Psalm 38:1-22
Tiʼhooníihii ádił oodzííʼ yąąh bíniʼii bisodizin
38 Bóhólníihii nílíinii, náháchįʼgo tʼáadoo nashidíteehí, tʼáá íiyisí doo nił hózhǫ́ǫ́góó tʼáadoo hashkée nashinítiní!
2 Háálá nikʼaʼ shaa adaazhjil, áádóó yéego shikʼi dinilchid.
3 Doo nił hóózhǫǫdígíí biniinaa shitah nahastseed; shaʼátʼeʼ biniinaa shitsʼin dadiniih.
4 Háálá doo ákwii áátʼįįdii shikʼi diilkǫʼ; hééł nahalingo shide áníłdáás.
5 Doo áháshyánígíí biniinaa tídááná yę́ęgóó dííłdzidgo daniłchxon.
6 Shichʼįʼ nahwiiʼnáago shá bíighah yínííł nishłı̨́įgo yéego bikʼee naashyiish.
7 Shinííʼdóó yaago kǫʼ hózhdínił nahalingo shitah nahastseed.
8 Hoʼdishjizhígíí nahalingo shitah doo hwiináa da silı̨́ı̨́ʼ. Ayóo shijéí yidíłniihígíí bikʼee dishʼní.
9 Bóhólníihii, bídin nishłíinii tʼáá ałtso nił bééhózin; dishʼnínígíí doo nitsʼąą neesʼı̨́įʼ da.
10 Shijéí nitsináltłiʼ; shąąh nááhákaʼgo shináʼoh náhoojı̨́ı̨́h.
11 Bee shąąh dahooʼaʼígíí biniinaa dashichʼooní índa bił naashdeeh yę́ę doo shinádadízin da, shikʼéí danilíinii tʼáá níléí shitsʼáhwiiníʼą́ądi nidaakai.
12 Dahodiyiilyééł dashóʼníinii shá ninádaʼaʼnił. Atídashidoolíiłii doo yáʼátʼééhgóó shindahagizgo shidaʼdoolohígíí shá bíighah yaa nitsídaakees.
13 Nidi shí diné bijééhkałii nahalingo doo adiistsʼaʼ da. Diné doo yáłtiʼii nahonishłin.
14 Tʼáá aaníí, diné bijééhkałii nahonishłingo tʼáadoo bee haosdziihí da.
15 Bóhólníihii nílíinii, ni tʼéí níká shił chohooʼı̨́; ni lą́ą, Bóhólníihii shiDiyin God nílíinii, ni éí shichʼįʼ ééhodíísįįł.
16 Háálá ándííniid, Ałtánídiisghasgo shee ádaa dahaʼniihii tʼáadoo shaa bił dahózhóní.
17 Jó, kʼadę́ę naaʼiishtłíísh áádóó tʼáá áłahjįʼ shił hodiniihgo yínííł naashá.
18 Doo ákwii áátʼįįdii bee ádaa hashneʼ áádóó ádił niʼiisdzíihgo bąąh shíniʼ.
19 Shiʼanaʼí danilíinii dabiinéigo ayóó ádabóodziil, áádóó éí tʼáadoo biniinaanígóó shikʼee dadiniihii tʼóó ahayóí.
20 Áádóó ałdóʼ yáʼátʼéehii bidiníná doo yáʼáshóonii shaa nídayiiʼníiłii éí shiʼanaʼí danilı̨́, háálá yáʼátʼéehii bikʼehgo yishááł.
21 Bóhólníihii nílíinii, yóóʼashidóóʼááł yíilaʼ! ShiDiyin God nílíinii, tʼáadoo shitsʼáhwiiníʼą́ądi honílóní!
22 Bóhólníihii yisdáshíłtéehii, tsı̨́įłgo shíká anilyeed!
