiDiyin God nílíinii. Jéíkab dineʼé yisdádookah, diníigo bá hahídziih.
5 Ninahjįʼ nihiʼanaʼí niʼjįʼ naaʼadahoyiiʼnííł. Anaaʼ danihiłʼíinii nízhiʼ binahjįʼ bikʼi nideiikai.
6 Háálá shiʼałtı̨́ı̨́ʼ doo baʼííníshłíi da índa shidiltłish doo bee deesdzih da.
7 Nidi nihiʼanaʼí danilíinii bitsʼą́ąjįʼ yisdánihíínínil áádóó nihikʼee dadiniihii tʼóó baa yáhásinígi íinilaa.
8 Diyin God éí tʼáá áłahjįʼ baa dadzííníidlíigo baa dahwiiʼniih áádóó hoolʼáágóó nízhiʼ baa dahwiiʼniih doo. Síilah.
9 Nidi nahjįʼ kónihiinilaa áádóó doo daʼniidlı̨́ı̨́góó ánihiinilaa, áko nihisiláo tʼáadoo bił nisíníbaaʼ da.
10 Anaʼí tʼáá bichʼįʼdóó naníshiijéeʼgo ánihiinilaa. Áádóó danihijoołxáii éí nihinaalyeʼé yę́ę áłah ádayiilaa.
11 Atsįʼ biniyé dibé nidadootsiłii nidahoniidlingo ánihiinilaa. Índa ałʼąą dineʼé bitahgóó tanihiníníłkaad.
12 Nidineʼé niidlíinii tʼįįhdígo nihą́ą́h daʼílı̨́įgo nanihiyíníłniiʼ, áádóó doo ląʼí nihą́ą́h niʼiizlı̨́įʼ da.
13 Bił kéédahwiitʼíinii bichʼįʼgo bá nahatʼiʼii ánihiinilaa. Nihinaagóó kéédahatʼíinii nihá nidahałtʼiʼgo índa tʼóó nihaa daadlohgo íinilaa.
14 Ałʼąą dineʼé bitahgóó tʼóó nihee niyáʼádahodiltiʼgo áádóó nihichʼįʼ bitsiiʼ deiłmazgo íinilaa.
15 Tʼáá áłahjįʼ doo ił nishłı̨́į da, áádóó tʼóó ádaa yánísdzin shide ádzaa.
16 Háálá shá nidahałtʼiʼgo saad shichʼįʼ adayiiníiłgo dashódziih áádóó anaʼí índa kʼéédidooʼníiłii biniinaa tʼóó ádaa yániisdzı̨́ı̨́ʼ.
17 Díí tʼáá ałtso nihikʼijįʼ dahéełdas daazlı̨́ı̨́ʼ, nidi doo naa deisiiʼnah da; nihił ahaʼdíínítʼánígíí tʼáadoo doo ákǫ́ǫ́ ádeiilyaa da.
18 Nihijéí biyiʼdi doo tʼą́ą́ʼ áńdeiidzaa da, índa nikʼehgo áhootʼéii doo bitsʼáhaakai da,
19 azhą́ mąʼii bitahdi nanihidiníyiish nidi, áádóó anoonééł bichahaʼoh nihikʼiiniłdoh nidi, tʼáadoo kódeiidzaa da.
20 NihiDiyin God bízhiʼ baa deisiiʼnahgo, doodaiiʼ diyin dabidiʼníinii bichʼįʼ dah dadiilniiʼgo,
21 daʼ doósh éí Diyin God bił bééhodoozįįł da? Jó, bí ajéí biyiʼdi nidanilʼinii bił bééhózin?
22 Tʼáá aaníí, niniinaa shá bíighah nanihiʼditseed; dibé nidootsiłii nidahoniidlingo nihaa nitsáhákees.
23 Bóhólníihii nílíinii, chʼéénídzííd! Haʼátʼíísh bąą íłhosh? Nídiidááh! Hoolʼáágóó nahjįʼ kónihóólééh lágo!
24 Haʼátʼíísh bąą nihitsʼąą naʼádinílʼin áádóó bee atídanihiʼdilʼíinii índa bee nihide ádahólzinii baa náyooʼnah?
25 Háálá nihiiʼ naazíinii niʼjįʼ yaa dadínéestʼą́. Índa niʼjįʼ nihídazhdiiłjééʼ nidahoniidlin dasiidlı̨́ı̨́ʼ.
26 Díldzíiłgo nihíká anilyeed! Aa aʼááh nínízinii binahjįʼ nihikʼé nináʼnídléego yisdánihínííł.
