Psalm 135:1-21
135 Bóhólníihii baa dahohniih. Bóhólníihii bízhiʼ baa dahohniih; Bóhólníihii bá naalʼaʼí danohłíinii, Bóhólníihii baa dahohniih!
2 Nihí Bóhólníihii bikin biiʼ sohodizin góneʼ nihiDiyin God bikin binaagi hazʼánígi nisoozíinii,
3 Bóhólníihii baa dahohniih, háálá Bóhólníihii yáʼátʼéehii nilı̨́; bízhiʼ bee dayínóhshíigo baa dahohniihgo dahohtaał, háálá ayóó ánóolnin!
4 Háálá Bóhólníihii éí Jéíkab dineʼé, tʼáá éí Ízrel dineʼé, tʼáá hó hadineʼé dooleeł biniyé ádá néidiiʼnil.
5 Háálá Bóhólníihii ayóó átʼéii nilı̨́įgo shił bééhózin, áádóó nihiDiyin God éí diyin dabidiʼníinii tʼáá ałtso yiláahgo átʼé.
6 Yáʼąąshdi, nahasdzáán bikáaʼgi, tónteel bikááʼgóó índa táłtłʼááhgóó Bóhólníihii tʼáá ádeeshłííł nízinígíí áyiilaa.
7 Nidahoneesʼą́ą́dę́ę́ʼ tʼáá bí kʼos hadahalzhoodgo ííłʼı̨́, nahałtin doogo atsiniltłʼish anídahataʼgo ííłʼı̨́ áádóó biyódí bił hazʼą́ą́dóó níyolgo ííłʼı̨́.
8 Bí lą́ą Ííjip kéyahdi diné áłtsé nidahaazhchíinii índa naaldloosh áłtsé nidahaazhchíinii íísdįįd niʼ.
9 Éí, Ííjip dineʼé nohłíinii, nihitahgi Féro áádóó bá nidaalʼaʼí bikʼijįʼ bee éédahózinii índa tʼóó bikʼedaʼayóii áyiilaa niʼ.
10 Éí ałʼąą dineʼé tʼóó ahayóí índa aláahgo naatʼáanii ayóó ádaatʼéii íísdįįd niʼ.
11 Sáíhan éí Ámor dineʼé binanitʼaʼí nilı̨́ı̨́ nítʼééʼ yę́ę, áádóó Ag éí Béíshan dineʼé binanitʼaʼí nilı̨́ı̨́ nítʼééʼ yę́ę, índa Kéínan kéyahgi bee ídahólnííh nítʼééʼ yę́ę tʼáá ałtso tʼáá yił áhásdįįd niʼ.
12 Áko dabikéyah éí Ízrel hadineʼé bííʼ dooleełgo baazhdiníʼą́.
13 Bóhólníihii nílíinii, nízhiʼ hoolʼáágóó hólǫ́. Bóhólníihii nílíinii, náás oochííłgóó tʼáá ałtso bee nééhániih.
14 Háálá Bóhólníihii bidineʼé doo haada yitʼéégóó yá hadoodzih, áádóó bá nidaalʼaʼí łahgo átʼéego yaa tsíndookosgo yaa aʼááh dínóozįįł.
15 Ałʼąą dineʼé biʼedaʼalyaii éí béésh łigaii índa óola bee ádaalyaa; éí diné bílaʼ yee ádayiilaii ádaatʼé.
16 Éí bizééʼ dahólǫ́ǫ nidi doo yee yádaałtiʼ da. Binááʼ dahólǫ́ǫ nidi doo yee daʼooʼı̨́į da.
17 Bijaaʼ dahólǫ́ǫ nidi doo yee daʼdiitsʼaʼ da. Bizééʼ dahólǫ́ǫ nidi yee nídadidzihii ádaadin.
18 Díí ádajoolíłígíí tʼáá éí nidahojílin; tʼáá aaníí, biʼedaʼalyaii yaa dadzólíhígíí tʼáá ałtso ałdóʼ tʼáá ákódaatʼé.
19 Ízrel dineʼé danohłíinii, Bóhólníihii baa dahohniih! Éran dineʼé danohłíinii, Bóhólníihii baa dahohniih!
20 Líívai dineʼé danohłíinii, Bóhólníihii baa dahohniih! Bóhólníihii dadíínóhsinii, Bóhólníihii baa dahohniih!
21 Bóhólníihii éí Záíyandóó Jerúsalemgi kééhatʼíinii baa haʼniih! Bóhólníihii baa dahohniih!
