Psalm 35:1-28
Anaʼí bitsʼąą yisdáshííłtı̨́ bá sohodizin
35 Bóhólníihii nílíinii, shighadaʼditʼáahii shá bighadiʼnítʼaah; shił daʼahigáanii shá bił daʼahígą́!
2 Béésh téél áchʼą́ą́h dah yitʼáałii índa naagé nídiinííł índa díldzíiłgo shíká anilyeed!
3 Nidashiniłchéii tsiidétáán bichʼįʼ bił handeeł! Shiiʼ sizíinii ábidiní, Shí yisdánííłtíinii nishłı̨́!
4 Shizééʼ nideiiʼáhígíí hániʼdii tʼáadoo danilínígóó áádóó tʼóó baa yáhásinígi ádabiʼdilnééh! Doo yáʼátʼééhgóó shindahagizgo atídashiléhígíí bíniʼ tʼą́ą́ʼ anábidiʼnilkaadgo yaa yádaniizįįh!
5 Hániʼdii azhool bił deíyółígi átʼéego Bóhólníihii bidiyingo naalʼaʼí binoołkał leʼ!
6 Bóhólníihii bidiyingo naalʼaʼí binoołkałgo hániʼdii tʼáá chahałheełgóó índa hwíídéeltǫʼgóó dazhnéechéeh leʼ!
7 Háálá tʼáadoo biniinaanígóó shiniyé aʼáán góyaa łoh nídeideesʼı̨́ı̨́ʼ; tʼáadoo biniinaanígóó sheʼiinaʼ yiniyé hadah hwiizgeed.
8 Tʼáadoo dilyésí bíniʼ ábiʼdildįįh! Áádóó bíniʼ łoh néideesʼı̨́įʼii tʼáá bí yiih nídoodááł; bíniʼ ábidoołdįįłii yiih yitłíísh!
9 Ákohgo shiiʼ sizíinii Bóhólníihii yaa bił hózhǫ́ǫ doo; bibee yisdáʼiildéehii yaa bił nihoozhǫǫh doo.
10 Tʼáá sézı̨́ı̨́ nítʼééʼ ádideeshniił, Diné bahojoobáʼíii diné łaʼ bilááh ábóodziilgo atíbíłʼíinii bitsʼą́ąjįʼ yisdádííłtéełii, aooʼ, bahojoobáʼíii áádóó hojoobaʼ hasʼáanii bighaʼiiʼníiłii bitsʼą́ąjįʼ yisdádííłtéełii, Bóhólníihii nílíinii, háishąʼ nigi átʼé?
11 Doo tʼáá aaníígóó dahalneʼii shichʼįʼ nídahidiikááh; tʼáadoo shił bééhózinii yee shikʼídahaʼááh.
12 Yáʼátʼéehii bideená doo yáʼáshóonii shichʼįʼ ninádayiidlé; éí bąą shiiʼ sizíinii yínííł nilı̨́.
13 Nidi bitah dahoneezgai yę́ędą́ą́ʼ shí éiyá baa yínííł naasháago tłʼoh yishbizhii shiʼééʼ nítʼééʼ; shiiʼ sizíinii ádaa hojoolbáʼígo doo ashą́ą́góó íʼdiishyaa. Nidi bá sodiszinii tʼáadoo násdlı̨́ʼígóó tʼóó shikʼijįʼ tʼą́ą́ʼ nináhádleeh,
14 shikʼis, éí doodaléiʼ bił háíʼáázh bąąh shíniʼ nahalingo, doodaiiʼ łaʼ hamá baa jicha nahalingo yaa áníshtʼéego atínídinishdleeh nítʼééʼ.
15 Nidi chʼééh áshtʼı̨́įgo baa bił dahóózhǫǫdgo shiniyé áłah silı̨́ı̨́ʼ; tʼáá aaníí doo ádił dandlíinii doo béédahasinígíí shiniyé áłah silı̨́įʼgo tʼáadoo áádahootʼįįhí dashijoołáago shá nidahałtʼiʼ.
16 Ádaʼazįįdgi Diyin God doo deidísinii á nidahałtʼiʼígi átʼéego shichʼįʼ biwooʼ ahídeidiłkʼash.
17 Bóhólníihii nílíinii, haashąʼ nízáagi tʼóó nináał doo? Yee atídaʼałʼíinii bitsʼą́ąjįʼ shiiʼ sizíinii yisdáníłteeh; náshdóítsoh bitsiijįʼ daditłʼooígíí bitsʼą́ąjįʼ tʼáá shí sheʼiinaʼ yisdáníłteeh!
18 Ayóó átʼé áłah ílı̨́įgi nichʼįʼ ahééh nisin doo, diné ayóó ánéelą́ą́ʼ bichádahilzhołgi naa hashniih doo.
19 Tʼáadoo biniinaanígóó shiʼanaʼí danilíinii doo shaa bił dahózhǫ́ǫ da leʼ; tʼáadoo baanígóó shikʼee dadiniihii tʼáadoo bił dahózhǫ́ǫgo dashidiʼniihí leʼ.
20 Háálá doo kʼé dandzingo yádaałtiʼ da, nidi tʼáadoo íitsʼaʼí kéédahatʼíinii naʼadloʼ saad yee yindahagiz.
21 Tłeheeyéiiʼ, daaníigo bizééʼ nídahoditsʼǫʼgo shaa daadloh. Nihinááʼ yeeʼ bee dahwiiltsą́! daaní.
22 Bóhólníihii nílíinii, díí yiniłtsą́; tʼáadoo tʼóó dííníłhélí! Bóhólníihii nílíinii, tʼáadoo nízaadi shitsʼą́ądi honílóní!
23 ShiDiyin God áádóó shiBóhólníihii nílíinii, díldzííł; biniyé áshtʼíinii biniyé shá díldzíiłgo hazhóʼó shá baa nánítʼįįh!
24 Bóhólníihii shiDiyin God nílíinii, tʼáá ákogi ánítʼéhígíí bikʼehgo shaa nánítʼįįh; tʼáadoo shaa bił dahózhóní leʼ!
25 Tʼáá biyiʼídi, Tsʼíigo, tsʼíigo lą́ą! laanaa daniidzinii nihá bohoolyaa, tʼáadoo daaníní. Adahosiilnaʼ; ałdóʼ tʼáadoo daaníní leʼ.
26 Atíshiʼdilʼı̨́įgo yaa bił dahózhóonii bíniʼdii tʼóó bił ałtaa dahaʼaʼgo tʼóó baa yáhásinígi ádabiʼdólnééh! Shichʼįʼ ayóó átʼé áńdaʼdiilʼįįhii bíniʼdii doo ił ílı̨́, índa baa yáhásinii béédaháastłʼingo ádabiʼdólneʼ!
27 Tʼáá ákogi átʼé shá bidíníniidii yídin danilíinii éí bíniʼdii yéego bił dahózhǫ́ǫgo ádaaníi leʼ; tʼáá aaníí, bíniʼ áłahjįʼ kódaaníi doo, Bóhólníihii ayóó átʼéii nilı̨́; bá naalʼaʼí yáʼátʼéehgo dah ooléłígíí bił nihooshǫǫh!
28 Áádóó tʼáá ákogi ánítʼéhígíí índa bee naa haʼniihígíí tʼáá áłahjįʼ bee naa yáshtiʼ dooleeł.
